Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuni 2015

 ONDROFENITORI

Wan gudu di den afo fu mi libi na baka

Wan gudu di den afo fu mi libi na baka

Sma e taki dati mi e gersi mi papa. Mi bow leki en, mi abi den ai fu en, èn mi lobi gi lafutori leki en. Ma a no den sani dati wawan mi teki fu en. A gi mi wan gudu di a famiri abi omeni hondro yari kaba. Meki mi fruteri yu san na a gudu disi.

Mi nanga mi papa e luku wan tu owru fowtow fu den afo fu wi

Mi afo Thomas (1) * Williams gebore tapu 20 yanuari 1815, na Horncastle na ini Ingrisikondre. En mama dede tu yari baka dati. Dati meki en papa wawan, John Williams, kweki den pikin. Den ben de dri boi nanga wán meisje. John leri Thomas fu du bow-wroko, ma Thomas du wan tra wroko di a kon bigi.

Na a ten dati, furu sma ben e go na wan nyun kerki di ben opo na ini Ingrisikondre. Wan domri di nen John Wesley, ben gowe libi na Anglikan Kerki, ne a opo wan grupu di sma sabi leki den Methodist. A grupu dati e gi sma deki-ati fu studeri Bijbel èn fu preiki. Den leri fu Wesley prati esi-esi, èn a famiri Williams ben teki a bribi dati. Thomas bigin preiki den sani di Wesley ben e leri èn te fu kaba a kerki seni en fu go preiki na a Stille Zuidzee. Na ini yuli 1840 en nanga en frow, Mary, (2) doro na Lakeba-èilanti, * na ini Fidyi. Na a ten dati den sma di ben e libi tapu na èilanti dati ben e nyan sma.

DEN BEN E LIBI NA MINDRI SMA DI E NYAN LIBISMA

Na ini den fosi yari di Thomas nanga Mary doro na Fidyi, den miti omeni hebi problema. Den ben e wroko tranga omeni yuru langa na ini faya son. Bun ogri sani ben e pasa tu. Den lo ben e feti nanga makandra, sma ben e tyokro frow kiri di no ben abi masra moro, den ben e kiri pikin-nengre, èn den ben e nyan libisma. Boiti dati den sma drape no ben wani arki a boskopu fu den. Mary nanga a fosi boi fu en, John, kon siki so te taki pikinmoro den dede. Na ini 1843, Thomas skrifi: „A libi ben moro mi. . . . Mi ben lasi-ati.” Toku en nanga Mary horidoro. A bribi di den ben abi na ini Yehovah Gado gi den a krakti fu du dati.

Te fu kaba, Thomas bow wan oso fu di a ben leri bow-wroko. Dati ben de a fosi oso na ini Fidyi di bow leki den oso fu Europa. Na oso ben meki na so wan fasi taki a no ben faya tumusi, èn wan lo tra sani ben de na a oso di den sma na ini Fidyi ben feni kefalek moi. Fosi na oso kaba bow, Mary kisi en di fu tu boi, Thomas Whitton (3) Williams, wan fu den afo fu mi.

Na ini 1843, Thomas yepi fu vertaal na Evangelie fu Yohanes na ini Fidyitongo, wan wroko di no ben makriki. * Ma fu di a ben sabi fa fu ondrosuku a kulturu nanga a tongo fu sma, meki a ben man du a wroko disi. Ala den sani di a ben ondrosuku, a skrifi na ini a buku fu en (Fiji and the Fijians 1858). A  buku disi e sori fa sma ben e libi na ini Fidyi na ini a di fu 19 yarihondro.

A tranga wroko di Thomas du na ini Fidyi na ini den 13 yari di a ben de drape, meki taki a kon siki. Dati meki en nanga en osofamiri froisi go na Australia. Te fu kaba, Thomas dede na Ballarat, Victoria, na ini 1891, baka di a wroko tranga omeni yari leki wan domri.

A FAMIRI E FROISI GO NA WEST-AUSTRALIA

Na ini 1883, Thomas Whitton Williams nanga en frow, Phoebe, (4) froisi nanga den osofamiri go na a foto Perth, na ini West-Australia. Na a ten dati, a di fu tu pikin fu den, Arthur Bakewell (5) Williams, wan tra afo fu mi, ben abi neigi yari.

Di Arthur ben abi 22 yari, a go suku wan moro betre libi na Kalgoorlie, wan foto pe furu sma ben e go wroko gowtu èn di ben de sowan 600 kilometer na owstusei fu Perth. Drape a leisi wan tu tijdschrift fu den Internationaal Bijbel Ondrosukuman, soleki fa sma ben sabi Yehovah Kotoigi fosi. A ben aksi tu fu kisi a tijdschrift Zion’s Watch Tower, di wi sabi now leki A Waktitoren. Fu di Arthur ben lobi den sani di a ben leri, meki a bigin fruteri sma den sani dati èn a bigin hori konmakandra pe den ben e studeri Bijbel. Nanga a pikin grupu dati a wroko fu Yehovah Kotoigi bigin na ini West-Australia.

Arthur ben fruteri en famiri tu san a ben e leri. En papa Thomas Whitton, ben feni en bun taki Arthur ben moksi nanga den Bijbel Ondrosukuman. Ma syatu baka dati a dede. Arthur en mama, Phoebe, nanga den sisa fu en, Violet nanga Mary, tron Bijbel Ondrosukuman tu. Violet ben e gebroiki furu fu en ten fu preiki. Arthur ben taki dati Violet ben de „a moro bun preikiman di ben e wroko fayafaya na ini West-Australia”. Kande Arthur e taki dati fu di na en sisa, ma awinsi fa a no fa Violet libi wan bun eksempre na baka gi a famiri Williams.

