Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  september 2015

Yu e mandi nanga Gado?

Yu e mandi nanga Gado?

„FU SAN EDE a sani disi miti mi? Fu san ede Gado gi pasi taki a sani disi pasa nanga mi?” Na disi Sidnei ben aksi ensrefi. Sidnei na wan yonkuman di abi 24 yari èn a e tan na ini Brasyonkondre. Wan leisi di a ben go swen, a kisi wan hebi mankeri di meki taki a de na ini wan rolsturu now.

Furu sma e pina fu di den kisi wan mankeri, fu di den siki, fu di wan lobiwan fu den dede, fu di wan rampu ben de na ini a kondre fu den, noso fu di feti de na ini a kondre fu den. Te den sani disi e miti sma, dan den kan mandi nanga Gado. Srefi na ini owruten sma ben e firi so. Fu eksempre, ala sortu ogri ben miti a famiri-edeman Yob baka makandra. Fu di a ben denki taki na Gado ben e du disi nanga en, meki a taki: „Mi e bari kari yu fu yepi mi, ma yu no e piki mi. Mi opo tanapu, so taki yu kan poti prakseri na mi. Yu kenki. Now yu wani du mi ogri. Nanga ala yu krakti yu e naki mi leki wan feanti.”Yob 30:20, 21.

Yob no ben sabi suma ben du den sani disi nanga en. A no ben sabi tu fu san ede ala sortu ogri ben miti en èn fu san ede Gado gi pasi taki den pasa. Koloku taki Bijbel e fruteri wi fu san ede den sortu sani disi e pasa èn san wi kan du te den sani disi miti wi.

GADO BEN WANI TAKI LIBISMA E PINA?

Bijbel e taki fu Gado: „A e du sani di bun dorodoro. Ala ten a e du san reti. A de wan Gado di de fu frutrow. A no e du kruktudu. A de wan reti-ati sma èn a abi wan krin ati” (Deuteronomium 32:4). Te yu e prakseri a sani disi, dan yu denki taki wan „reti-ati” Gado di „abi wan krin ati” ben wani taki libisma musu pina? Yu denki taki so wan Gado ben o tyari rampu kon fu strafu libisma, noso fu meki den kenki den libi? Wi alamala kan frustan taki a sani disi no kan.

Bijbel e taigi wi: „Te tesi e miti wan sma, a no musu taki: ’Na Gado e tesi mi’, bika nowan sma kan tesi Gado nanga ogri sani èn Gado srefi no e tesi sma tu” (Yakobus 1:13). Fu taki en leti, Bijbel e leri wi taki Gado ben gi libisma ala sani di den ben abi fanowdu fu abi wan koloku libi. A gi a fosi man nanga uma, Adam nanga Eva, wan moi tanpresi, a gi den ala sani di den ben abi fanowdu fu tan na libi èn a gi den wan switi wroko fu du. Gado ben taigi den tu: „Meki pikin èn kon furu, teleki unu kon lai na grontapu èn basi ala sani na grontapu.” Sobun, Adam nanga Eva no ben kan taki dati Gado no e broko en ede nanga den.Genesis 1:28.

Ma na ini a ten disi sani no e go bun na grontapu srefisrefi. Fu taki en leti, ala sortu ogri miti sma na ini den hondrohondro yari di pasa. Bijbel abi leti te a e taki: „Ala den sani di Gado meki, e geme doronomo èn den alamala abi pen te now ete” (Romesma 8:22). Fu san ede disi de so?

FU SAN EDE LIBISMA E PINA?

Efu wi wani frustan fu san ede libisma e pina, dan wi musu luku o ten a sani disi bigin. Gado ben taigi Adam nanga Eva taki den no ben mag nyan fu a bon di nen „Sabi san bun èn san ogri”. A ben du disi fu sori den taki na en abi a reti fu taigi den san bun èn san ogri. Ma wan ogri engel di kisi a nen Satan Didibri bakaten, ben kori Adam nanga Eva, so taki den go nyan fu a bon. Di Adam nanga Eva nyan fu a bon, den sori taki den srefi wani bosroiti san bun èn san ogri. Didibri kari Gado wan leiman di a taigi Eva taki a no ben o dede te a ben o trangayesi Gado. Satan ben wani sori taki Gado no ben wani gi den sma di a e tiri a reti fu bosroiti gi densrefi san bun èn san ogri (Genesis 2:17; 3:1-6). Satan ben wani sori tu taki sani ben o go moro bun nanga libisma efu Gado no ben o tiri den. A sani disi meki taki a prenspari aksi disi opo kon: A de so taki Gado na wan bun tiriman?

