Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  april 2015

 BIJBEL E KENKI SMA LIBI

Dri aksi di kenki mi libi

Dri aksi di kenki mi libi
  • A GEBORE NA INI: 1949

  • KONDRE: AMERKANKONDRE

  • MI BEN WANI KON SABI SAN MI BEN KAN DU MORO NA INI A LIBI

A LIBI FU MI FOSI:

Mi gro kon bigi na ini Ancram, wan pikin dorpu na a noordsei fu New York, na Amerkankondre. Furu sma ben e kweki meti soleki, skapu nanga kaw. Mi kan taigi yu taki a dorpu ben lai kaw moro libisma.

Wan-enkri kerki nomo ben de na ini a dorpu èn na drape mi famiri ben e go. Ala sonde mamanten, mi granpapa ben e brenki den susu fu mi, dan mi ben e go na sonde-skoro nanga wan pikin weti Bijbel di mi granmama ben gi mi. Mi nanga mi pikin brada nanga mi pikin sisa ben leri fu wroko tranga, fu lespeki den birtisma, fu yepi den, èn fu de nanga tangi gi den bun sani di wi e kisi.

Di mi kon bigi, mi froisi gowe èn mi tron wan jufrow. Mi ben abi furu aksi di ben abi fu du nanga Gado èn nanga a libi. Sonwan fu den pikin di mi ben e gi leri na skoro ben koni. Trawan no ben koni so, ma den ben e wroko tranga. Sonwan fu den ben malengri pikinso, aladi trawan ben gosontu. Mi ben feni taki a libi no prati nanga leti. Son leisi den papa nanga mama fu den pikin di no ben man du so furu leki den tra pikin, ben e taki: „Na so Gado wani taki a pikin fu mi musu de.” Mi ben e aksi misrefi fu san ede Gado e meki son beibi gebore nanga wan siki. Fu taki en leti, a beibi no du nowan ogri.

Mi ben aksi misrefi tu sortu bun sani mi kan du nanga mi libi. A gersi leki a ten ben e pasa esi-esi. Mi ben gro kon bigi na ini wan bun osofamiri, mi go na wan bun skoro, èn now mi e du wan wroko di mi lobi. Den sani di mi ben kan du ete na ini a libi na fu trow, bow wan moi oso, kisi wan tu pikin èn wroko teleki mi go nanga pensyun èn baka dati go tan na wan presi pe den e sorgu owru sma. Mi ben e aksi misrefi efu dati na ala san mi kan du na ini a libi.

A FASI FA BIJBEL KENKI MI LIBI:

Wan leisi mi nanga wan tu tra jufrow go koiri na Europa. Wi go na Westminster Abbey, Notre-Dame de Paris, a Vatikaan, nanga wan tu  pikin kerki. Ala presi pe mi ben e go mi ben e poti den aksi fu mi. Di mi drai go baka na oso na Sloatsburg, New York, mi go na wan tu kerki. Ma nowan fu den ben man piki den aksi fu mi bun.

Wan dei wan pikin meisje na skoro di ben abi 12 yari, kon na mi èn a poti dri aksi gi mi. A aksi mi fosi efu mi sabi taki en na wan Yehovah Kotoigi. Mi taki, iya. Baka dati, a aksi mi efu mi wani sabi moro fu Yehovah Kotoigi. Ne mi piki baka, iya. Ne a aksi mi pe mi e libi. Di mi taigi en pe mi e tan, dan wi kon si taki a e tan leti baka na uku pe mi e tan. Noiti mi ben sabi taki den dri aksi fu a pikin meisje disi ben o kenki mi heri libi.

Syatu baka dati, a rèi en baisigri kon na mi oso èn a bigin studeri Bijbel nanga mi. Mi ben aksi en den srefi sani di mi ben aksi den domri. A sori mi den piki na ini mi eigi Bijbel. Noiti ete wan sma ben piki den aksi fu mi so bun.

