Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  maart 2015

Kado di fiti fu gi wan kownu

Kado di fiti fu gi wan kownu

’Wan tu lukuman di ben de fu Owstusei èn di ben e ondrosuku den stari fu sabi san o pasa, puru den gudu fu den kon na doro èn den gi a pikin kado, soleki gowtu, nanga switismeri sani soleki wierook nanga mirre.’Mateyus 2:1, 11.

SORTU kado yu ben o gi wan sma di prenspari gi yu? Na ini Bijbel ten son switismeri sani ben diri leki gowtu. Den ben warti so te, taki sma ben e si den leki kado di fiti fu gi wan kownu. Dati meki tu fu den kado di den lukuman ben gi a „kownu fu den Dyu”, ben de switismeri sani.Mateyus 2:1, 2, 11.

Balsem-oli

Bijbel e taki tu taki di na umakownu fu Skeba ben go luku Salomo, a gi en „fo dusun wán hondro nanga fo kilo gowtu, bun furu balsem-oli, nanga diriston. Noiti moro wan sma gi Kownu Salomo so furu balsem-oli leki san na umakownu fu Skeiba gi en” (2 Kroniki 9:9). * Tra kownu ben seni balsem-oli gi Salomo tu fu sori en taki den ben wani taki sani waka bun nanga en.2 Kroniki 9:23, 24.

Fu san ede switismeri sani ben diri so na ini Bijbel ten? Fu di sma ben e du difrenti sani nanga den. Den ben e gebroiki den gi den skin, na ini na anbegi èn te den ben e beri sma. (Luku a faki „ A fasi fa sma ben e gebroiki switismeri sani na ini Bijbel ten”.) Boiti taki furu sma ben lobi gebroiki den sani disi, den ben diri tu fu di sma ben e meki furu kostu fu seni teki den.

SMA BEN MUSU ABRA NA ARABIA-SABANA

Kasia

Na ini Bijbel ten son switismeri-wiwiri ben e gro na Yordan-lagipresi. Ma den wan di no ben e gro drape, sma ben e seni teki. Bijbel e taki fu difrenti switismeri sani. Wan tu fu den di kari furu na safraan, aluwe, balsem-oli, kaneri, wierook, nanga mirre. Boiti den sani disi, Bijbel e taki tu fu switismeri spesrei di sma ben e gebroiki na ini nyanyan. Dati na sani soleki dyira, menti-wiwiri, nanga dille-wiwiri.

Pe sma ben e feni den switismeri sani disi? Aluwe, kasia, nanga kaneri den ben e feni na ini kondre di sma sabi now leki China, India, nanga Sri Lanka. Switismeri sani soleki mirre nanga wierook sma ben e feni na ini bon nanga prani di ben e gro na den sabana fu Zuid Arabia te go miti Somalia na ini Afrika. Nardus-wiwiri nanga tra sortu switismeri-wiwiri sma ben e feni soso na ini India na den Himalaya-bergi.

Safraan

Fu man tyari switismeri sani go na ini Israel, sma ben musu abra a kontren fu Arabia. Disi na wan fu den sani di meki taki na ini a pisi ten fu a yari 2000 te go miti 1000 Fosi Krestes, Arabia kon tron „a moro prenspari bisnis kondre di ben e tyari sani go seri na den owstusei kondre nanga den west-sei kondre”, na so wan buku e taki (The Book of Spices). Na a Negeb-sabana na a zuidsei fu Israel, sabiman feni owruten foto, fortresi, nanga presi pe bisnisman ben e stop so taki den kameili fu den ben kan dringi watra. Den sani disi e sori sortu pasi  bisnisman ben e teki fu go seri switismeri sani. Den foto nanga den presi disi e sori tu taki „den bisnisman di ben e komoto fu Zuid Arabia go na a Mindrikondre Se . . . ben e meki furu moni”, na so wan raportu e taki (World Heritage Centre of UNESCO).

