Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  maart 2015

 ONDROFENITORI

Jairo e dini Gado nanga en ai

Jairo e dini Gado nanga en ai

Kon meki wi taki dati noti fu yu skin e wroko, soso yu ai. Fa yu ben o feni en? Na a bigi problema dati mi brada Jairo abi. Toku a de koloku. Fosi mi fruteri san gi en howpu na ini a libi, mi o fruteri yu a tori fu en.

Jairo gebore nanga wan siki di den e kari Spastische quadriplegie. * A siki disi meki taki furu sani fu en skin no e wroko. Un edetonton musu seni boskopu gi wi anu nanga futu, ma disi no e pasa na Jairo èn dati meki en anu nanga futu e sekiseki èn den e drai go pe den wani. Son leisi Jairo e gi ensrefi mankeri te dati e pasa. Efu sma de na ini en birti, a kan naki noso skopu den efu den no luku bun. A sari son leisi taki wi musu tai en anu nanga en futu so taki en nanga tra sma no kisi mankeri.

A GRO KON BIGI NANGA SKIN-ATI

Jairo ben e kisi furu skin-ati di a ben e gro kon bigi. Di a ben abi dri mun, a bigin kisi stoipi di ben e meki taki a e kon steifi èn a no ben sabi notinoti. Furu leisi, mi mama ben e grabu en hori, lon tyari en go na ati-oso, fu di a ben denki taki a dede.

Fu di ibri tron baka a ben e kisi stoipi, meki den bonyo fu en ben e kon steifi èn den no ben e gro bun moro. Di a ben abi 16 yari en dyonku komoto na ini en komki, èn a ben musu du wan bigi oparâsi na en bowtu, en seibere nanga en dyonku. Mi kan memre ete fa Jairo ben e krei fu skin-ati ibri neti baka na oparâsi fu en.

A hebi siki fu Jairo e meki taki sma musu yepi en nanga ala sani. Sma musu yepi en fu nyan, fu weri krosi, èn fu go didon. Moro furu na mi papa nanga mi mama e yepi en. Aladi Jairo abi yepi fanowdu ala ten, toku mi papa nanga mi mama e memre en taki a no libisma wawan a abi fanowdu ma a abi Gado fanowdu tu.

WI FENI WAN FASI FU TAKI NANGA EN

Un papa nanga mama na Yehovah Kotoigi èn sensi di Jairo ben de wan beibi den ben e leisi Bijbel tori gi en. Den sabi taki wan sma o de moro koloku te a de wan mati fu Gado. Aladi Jairo abi wan swaki skin di e sekiseki furu, toku a kan abi wan moi howpu gi a ten di e kon. Ma mi mama nanga mi papa ben e aksi densrefi efu Jairo o man frustan den leri fu Bijbel.

Wán dei di Jairo ben moro pikin, mi papa aksi en: „Jairo mi e begi yu, taki nanga mi. Efu yu lobi mi, yu o taki nanga mi.” Jairo ai bigin lon watra di mi papa begi en fu taki nanga en. A ben e  pruberi fu taki wan sani, ma a no ben man, a ben e meki soso babari nanga en gorogoro. Mi papa ben sari fu di a ben meki Jairo krei. A sani disi ben sori taki Jairo ben frustan san mi papa ben taki, ma na man a no ben man taki.

Te fu kaba, mi papa nanga mama kon si taki te Jairo ben wani taki wan sani, noso te a ben wani sori fa a ben e firi, dan a ben buweigi en ai esi-esi. Jairo ben e fuga taki sma no ben man frustan en ala ten. Ma di mi papa nanga mama leri fu kon sabi san a ben wani sori den nanga en ai èn te den ben gi en san a wani, dan Jairo ben e lafu. Na so a ben e taigi den tangi.

Wan datra di e yepi sma fu taki, ben taigi un taki fu man taki moro bun nanga Jairo, dan un musu opo ala tu anu na loktu te un wani taki a piki iya, noso nôno. A reti-anu wani taki, iya èn a kruktu-anu wani taki, nôno. Sobun, te un ben si sortu anu a ben e luku, dan un ben sabi san a ben wani.

WAN PRENSPARI SANI E PASA NA INI A LIBI FU JAIRO

Dri leisi na ini wan yari, Yehovah Kotoigi e hori bigi konmakandra nanga kongres pe Bijbel-lezing e hori gi furu sma. Ala ten Jairo ben e prisiri te a lezing ben e hori gi den sma di o dopu. Wan leisi di Jairo ben abi 16 yari, mi papa aksi en: „Jairo, yu wani dopu?” Wantewante a luku mi papa reti-anu, èn dati ben sori taki a wani dopu. Ne mi papa aksi en: „Yu pramisi Gado na ini begi taki yu o dini en yu heri libi langa?” Jairo luku mi papa en reti-anu baka. A ben de krin taki Jairo ben pramisi Yehovah taki a o dini en.

