Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  oktober 2015

Wi kan leri sabi Gado trutru?

Wi kan leri sabi Gado trutru?

„Gado na wan sma di yu no o man frustan noiti.”—A filosofiaman Filo di ben e libi na Aleksandria moro leki 1900 yari pasa.

„[Gado] no de fara fu nowan fu wi.”—Saulus fu Tarsus di ben e taki nanga den filosofiaman fu Ateine moro leki 1900 yari pasa.

NANGA sortuwan fu den denki disi yu e agri? Furu sma lobi a sani di Saulus fu Tarsus noso na apostel Paulus taki èn a e gi den deki-ati (Tori fu den apostel 17:26, 27). Na tra presi fu Bijbel wi kan leisi a srefi sortu sani di Paulus taki. Fu eksempre, Bijbel e fruteri fu wan begi fu Yesus di e gi sma deki-ati trutru. Na ini a begi dati Yesus gi den bakaman fu en a dyaranti taki den kan kon sabi Gado èn taki den kan kisi blesi fu en.Yohanes 17:3.

Ma den filosofiaman soleki Filo ben e si sani heri tra fasi. Den ben feni taki noiti wan sma kan sabi Gado fu di nowan sma man frustan fa a de. Ma san wi musu bribi?

Bijbel e sori krin taki a muilek gi libisma fu frustan son sani fu Gado. Fu eksempre, libisma no man sabi o langa a Mekiman de kaba, omeni a sabi èn omeni koni a abi. Libisma no o man frustan den sani disi noiti. Ma den sani disi no musu tapu wi fu leri sabi Gado. Fu taki en leti, te wi e prakseri den sani disi, dan wi kan „kon krosibei na Gado” (Yakobus 4:8). Meki wi luku son sani fu Gado di wi no man frustan. Baka dati wi o luku son sani fu Gado di wi man frustan.

 Sortu sani fu Gado wi no man frustan?

GADO DE FU ALA TEN: Bijbel e taki dati ’ala ten Gado ben de kaba’ (Psalm 90:2). Sobun, Gado no abi wan bigin èn noiti a o abi wan kaba. „Nowan sma kan sabi o langa a de na libi kaba.”Yob 36:26.

Fu san ede a bun fu sabi disi: Gado e pramisi yu taki yu o kisi têgo libi efu yu leri sabi en trutru (Yohanes 17:3). Yu ben o bribi a sani disi efu Gado srefi no ben e libi fu têgo? Soso „a têgo Kownu” kan meki so wan pramisi kon tru.1 Timoteyus 1:17.

DEN SANI DI GADO SABI: Bijbel e taki dati „nowan sma kan frustan den sani di [Gado] sabi”, fu di den prakseri fu en hei moro den prakseri fu wi (Yesaya 40:28; 55:9). Fu dati ede Bijbel e taki: „Suma sabi san Gado e prakseri? Suma o man gi En rai?”1 Korentesma 2:16, Nyun Testamenti.

Fu san ede a bun fu sabi disi: Gado man arki den begi fu milyunmilyun sma na a srefi ten (Psalm 65:2). A e si srefi ibri pikin fowru di e fadon na gron. Yu denki taki wan dei Gado en frustan o furu nanga someni sani taki a no o man poti prakseri na yu, noso taki a no o man arki den begi fu yu? Kwetikweti. Gado en frustan no e furu noiti. Boiti dati, gi en yu „warti moro leki wan heri ipi pikin fowru”.Mateyus 10:29, 31.

A KONI FU GADO: Bijbel e taki dati „libisma noiti no man kon sabi finifini fa a tru Gado meki den sani fu en” (Preikiman 3:11). Sobun, noiti wi o man sabi ala sani fu Gado. Wi no man frustan fa Gado e du sani fu di „wi no man kon sabi fa den pasi fu en de” (Romesma 11:33). Ma toku Gado de klariklari fu leri sma den pasi fu en efu den wani du a wani fu en.Amos 3:7.

Libisma no man sabi o langa a Mekiman de kaba, omeni a sabi èn omeni koni a abi

Fu san ede a bun fu sabi disi: Te yu e leisi Bijbel èn yu e studeri en, dan ala ten yu o man leri wan nyun sani fu Gado èn fu a fasi fa a de. O moro yu kon sabi fu wi hemel Papa, o moro krosibei yu kan kon na en. Wi abi na okasi fu tron moro bun mati fu en fu têgo.

