Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  maart 2015

 LEISIMAN E AKSI . . .

Pasen na trutru wan Kresten fesa?

Pasen na trutru wan Kresten fesa?

Wan buku e taki: „Pasen na a moro prenspari fesa di a Kresten kerki e hori fu memre na opobaka fu Yesus Krestes” (Encyclopædia Britannica). Ma Pasen na trutru wan Kresten fesa?

Efu wi wani sabi efu wan tori tru, dan wi musu ondrosuku en finifini. Na so a de tu nanga Pasen. Efu wi wani sabi efu a fesa disi na wan Kresten fesa, dan wi musu ondrosuku den sani di sma e du te den e hori a fesa disi.

A fosi sani na taki Yesus no aksi den bakaman fu en fu memre na opobaka fu en, ma a aksi den fu memre a dede fu en. Na apostel Paulus ben kari a fesa disi „a neti-nyanyan fu Masra”.1 Korentesma 11:20; Lukas 22:19, 20.

Boiti dati, furu fu den sani di sma e du te den e hori Pasen „no abi noti fu du nanga na opobaka fu Yesus, ma na gwenti fu sma di ben e anbegi falsi gado” na so a buku e taki moro fara. Fu eksempre na ini furu kondre sma e gebroiki eksi nanga konikoni te den e hori Pasen.

Philippe Walter, wan leriman di e skrifi buku fu sani di pasa na ini owruten e taki pe a gwenti fu gebroiki eksi nanga konikoni komoto. A skrifi taki „den Kresten kerki ben wani meki sma di e anbegi falsi gado, teki a Kresten bribi”. Sobun, den meki a gersi leki a fesa di den sma disi ben e hori fu di ben breiti taki „a moro kowru pisi ten fu a yari kaba èn a waran pisi ten ben e bigin”, na a srefi leki na opobaka fu Yesus. Walter skrifi moro fara taki a sani ben meki en makriki gi den sma disi fu „si den Kresten fesa leki fesa di den kan hori” èn disi meki taki furu sma di ben e anbegi falsi gado tron Kresten.

Di den apostel ben de na libi ete, a sani disi no ben pasa fu di den ben sorgu taki a tru bribi no moksi nanga falsi bribi (2 Tesalonikasma 2:7). Na apostel Paulus ben warskow taki ’te a gowe, sma na den mindri ben o taki sani di no tru, fu hari den disipel kon na den baka’ (Tori fu den apostel 20:29, 30). Na a pisi ten fu a yari 98 na apostel Yohanes ben taki dati sma ben bigin kori wan tu Kresten kaba (1 Yohanes 2:18, 26). Na so den Kresten bigin teki den gwenti abra fu sma di ben e anbegi falsi gado.

„No kon de wán nanga sma di no de na bribi.”2 Korentesma 6:14

Kande son sma e denki taki a no de wan fowtu sani fu teki sonwan fu den gwenti di abi fu du nanga Pasen. Den feni taki na so wan fasi sma di ben e anbegi falsi gado ben kan kon frustan san na opobaka fu Yesus wani taki. Ma noiti Paulus ben o denki so. Di a ben e go preiki na ini den difrenti kondre di Rome ben e tiri, dan a no teki nowan fu den gwenti fu sma di ben anbegi falsi gado, soso fu man yepi den sma disi fu poti bribi na ini Yesus. Na presi fu dati a ben warskow den Kresten: „No kon de wán nanga sma di no de na bribi. Bika san retidu abi fu du nanga kruktudu? Noso san leti abi fu du nanga dungru? ’Fu dati ede, komoto na den mindri èn prati nanga den’, na so Yehovah taki. ’No fasi den sani moro di no krin.’”2 Korentesma 6:14, 17.

San wi kon si now di wi luku a fesa disi finifini? Wi kon si krin taki Pasen a no wan fesa di Kresten kan hori.

Kon sabi moro

A WAKTITOREN

Na opobaka fu Yesus o meki taki sma kisi têgo libi!

Denki a tori: têgo libi sondro pen, sondro pina, sondro sari.