Baka wan pisi ten Arthur trow èn a froisi go tan na Donnybrook, wan foto na a zuidwest-sei fu West-Australia, pe sma e prani furu froktu. Drape a kisi wan dreiginen „Papa 1914”, fu di a ben e taki fayafaya fu den Bijbel profeititori di ben e sori go na a yari dati. * Ma di a Fosi Grontapufeti bigin, den no ben e dreigi en moro. Arthur ben gwenti preiki gi den sma di ben e kon bai sani na a wenkri fu en. A ben e poti buku nanga tijdschrift na a fensre fu a wenkri. Arthur no ben e bribi taki a Drie-eenheid leri komoto fu Bijbel. Dati meki a ben poti wan bord na a fensre fu a wenkri pe a ben skrifi taki a sma di man sori en taki a Drie-eenheid leri tru, o kisi 100 Australia pond. Noiti wan sma feni a moni dati.

Na oso fu famiri Williams na ini Donnybrook, ben tron a presi pe furu sma ben e kon studeri Bijbel, èn pe konmakandra ben e hori. Bakaten Arthur bow wan Kownukondre zaal, na ini a foto. A ben de wan fu den fosiwan na ini West-Australia. Aladi Arthur  ben pasa 70 yari kaba, a ben e weri en moi paki nanga en das, dan a ben e go preiki nanga en asi di ben nen Doll na ini a heri kontren fu Donnybrook.

Den pikin fu Arthur ben teki na bun eksempre fu den papa, di ben de wan safri-ati man di sma ben e lespeki èn di ben e preiki fayafaya. En umapikin Florence (6) go dini leki zendeling na India. Neleki a papa, den manpikin Arthur Lindsay (7) nanga Thomas, dini bun langa leki gemeente owruman. Na so Yehovah Kotoigi e kari den man di e teki fesi na ini a gemeente.

A SWITI LADY WILLIAMS APRA

Sma ben lobi Arthur Lindsay Williams, a papa fu mi granpapa, fu di a ben abi switifasi. Ala ten a ben abi ten gi sma èn a ben e libi na wan lespeki fasi nanga sma. A ben de kampioen tu fu den man di ben e strei koti udu nanga aksi. A wini a strei disi 18 leisi na ini wan pisi ten fu 12 yari.

Ma Arthur no ben lobi en di a boi fu en Ronald (8) (mi granpapa), di ben abi tu yari, teki wan aksi koti a pikin aprabon di ben de sei na oso fu den. Ronald en mama tai a bon èn te fu kaba a bon bigin gi apra di ben switi kefalek. Den kari den apra dati Lady Williams apra. Na fu a pransun apra disi a Cripps Pink apra komoto, wan apra di sma na heri grontapu sabi.

Bakaten Ronald, mi granpapa, tron wan man di ben e du bow-wroko. Omeni yari langa, en nanga mi granmama yepi bow konmakandra presi fu Yehovah Kotoigi na ini Australia nanga den Solomon-èilanti. Now mi granpapa di abi pikinmoro 80 yari e dini ete leki gemeente owruman èn a e yepi fu bow Kownukondre zaal na ini West-Australia.

MI E WARDERI A GUDU DI MI KISI

Mi papa nanga mama, Geoffrey (9) nanga Janice (10) Williams, du muiti fu kweki mi (12) nanga mi sisa Katharine (11) leki Kresten. Di mi ben abi 13 yari, mi teki a bosroiti fu tron wan Kresten. Di mi ben go na wan bigi konmakandra fu Yehovah Kotoigi, John E. Barr, wan memre fu a Tiri Skin fu Yehovah Kotoigi ben gi den yonguwan a deki-ati disi: „No lasi a moro moi sani di yu abi, dati na a okasi fu kon sabi Yehovah èn fu lobi en.” A neti dati mi pramisi Yehovah taki mi o dini en. Tu yari baka dati mi bigin pionier. Na so Yehovah Kotoigi e kari sma di e gebroiki furu fu den ten fu preiki.

Now mi nanga mi frow, Chloe, e pionier na ini Tom Price, wan foto pe furu sma e wroko na ini mijn, èn di de te na a noordwest-sei fu West-Australia. Wi e wroko wan tu dei na ini a wiki fu man sorgu gi den sani di wi abi fanowdu. Mi papa, mi mama, mi sisa Katharine nanga en masra Andrew e pionier tu na ini Port Hedland, di de sowan 420 kilometer moro fara na a noordsei. Mi nanga mi papa e dini tu leki gemeente owruman.

Omeni hondro yari pasa, mi afo Thomas Williams bosroiti fu dini Yehovah Gado. Den tra afo fu mi teki na eksempre fu en èn te fu kaba misrefi kon abi a srefi bribi di a ben abi. Mi breiti trutru taki a famiri fu mi gi mi a gudu disi.

^ paragraaf 5 A nomru e sori yu pe a sma disi de na tapu den fowtow di e kon now.

^ paragraaf 6 Fosi sma ben e kari na èilanti disi Lakemba-èilanti. Na èilanti disi na wan fu den Lau-èilanti di de na a owstusei fu Fidyi.

^ paragraaf 10 Zendeling John Hunt, vertaal a moro bigi pisi fu a Nyun Testamenti na ini Fidyitongo, di kon na doro na ini 1847. Wan moi sani fu a vertaling disi, na taki a abi a nen fu Gado „Jiova,” na Markus 12:36, Lukas 20:42, nanga Tori fu den apostel 2:34.

^ paragraaf 16 Luku tra prenspari sani „1914—Wan prenspari yari na ini Bijbel profeititori” na ini a buku San Bijbel e leri wi trutru? di Yehovah Kotoigi tyari kon na doro èn di de fu feni tu na www.jw.org/srn.