Sani di yu man sabi

A tru taki wi no man frustan son sani fu Gado, ma disi no wani taki dati wi no man sabi en kwetikweti. Bijbel e fruteri wi furu sani di kan yepi wi fu sabi en moro bun. Meki wi luku wan tu sani.

A NEN FU GADO: Bijbel e taki dati Gado gi ensrefi wan nen. A taki: „Mi na Yehovah. Dati na mi nen.” Gado nen skrifi sowan 7000 tron na ini Bijbel. Nowan tra nen skrifi so furu na ini Bijbel.Yesaya 42:8.

Fu san ede a bun fu sabi disi: Na ini a begi di Yesus leri sma, a taki: „Wi Tata na hemel, meki yu nen de santa” (Mateyus 6:9). Sobun, yu kan gebroiki Gado nen te yu e begi. Yehovah de klariklari fu frulusu iniwan sma di e sori lespeki gi a nen fu en.Romesma 10:13.

A PRESI PE GADO E TAN: Bijbel e taki fu tu tanpresi: a grontapu pe wi e tan èn hemel pe den yeye e tan (Yohanes 8:23; 1 Korentesma 15:44). Bijbel e taki dati a tanpresi fu wi Mekiman de na „hemel”.1 Kownu 8:43.

Fu san ede a bun fu sabi disi: Yu o man frustan moro bun fa Gado de. Wi Mekiman a no wan krakti di de na ala sei èn na ini ala sani. Yehovah na wan trutru sma di e tan na wan trutru presi.  Ma toku a man si ala sani di a meki.Hebrewsma 4:13.

DEN FASI FU GADO: Bijbel e leri wi taki Yehovah abi moi fasi. „Gado na lobi” (1 Yohanes 4:8). A no e lei noiti (Titus 1:2). A no lobi a wan sma moro a trawan, a abi sari-ati, a abi switifasi èn en ati no e bron esi (Eksodes 34:6; Tori fu den apostel 10:34). Wan sani di furu sma no e fruwakti, na taki wi Mekiman wani tron wan „bun mati” fu den sma di e lespeki en.Psalm 25:14.

Fu san ede a bun fu sabi disi: Yu kan tron wan mati fu Yehovah (Yakobus 2:23). Te yu kon sabi moro bun suma na Yehovah, dan yu o man frustan son Bijbel tori moro bun.

„SUKU EN”

Bijbel e sori krin fa Yehovah Gado de. A no de wan sma di yu no o man frustan noiti. Na presi fu dati wi Mekiman wani taki yu leri sabi en. En Wortu Bijbel e pramisi wi: „Efu yu suku en, a o meki yu feni en” (1 Kroniki 28:9). Wi wani gi yu deki-ati fu kon sabi Gado moro bun. Yu kan du disi te yu e leisi Bijbel èn te yu e meki ten fu denki fu den sani di yu leisi. Te yu e du dati, dan Bijbel e pramisi taki Gado ’o kon krosibei na yu’.Yakobus 4:8.

Te yu e leisi Bijbel èn yu e studeri en, dan ala ten yu o man leri wan nyun sani fu Gado èn fu a fasi fa a de

Ma kande yu e aksi yusrefi: ’Efu mi no man frustan ala sani fu wi Mekiman, dan fa mi kan tron wan mati fu en?’ Prakseri a sani disi: A moro bun mati fu wan datra no abi fu de wan datra tu, a no so? Kande a mati abi wan heri tra wroko srefi. Ma toku den na bun mati. San prenspari, na taki a mati sabi fa a datra de. A sabi san a datra lobi èn san a no lobi. Na so a de tu nanga Yehovah. Te yu e leisi Bijbel yu kan kon sabi sortu sma Yehovah de. Na dati de fanowdu fu tron wan mati fu en.

Bijbel no e taki frafra nomo fa Gado de. Na presi fu dati a e fruteri ala san wi musu sabi fu leri sabi en moro bun. Yu wani sabi moro fu Yehovah Gado? Yehovah Kotoigi de klariklari fu kon studeri Bijbel nanga yu sondro taki yu abi fu pai gi dati. Wi e gi yu deki-ati fu suku den Kotoigi na ini yu birti, noso fu go na a website fu wi, www.jw.org/srn.

Kon sabi moro

A WAKTITOREN

Gado wani yepi yu

Fa a de te yu e bribi na ini Gado, ma yu e firi leki yu no sabi en trutru?

A WAKTITOREN

Fu san ede furu sma e bribi taki wan Gado de di meki ala sani?

Na Gado meki libisma, noso den komoto fu meti?