Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2015

Yu ben sabi a sani disi?

Yu ben sabi a sani disi?

Fa sma ben e gebroiki anumiri na ini owruten?

Sma ben e gebroiki anumiri fu miri karu kon tron blon fu meki brede. Na ini furu osofamiri na den umasma noso den futuboi ben gwenti du a wroko disi ibri dei. Na ini owruten yu ben kan yere ala dei fa sma e miri sani nanga anumiri.Eksodes 11:5; Yeremia 25:10.

Stonpopki nanga prenki fu owruten Egepte e sori fa sma ben e miri sani nanga anumiri. Den ben e poti karu na tapu wan ston di meki spesrutu fu miri sani. A sma di ben e miri ben e kindi na fesi a ston, dan nanga en tu anu a ben e hori wan moro pikin ston di a ben e gebroiki fu griti den karu teleki den kon fini. Soleki fa wan tijdschrift e sori, dan a pikin ston di den ben e gebroiki fu griti a karu ben e wegi sowan 2 noso 4 kilo. Efu yu ben o gebroiki a ston disi fu feti, yu ben kan kiri sma.Krutuman 9:50-54.

Wan anumiri ben de so wan prenspari sani gi wan osofamiri, taki wan wet na ini Bijbel ben e taki dati nowan sma ben musu teki wan anumiri fu wan trawan leki panti. Deuteronomium 24:6 e taki: „Nowan sma musu teki wan anumiri noso wan miriston fu wan trawan leki panti, bika a trawan abi a miriston fanowdu fu tan na libi.”

Fu san ede Bijbel e taki dati Yesus „de so krosibei fu a Tata”?

Bijbel e taki dati Yesus „de so krosibei fu a Tata” (Yohanes 1:18). A sani disi e sori taki Yesus nanga Gado na heri bun mati, èn taki Gado gi en wan bigi grani. A kan taki na ini a tekst disi Yohanes ben e taki fu wan gwenti di den Dyu ben abi te den ben e nyan.

Na ini a ten fu Yesus den Dyu ben e sidon lontu a nyanyan tafra. Ibri sma ben e anga go na a tafra, aladi a e rostu en kruktu-anu na tapu wan kunsu. Dati meki den ben man nyan nanga den reti-anu. Fu di ala sma ben e anga sei nanga sei tapu den kruktu-anu, meki „na ede fu a sma di ben e sidon na yu sei, ben de krosibei fu yu borsu. Sobun, a sma dati ben de moro ’krosibei’ fu yu”, na so wan buku e taki.

Sma ben e si en leki wan bigi grani fu sidon krosibei fu a famiri-edeman noso a sma di ben orga a fesa. Dati meki na a lasti Paskafesa di Yesus ben hori, na „a disipel di Yesus ben lobi”, ben sidon krosibei fu en. Na so fasi Yohanes ben kan anga go na Yesus fu aksi en wan sani.Yohanes 13:23-25; 21:20.