Wi na memre fu wan organisâsi di de na heri grontapu. Wi no de memre fu nowan tra kerki. Na edekantoro fu wi de na ini Amerkankondre, ma a moro bigi grupu fu Yehovah Kotoigi e libi na ini tra kondre. Fu taki en leti, sowan aiti milyun Kotoigi e leri sma sani fu Bijbel na ini moro leki 230 kondre. Wi e du a wroko disi fu di wi wani gi yesi na a sani disi di Yesus taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati.”Mateyus 24:14.

Awinsi pe wi e libi, wi e du ala san wi man fu gi yesi na den wet fu lanti, solanga a no de wan sani di de teige a konsensi fu wi. Ma wi no e bumui nanga politiek fu di Yesus gi ala Kresten a rai fu „no de wan pisi fu grontapu”. Dati meki wi no e bumui nanga politiek èn wi no e teki prati na nowan feti (Yohanes 15:19; 17:16). Fu eksempre, na a pisi ten fu a Di Fu Tu Grontapufeti, sma poti Yehovah Kotoigi na strafu-oso, den pina den èn den kiri den srefi, fu di den no ben wani teki prati na a feti. Wan man di ben de wan kerki fesiman na ini Doisrikondre fosi, taki fu Yehovah Kotoigi: „Nanga leti den kan taki dati den na a wan-enkri bigi grupu na ini Doisrikondre di no teki prati na a feti fu di a konsensi fu den no gi den pasi fu du dati.”

„[Yehovah Kotoigi] abi trutru deki-ati fu du san bun. Na den sortu sma disi di no e denki densrefi nomo wi abi fanowdu. Den ben o man kisi den moro hei posisi na ini a politiek srefi. Ma noiti wi o man feni den sma disi fu wroko gi wi. . . . Den e gi yesi na lanti, ma den e bribi taki na soso Gado Kownukondre man lusu ala den problema fu libisma.”—A koranti Nová Svoboda fu Tyekia Republiek.

Aladi wi no de wan pisi fu grontapu, toku wi no e go libi aparti fu tra sma. Wan leisi di Yesus ben begi Gado, a taki fu den bakaman fu en: „Mi no e aksi yu fu puru den na grontapu” (Yohanes 17:15). Fu dati ede yu e si kande taki wi e go na wroko, wi e go na wenkri èn wi e go na skoro neleki ala tra sma.