Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  augustus 2015

 TORI FU A KAFTI | SMA DI DEDE MAN KON NA LIBI BAKA?

San e pasa baka te wan sma dede?

San e pasa baka te wan sma dede?

„Mi ben leri taki dri presi de pe wan sma kan go baka te a dede: hemel, hel, noso vagevuur. Mi ben sabi taki mi no bun nofo fu go na hemel, ma mi no ben ogri so te taki mi musu go na hel. Mi no ben e frustan srefisrefi san na a vagevuur. Noiti mi ben leisi fu a sani dati na ini Bijbel. Na sma mi ben e yere e taki fu en.”—Lionel.

„Mi ben leri taki ala sma e go na hemel baka te den dede, ma mi no ben e bribi a sani dati. Mi ben denki taki dede na a kaba fu ala sani èn taki nowan howpu de gi den dedewan.”—Fernando.

Oiti yu aksi yusrefi: ’San e pasa trutru baka te wan sma dede? Den lobiwan fu wi di dede e pina na wan presi? Wi o si den baka wan dei? Fa mi kan de seiker taki den dedewan o kon na libi baka?’ Grantangi, meki wi go luku san Bijbel e leri. Wi o luku fosi san Bijbel e taki fu dede. Baka dati wi o luku sortu howpu Gado Wortu e gi.

 San e pasa te wan sma dede?

SAN BIJBEL E TAKI: „Den libiwan sabi taki den o dede. Ma den dedewan no sabi notinoti èn den no e kisi pai moro tu, bika nowan sma e memre den moro. Ala san yu anu feni fu du, du dati nanga ala yu krakti, bika na ini Grebi, a presi pe yu o go, sma no e wroko, den no e prakseri, den no sabi sani èn den no abi koni.” *Preikiman 9:5, 10.

Grebi na a presi pe sma e go te den dede. Sma di de na ini Grebi no sabi notinoti èn nowan wroko e du drape. Fa a reti-ati man Yob ben e denki fu a Grebi? A ben lasi ala en gudu nanga en pikin na ini wán dei. Baka dati a kisi takru butsweri na en heri skin. Ne a begi Gado: „Mi winsi taki yu ben o kibri mi na ini Grebi. Mi winsi taki yu ben o kibri mi” (Yob 1:13-19; 2:7; 14:13). Son Bijbel gebroiki a wortu „hel” na presi fu „Grebi” na ini a tekst disi. Ma a de krin taki Yob no ben e si a Grebi leki wan presi pe a ben o bron nanga faya èn pe a ben o pina moro srefi. Ma a ben e si en leki wan presi pe a ben o feni frulekti.

Wan tra fasi de tu fa wi kan sabi san e pasa te wan sma dede. Wi kan ondrosuku den Bijbel tori fu aiti sma di ben kon na libi baka di den ben dede.—Luku a faki „ Bijbel e taki fu den aiti sma disi di kon na libi baka”.

Nowan fu den aiti sma disi taki dati den ben de na wan presi pe a libi ben switi noso pe den ben e pina. Efu den sma di ben kon na libi baka ben go na so wan presi di den dede, dan yu no denki taki den ben o fruteri tra sma? Yu no denki taki disi ben o skrifi na ini Bijbel tu so taki ala sma kan leisi en? Ma Bijbel no e taki noti fu den sani dati. Nowan fu den aiti sma fruteri den tori dati. Fu san ede? Fu di den no ben sabi notinoti. Den ben de ini wan sortu dipi sribi. Fu taki en leti, son leisi Bijbel e agersi dede nanga sribi. Fu eksempre, di a meisje fu Yairus ben dede, dan Yesus ben taki dati „a e sribi”.Markus 5:39.

We dan sortu howpu de gi den dedewan? Den kan wiki baka fu a sribi dati?

^ paragraaf 7 Na ini a Bijbel—Nyun-Grontapuvertaling, a Hebrew wortu „Syeol” nanga a Griki wortu „Hades”, vertaal nanga a wortu „Grebi”. Son Bijbelvertaling vertaal den wortu disi nanga „hel”, ma Bijbel no e leri taki dedesma e bron na ini faya.