Ma Didibri meki wan tra tori opo kon. A taki dati libisma e dini Gado soso fu kisi wini. Yob ben de wan man di ben e dini Gado nanga en heri ati. Ma Didibri ben taigi Gado: „A no yusrefi meki wan skotu lontu en, lontu en oso, èn lontu ala sani di a abi? . . . Ma grantangi, langa yu anu now èn puru ala den sani di a abi, dan yu o si efu a no o fluku yu leti na ini yu fesi” (Yob 1:10, 11). Aladi Satan ben e taki fu  Yob, toku a ben wani sori taki ala libisma e dini Gado, soso fu di den e kisi wini fu dati.

FA GADO E SORI TAKI DEN SANI DI DIDIBRI TAKI NO TRU?

San na a moro bun fasi fu sori taki den sani di Didibri taki no tru? Gado di abi ala koni, ben o lusu a tori disi na a moro bun fasi. A fasi fa a ben o lusu en ben o tyari furu wini kon gi wi bakaten (Romesma 11:33). Gado bosroiti fu gi libisma pasi fu tiri densrefi fu wan pisi ten. Na so fasi a ben o kon na krin suma na a moro bun tiriman.

Ala den ogri di e pasa na grontapu na ini a ten disi e sori krin taki libisma no man tiri densrefi. Den tiriman fu grontapu no man tyari freide kon, den no man puru ogri èn den no man sorgu taki ala sma de koloku. San moro ogri srefi, na taki den e pori grontapu. Disi e sori krin taki Bijbel abi leti. Drape skrifi: „A no de na wan libisma di e waka fu taki srefi pe a o poti en futu” (Yeremia 10:23). Soso te Gado e tiri wi, wi kan de seiker taki freide o de fu ala ten, taki libisma o de koloku èn taki ala sani o go bun nanga den. Na dati Gado wani gi libisma.Yesaya 45:18.

Fa Gado o du ala den sani disi gi libisma? Memre taki Yesus taigi den bakaman fu en fu begi: „Meki yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Iya, te a ten doro, Gado o meki a Kownukondre fu en tyari wan kaba kon na ala sani di e meki libisma pina (Danièl 2:44). Pôtifasi, siki nanga dede no o de moro. Bijbel e sori taki Gado o „frulusu den pôti sma di e bari suku yepi” (Psalm 72:12-14). Luku san Bijbel e pramisi den sikisma: „Nowan sma di e tan na ini a kondre o taki: ’Mi siki’” (Yesaya 33:24). Yesus ben taki srefi fu den dedewan di Gado e memre: „A yuru o kon te ala den sma di de na ini den grebi . . . o komopo drape” (Yohanes 5:28, 29). Den pramisi disi e meki wi firi prisiri trutru!

Te wi e bribi trutru taki Gado o du san a pramisi, dan dati e yepi wi fu no mandi nanga en

SAN YU KAN DU TE YU E FIRI BROKOSAKA?

Sowan 17 yari baka di Sidnei kisi mankeri, a taki: „Noiti mi ben feni taki na Yehovah Gado meki mi kisi a mankeri. Ma toku mi ben feni taki a no yepi mi. Son dei mi e sari trutru èn mi e krei te mi e prakseri taki mi no man waka moro. Ma Bijbel yepi mi fu kon frustan taki a mankeri di mi kisi a no wan fasi fa Gado wani strafu mi. Bijbel e taki dati ’ogri ten nanga sani di wi no e fruwakti kan miti wi alamala’. Fu di mi e begi Yehovah doronomo èn fu di mi e leisi son Bijbeltekst di e gi mi deki-ati, meki mi bribi kon moro tranga èn mi abi prisiri na ini a libi.”Preikiman 9:11; Psalm 145:18; 2 Korentesma 4:8, 9, 16.

Te wi e hori na prakseri fu san ede Gado e gi pasi taki libisma e pina èn fa a o tyari wan kaba kon na a sani disi heri esi, dan dati e yepi wi fu no mandi nanga Gado. Wi de seiker taki Gado „e pai den wan di e suku en fayafaya”. Nowan sma di e bribi na ini en èn na ini en Manpikin, o kisi syen.Hebrewsma 11:6; Romesma 10:11.

Kon sabi moro

FA WI E STUDERI BIJBEL NANGA SMA

Fu san ede wi musu studeri Bijbel?

Na heri grontapu, milyunmilyun sma e feni piki tapu prenspari aksi fu a libi, na ini Bijbel. Yu wani de wan fu den tu?