Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  september 2015

 TORI FU A KAFTI

Suma na Yehovah Kotoigi?

Suma na Yehovah Kotoigi?

„Mi sabi Mike omeni yari kaba. En na wan Yehovah Kotoigi. Ma noiti mi ben e frustan a bribi fu en. Suma na Yehovah? Fu san ede den Kotoigi no e hori fesadei? Mike de na ini wan sortu sekte?”—Becky, Kalifornia, Amerkankondre.

„Di mi birman nanga birfrow bigin studeri Bijbel nanga Yehovah Kotoigi, mi ben e aksi misrefi: ’San a nen Yehovah Kotoigi wani taki? Fa wan kerki kan abi so wan nen?’”—Zenon, Ontario, Kanada.

„Mi nanga mi wefi ben e denki taki Yehovah Kotoigi e kon na wi oso fu meki wi kisi konsensi fonfon fu di wi no ben e go na kerki. Wi ben feni taki den bigi kerki no abi san wi e suku. Sobun, fa wan sekte leki den Yehovah Kotoigi kan abi san wi e suku?”—Kent, Washington, Amerkankondre.

„Fu taki en krin, mi no ben sabi suma na den èn san den e bribi.”—Cecilie, Esbjerg, Deinsikondre.

Kande yu si Yehovah Kotoigi e preiki oso fu oso èn na presi pe furu sma de. Kande yu si taki den e prati buku di e taki fu Bijbel èn taki den e aksi sma efu den wani studeri Bijbel. A kan taki wan fu den gi yu a tijdschrift disi. Ma kande yu e aksi yusrefi suma na Yehovah Kotoigi trutru. Kande yu abi a srefi denki fu wan fu den sma di kari didyonsro.

Efu yu abi den sortu aksi disi, dan pe yu kan feni den piki? Fa yu kan kon sabi san Yehovah Kotoigi e bribi trutru? Fa den e pai gi den kostu fu a preikiwroko fu den èn gi den konmakandra presi fu den? Fu san ede den e suku fu taki nanga yu na oso noso na tra presi tu?

Cecilie, di wi kari didyonsro, taki: „Mi leisi furu fu Yehovah Kotoigi tapu Internet. Mi yere son sma e taki sani fu den èn mi ben bribi furu fu den ogri sani di den taki. Dati meki mi no ben e denki bun fu Yehovah Kotoigi srefisrefi.” Ma bakaten Cecilie taki nanga den Yehovah Kotoigi srefi èn a kisi bun piki tapu den aksi fu en.

Yu wani kon sabi trutru suma na Yehovah Kotoigi? Wi e gi yu deki-ati fu taki nanga den Yehovah Kotoigi srefi, sobun den sma di meki a tijdschrift disi. Den wawan kan gi yu den yoisti piki (Odo 14:15). Wi howpu taki den artikel di e kon now o yepi yu fu si suma na wi èn san wi e bribi. Den artikel disi kan yepi yu tu fu frustan a wroko fu wi moro bun.