Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  maart 2015

 TORI FU A KAFTI | FU SAN YESUS E FRULUSU WI?

Fu san ede wi musu kisi frulusu?

Fu san ede wi musu kisi frulusu?

„Libisma di wan umasma meki, e libi syatu èn a lai problema. A e opo kon leki wan bromki, ma dan wan sma e koti en puru. A de leki wan skaduw di e gowe esi-esi èn di no de fu si moro.”Yob 14:1, 2.

Sensi di libisma de, den e prakseri fa a libi ben o switi efu den ben man libi fu têgo sondro fu kon owru èn siki. Ma a sari taki libisma e dede. Te nanga now, wi e si taki den wortu na a bigin fu na artikel, di Yob taki moro leki dri dusun yari pasa, tru.

Na heri grontapu sma e angri fu libi fu têgo. Bijbel e taki dati Gado poti a firi na ini wi ati fu libi fu têgo èn wi man prakseri fa a ben o de fu libi fu têgo (Preikiman 3:11). Yu denki taki wan Gado di abi lobi ben o poti a firi dati na ini wi ati aladi a sabi taki noiti wi o man libi so langa? Efu yu e piki nôno, dan yu abi leti. Gado Wortu e kari dede wan feanti èn a e pramisi taki a feanti disi „o puru na pasi”.1 Korentesma 15:26.

A no de fu taki dati dede na wan feanti. Nowan sma nanga bunbun frustan ben o wani dede. Te wan ogri de fu miti wi, dan wi e kibri, noso wi e lon gowe. Te wi siki, wi e du muiti fu kon betre. Wi e du ala san wi man fu wai pasi gi iniwan sani di kan meki taki wi lasi libi.

Ma wi kan bribi taki wan ten o kon pe a feanti disi no o de moro? Iya, wi kan bribi dati. Yehovah, a Gado di meki ala sani no meki libisma fu libi wan tu yari nomo èn fu dede bakaten. A no dati Gado ben abi na prakseri na a bigin. A ben wani taki libisma ben musu libi fu têgo na grontapu, èn san a wani na dati e pasa tu.Yesaya 55:11.

We, dan fa dede o kon na wan kaba? Sensi na ini owruten libisma meki muiti fu tyari wan kaba kon na dede, ma den no ben man du dati. Na ini a ten disi, den e tan meki muiti ete fu puru dede. Datra meki als sortu dresi fu yepi siki sma èn fu sorgu taki sma no siki. Den ondrosuku finifini fa a skin fu libisma meki. Na ini furu kondre sma e libi moro langa leki san den ben e libi fosi. Ma te nanga a dei fu tide, dede de ete. Bijbel e taki dati wi „alamala e drai go baka na doti”.Preikiman 3:20.

Ma a bun nyunsu na taki wi no abi fu frutrow tapu libisma fu lusu a problema disi. Yehovah Gado seti sani kaba fu frulusu wi fu dede èn a sma di a gebroiki fu du dati na Yesus Krestes.