Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  mei 2015

Yu ben sabi a sani disi?

Yu ben sabi a sani disi?

Den sani di sabiman feni e horibaka gi san skrifi na ini Bijbel?

Kownu Sargon II, fu Asiria di kari na Yesaya 20:1

Wan artikel di ben kon na ini wan tijdschrift e taki dati sabiman feni buweisi di e sori taki „sowan 50” sma di kari na ini den Hebrew Buku fu Bijbel, ben libi trutru (Biblical Archaeology Review). Sowan 14 fu den ben de kownu fu Yuda nanga Israel. Den feni buweisi fu David nanga Heskia di kari furu na ini Bijbel èn fu Menahem nanga Peka di no kari so furu. Den feni sosrefi buweisi fu 5 kownu fu Egepte nanga 19 kownu fu Asiria, Babilonia, Moab, Persia, nanga Siria. Ma a no a nen fu kownu wawan di kari na ini Bijbel, sabiman feni. Den feni sani fu granpriester, leriman fu Wet, nanga tra heihei man tu.

Na artikel e taki dati „sabiman feni nofo buweisi” di e sori taki ala den sma disi ben libi trutru. A tru taki den Kresten Griki Buku fu Bijbel e taki tu fu tra prenspari sma di ben libi. Sabiman feni buweisi taki Herodes, Pontius Pilatus, Tiberius, Kayafas, nanga Sergiyus Paulus ben libi trutru.

O ten lew no ben de fu si moro na ini den kondre di kari na ini Bijbel?

Wan prenki fu wan lew di meki fu grati ston, fu owruten Babilon

Aladi lew no de moro na ini a kontren fu Israel, toku wi e si taki a meti disi kari sowan 150 leisi na ini Bijbel. Disi e sori taki den Bijbel skrifiman ben sabi a meti disi. Furu leisi te Bijbel e taki fu lew a e prenki wan sani, ma son leisi a e taki fu trutru lew. Fu eksempre, Bijbel e taki dati man soleki Simson, David, nanga Benaya ben kiri lew (Krutuman 14:5, 6; 1 Samuel 17:34, 35; 2 Samuel 23:20). Bijbel e taki tu fu sma di lew ben kiri.—1 Kownu 13:24; 2 Kownu 17:25.

Na ini owruten a sortu lew di ben lai na ini Asia (Panthera leo persica) ben de fu feni na ini Pikin Asia, Grikikondre, Palestina, Siria, Mesopotamia, nanga a noordwest-sei fu India. Na ogri meti disi di sma ben frede ben de fu si na tapu prenki di sma fu a Mindri Owstusei ben meki na ini owruten. Na ini Babilon fu owruten a pasi pe sma ben musu waka go na a tempel ben abi skotu. Tapu den skotu disi prenki fu lew ben de di ben meki fu moi grati ston.

Soleki fa sma e taki, dan den Kresten di ben go feti teige den Moslimsma, ben e onti lew na ini Palestina na a kaba fu a di fu 12 yarihondro. A sori leki syatu baka a yari 1300, lew no ben de moro na ini a kontren dati. Ma teleki a di fu 19 yarihondro, sma ben e si lew ete na ini Mesopotamia nanga Siria èn teleki a bigin fu a di fu 20 yarihondro den ben de ete na ini Iran nanga Irak.