Baka wan tu Bijbel takimakandra nanga Jairo, a ben de krin taki a ben frustan san a wani taki fu teki dopu leki wan Kresten. Dati meki na ini 2004, a piki a moro prenspari aksi na ini en libi: „Yu gi yusrefi abra na Yehovah fu du a wani fu en?” Jairo opo en ai go na loktu fu piki na aksi disi. Na so den ben taigi en taki a ben kan piki, iya. Sobun, di a ben abi 17 yari, a teki dopu leki wan Yehovah Kotoigi.

EN AI E YEPI EN FU DU A WANI FU GADO

Na ini 2011, wi feni wan nyun fasi fu taki nanga Jairo. Dati na wan computer di e wroko nanga yu ai. Te Jairo e luku wan sani tapu a computer, dan a computer e opo a sani di a e luku, neleki te yu ben o opo wan programa tapu wan  computer. Wan tu prenki de tapu a computer disi di e yepi Jairo fu taki nanga wi. Yu kan skrifi wan boskopu na den prenki disi, èn te a luku a prenki pe a boskopu skrifi, dan a computer e taki a boskopu.

O moro Jairo ben e kon frustan san Bijbel e leri, o moro a ben e angri fu yepi sma fu kon leri sabi Gado. Ibri wiki te wi osofamiri ben e studeri Bijbel, dan ibri leisi a e luku mi dan a e luku en computer. Na so a ben e memre mi taki mi no musu frigiti fu skrifi gi en san a kan piki te aksi e poti tapu den Kresten konmakandra fu wi.

Te a de na den konmakandra, èn a wani gi piki, dan a e luku tapu a prenki di abi a yoisti boskopu, dan a computer e taki a boskopu so taki ala sma kan yere. Ibri leisi te a gi wan piki, dan a e lafu fu di a gi a gemeente deki-ati. Alex, wan fu den pikin mati fu Jairo e taki: „Mi e firi bun te mi e yere Jairo e gi piki tapu wan aksi fu Bijbel.”

Jairo e gebroiki en computer di e wroko nanga en ai, fu gi piki di e tranga a bribi fu trawan

Jairo e gebroiki en ai tu fu fruteri tra sma san a e bribi. Wan fasi fa a e du dati, na te a e luku wan prenki fu a paradijs tapu en computer. Te a du dati, dan a computer e taki a boskopu disi: „A howpu di Bijbel e gi, na taki a grontapu o tron wan paradijs pe siki nanga dede no o de moro, Openbaring 21:4.” Efu a sma wani sabi moro, dan a e luku wan tra prenki di abi a boskopu disi: „Yu wani studeri Bijbel nanga mi?” A moi fu si taki mi granpapa ben wani studeri nanga en. San moro moi, na taki safrisafri Jairo nanga wan tra Kotoigi e studeri Bijbel nanga mi granpapa. Wi breiti taki ini augustus 2014, mi granpapa teki dopu na a kongres na ini Madrid.

Srefi den leriman na a skoro pe Jairo e go, e si taki a lobi Gado trutru. Rosario, wan fu den sma disi di e leri en taki, e fruteri: „Efu oiti mi musu go na wan kerki, dan na den Yehovah Kotoigi mi o go. Mi si taki a bribi fu Jairo e meki taki a de koloku na ini a libi, aladi a abi so wan hebi siki.”

Mi kan si na Jairo ai taki a e breiti te mi e leisi a pramisi disi na ini Bijbel gi en: „Lan sma o kren leki dia na tapu den bergi. A tongo fu den babaw-wan o bari fu prisiri” (Yesaya 35:6). Aladi Jairo e sari son leisi, toku nofo tron a e prisiri, fu di a e du a wani fu Gado èn fu di a lai mati na ini a gemeente. Te yu e luku fa a de nanga prisiri ala ten èn fa a bribi fu en tranga, dan dati e sori taki te yu e dini Yehovah yu kan de koloku awinsi sortu problema yu abi.

^ paragraaf 5 Spastische verlamming na te na edetonton abi wan problema di e meki taki a skin no man wroko bun. A kan meki taki a sma kisi stoipi, a no man nyan, èn a no man taki. Spastische quadriplegie na a moro hebiwan fu a siki disi. A kan meki taki den anu nanga den futu e steifi èn a neki e anga.