Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2015

 TORI FU A KAFTI | FA YU KAN DU YU WROKO NANGA PRISIRI?

Tranga wroko—Na fu a ten disi?

Tranga wroko—Na fu a ten disi?

Alex e soktu te a e opo wan tra dosu poti na ini a truck fu a bedrijf pe a e wroko. A e aksi ensrefi: ’O langa mi musu tan du a wroko disi di no e tyari mi go na fesi? O ten mi o meki furu moni? A libi ben o moro switi gi mi efu mi no ben abi fu du a wroko disi!’

Neleki Alex, furu sma na ini a ten disi no lobi wroko tranga. „Furu sma feni taki son wroko lagi tumusi gi den fu du”, na so Aaron, wan man di e meki wagi, e taki. „Den sma disi e denki: ’Solanga mi feni wan moro bun wroko, mi e tapu nanga a wroko disi.’”

Fu san ede furu sma feni taki tranga wroko a no gi den? Kande den sani di den e si tapu telefisi abi krakti na den tapu. Nofo tron den sani dati e gi sma a denki taki te den abi furu gudu èn wan switi libi, dan dati na a libi. „Sma e denki taki o moro yu abi fu wroko tranga fu sorgu yusrefi, o moro yu no o man go na fesi”, na so Matthew di e ondrow wan gebow, e taki. Shane di e krin wan gebow e taki so wan sani tu. A e taki: „Sma no wani wroko moro gi a moni di den e kisi wan dei.”

Ma na a tra sei, furu sma di abi en bun e prisiri fu wroko tranga. „Mi feni taki tranga wroko e tyari wini kon, spesrutu te a de gi wan bun sani”, na so Daniel e taki, wan man di abi 25 yari èn di e du bow-wroko. Andre di abi 23 yari, e taki tu: „Mi feni taki wroko e meki yu de koloku èn a e gi prisiri. Sma di no lobi wroko no o de koloku, ma den libi o soi!”

Fa a du kon taki sma leki Daniel nanga Andre e si tranga wroko leki wan bun sani? We, na fu di den du san Bijbel e leri. Bijbel no e leri taki tranga wroko no bun, ma a e gi wi deki-ati fu tan wroko tranga. Ma boiti taki Bijbel e taigi wi taki wi musu wroko, a e sori wi tu fa wi kan du wi wroko nanga prisiri.

Sortu Bijbel rai kan yepi yu fu du yu wroko nanga prisiri? We, meki wi go luku wan tu fu den rai disi na ini na artikel di e kon.