Den sani di mi ben e leri fu Bijbel ben meki mi firi koloku trutru. A ben naki mi ati di mi leisi 1 Yohanes 5:19, pe skrifi: „Heri grontapu de na ini a makti fu na ogriwan.” Mi ben breiti di mi leri taki a no Gado, ma na Satan e meki taki libisma e pina, èn taki Gado o tyari wan kenki kon na ini a situwâsi disi (Openbaring 21:3, 4). Mi kon si taki Bijbel abi bun piki efu wan sma e yepi yu fu feni den. Awinsi a Kotoigi di ben e studeri nanga mi ben abi 12 yari nomo, toku mi ben feni taki san tru, e tan tru, a no abi trobi suma e taki en.

Toku mi ben wani si efu den Kotoigi e du san den e preiki. Fu eksempre, a meisje taki dati tru Kresten e sori fasi soleki pasensi nanga switifasi (Galasiasma 5:22, 23). Mi ben wani si efu ensrefi ben e sori den fasi disi. Wan dei, fu espresi mi doro lati fu studeri. Mi ben wani luku efu a ben o tan wakti mi. Mi ben wani si tu efu a ben o ati bron taki mi kon lati. Di mi rèi kon doro, mi si a meisje e sidon wakti na fesi mi oso. Ne a lon kon na a wagi èn a taigi mi: „Net mi ben wani go na oso fu meki mi mama bel ati-oso nanga skowtu fu luku efu ala sani e go bun nanga yu, bika noiti yu lati gi a studie. Mi ben e prakseri san pasa nanga yu!”

Wan tra leisi mi poti wan aksi gi en di mi ben sabi taki ben o muilek gi wan meisje fu 12 yari. Mi ben wani luku efu a ben o kon nanga en eigi piki. Di mi poti na aksi gi en, a luku mi seryusu èn a taki: „Dati na wan muilek aksi. Mi o skrifi en, dan mi o aksi mi mama noso mi papa san na a piki.” Mi kan taigi yu taki a tra leisi di a kon fu studeri nanga mi a tyari wan Waktitoren di ben e piki a aksi fu mi. A sani disi meki taki mi kon lobi den Kotoigi. Den buku fu den abi piki tapu ala aksi fu Bijbel. Mi tan studeri Bijbel nanga a meisje, èn wán yari baka dati mi dopu leki wan Yehovah Kotoigi. *

DEN WINI DI MI KISI:

Di mi kisi bun piki tapu den aksi fu mi, dan mi ben wani fruteri trawan den sani dati tu (Mateyus 12:35). Na a bigin mi famiri ben e gens a bribi fu mi. Ma baka wan pisi ten den no ben e du dati moro. Fosi mi mama dede a ben bigin studeri Bijbel. Aladi a dede fosi a ben man teki dopu, toku mi de seiker taki a ben teki a bosroiti fu dini Yehovah.

Na ini 1978, mi trow nanga wan Kotoigi di nen Elias Kazan. Na ini 1981, mi nanga Elias kisi a kari fu go wroko na Betel na Amerkankondre. * Ma a sari taki baka di wi wroko drape fo yari, Elias kon dede. Aladi mi no ben abi masra moro, toku mi tan wroko na Betel, èn a sani disi yepi mi fu tan horidoro èn fu no sari tumusi.

Na ini 2006, mi trow nanga Richard Eldred, wan brada di e wroko na Betel tu. Mi nanga Richard e prisiri fu wroko makandra na Betel. Di mi kon leri sabi Gado trutru, dan mi feni piki tapu den aksi fu mi. Ma boiti dati, mi kon sabi san mi musu du nanga mi libi. Mi kon sabi ala den sani disi, fu di wan yongu meisje ben poti dri aksi gi mi.

^ paragraaf 16 A meisje disi nanga den brada nanga sisa fu en, yepi feifi fu den sma di ben e gi den leri na skoro fu studeri Bijbel èn fu dini Yehovah.

^ paragraaf 18 „Betel” wani taki „Oso fu Gado”. Na so Yehovah Kotoigi e kari den bijkantoro fu den di de na heri grontapu (Genesis 28:17, 19). Sma di e wroko na Betel e du difrenti sani fu horibaka gi a wroko di Yehovah Kotoigi e du fu gi sma leri.