„Switismeri sani ben e seri bun fu di sma ben e pai furu moni gi wan pikin ipi, èn furu sma ben wani bai den.”—The Book of Spices

Nofo tron den bisnisman di ben e tyari den switismeri sani disi go seri ben musu teki waka sowan 1800 kilometer pasa Arabia (Yob 6:19). Bijbel e taki fu wan grupu Ismaelsma di ben komoto fu Gilead go na Egepte. Den ben lai den kameili fu den nanga „ladanum-tara, balsem-oli èn bonbuba di e puru tara” (Genesis 37:25). Den manpikin fu Yakob ben seri den brada Yosef leki srafu gi den bisnisman disi.

’TRA KONDRE NO BEN SABI PE DEN SWITISMERI SANI BEN E KOMOTO’

Dille-wiwiri

Omeni hondro yari langa, a ben de so taki moro furu na den bisnisman fu Arabia ben e du bisnis na ini switismeri sani. Na den wawan ben e seri sani soleki, kasia nanga kaneri, di ben e komoto fu Asia. Fu di den no ben wani meki den kondre na a Mindrikondre Se bigin du bisnis nanga den Owstusei kondre, meki den panya ala sortu lei tori fu meki sma bribi taki a muilek fu feni den switismeri sani disi. Dati meki „wan heri pisi ten, den tra kondre no ben sabi pe den switismeri sani disi ben e komoto”, na so a buku e taki (The Book of Spices).

Dyira

Sortu tori den Arabiasma ben e fruteri? Herodotus, wan Griki historiaman fu a di fu feifi yarihondro Fosi Krestes skrifi fu wan tu fu den tori disi. A e taki fu bigi ogri fowru di ben e meki nesi fu a buba fu a kaneri-bon na tapu bergi pe sma no man go. A skrifi moro fara taki fu man feni a kaneri-buba, dan sma ben e poti bigi pisi meti na a futu fu a bergi.  Den fowru ben e teki bun furu meti tyari go na den nesi, èn a nesi ben e hebi so te taki a ben e fadon kon na gron. Dan esi-esi den ben e piki den kaneri-buba èn den ben e seri den gi bisnisman. Den sortu tori disi ben panya na ala sei. Sobun, fu di den ben „meki sma bribi taki a muilek kefalek fu feni kaneri, meki den ben e seri en so diri,” na so a buku e taki (The Book of Spices).

Menti-wiwiri

Ma baka ten sma kon sabi pe den Arabiasma ben e feni den switismeri sani disi èn tra kondre bigin du a bisnis disi tu. Sowan 100 yari Fosi Krestes, Aleksandria, wan foto na ini Egepte, tron a moro prenspari foto di ben e du bisnis na ini switismeri sani. Sipi fu Rome bigin seiri fu Egepte go na India, baka di den sipiman kon sabi fa den musu abra na Indis Se na a pisi ten fu a yari te furu winti e wai. A sani disi meki taki switismeri sani no ben diri so moro, fu di furu sma ben bigin seri den.

Na ini a ten disi switismeri sani no diri leki gowtu. Noiti wi ben o si den sani disi leki wan kado di fiti fu gi wan kownu. Toku na heri grontapu, milyunmilyun sma e gebroiki switismeri sani na ini parfum nanga dresi. Den e gebroiki den tu fu meki den nyanyan kon switi. Sobun, neleki fa sma ben lobi switismeri sani dusundusun yari pasa, na so sma lobi den tu na ini a ten disi.

Kaneri

^ paragraaf 4 Na ini Bijbel, balsem-oli na wan oli noso tara di e smeri switi èn di sma ben e puru fu bon.

Kon sabi moro

SAN NA A BOSKOPU FU BIJBEL?

Den Israelsma e aksi fu kisi wan kownu

Di den Israelsma aksi fu kisi wan kownu, Yehovah teki Saul leki kownu. Fu san ede Yehovah poti David leki kownu na presi fu Kownu Saul?