Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2015

 BIJBEL E KENKI SMA LIBI

Mi ben lobi den krin piki di Bijbel e gi

Mi ben lobi den krin piki di Bijbel e gi
  • A GEBORE NA INI: 1948

  • KONDRE: HONGARIA

  • MI BEN E ANGRI FU KISI PIKI TAPU DEN PRENSPARI AKSI FU A LIBI

A LIBI FU MI FOSI:

Mi gebore na ini Hongaria, na ini a foto Székesfehérvár pe furu sani pasa na ini den 1000 yari di pasa. A sari taki te nanga now mi e memre den ogri-ati sani di ben pasa drape na a ten fu a Di Fu Tu Grontapufeti.

Mi granpapa nanga mi granmama kweki mi leki pikin boi. Mi ben lobi den srefisrefi, spesrutu mi granmama Elisabeth. A yepi mi fu kon abi wan tranga bribi na ini Gado. Sensi mi ben abi dri yari, a ben gwenti begi a Wi Tata begi nanga mi ibri neti. Ma na di mi pasa 25 yari, dan fosi mi kon frustan san a begi dati wani taki.

Mi granpapa nanga mi granmama ben e sorgu mi, fu di mi papa nanga mama ben e wroko dei nanga neti. Den ben wani abi nofo moni fu man bai wan bun oso. Ma tu satra na ini wan mun, a heri famiri ben e kon nyan nanga makandra. Mi ben lobi den ten dati.

Na ini 1958, a dren fu mi papa nanga mama kon tru. Den ben man bai wan oso pe wi ala dri ben man libi. Now fosi mi ben o libi nanga mi papa nanga mama. Mi ben breiti srefisrefi! Ma siksi mun baka dati, wan sari sani miti mi. Mi papa dede fu kanker.

A sani dati meki mi brokosaka. Mi sabi ete fa mi ben e begi Gado: „Gado, mi begi yu fu kibri mi papa. Mi abi en fanowdu. Fu san ede yu no piki den begi fu mi?” Mi ben e angri fu kon sabi pe mi papa ben de. Mi ben e aksi misrefi: ’A go na hemel? Noso mi no o si en noiti moro?’ Mi ben e dyarusu tapu den pikin di ben abi den papa ete.

Furu yari langa, mi ben e go na beripe ibri dei. Mi ben e kindi na mi papa grebi èn mi ben e begi: „Gado mi e begi yu, mi wani sabi pe mi papa de.” Mi ben e begi en tu fu yepi mi fu kon frustan fu san ede wi de na libi.

Di mi ben abi 13 yari, dan mi bosroiti fu leri Doisritongo. Fu di furu Doisritongo buku ben de, meki mi ben denki taki mi ben o feni piki tapu den aksi fu mi. Na ini 1967,  mi bigin studeri na ini a foto Jena, di ben de wan pisi fu Owstu Doisrikondre na a ten dati. Mi ben lobi leisi den buku fu Doisri filosofiaman, spesrutu den wan di ben e sori fu san ede libisma de na grontapu. Aladi mi kon sabi wan tu moi sani, toku mi ati no ben sidon. Mi tan begi Gado fu yepi mi fu feni piki tapu den aksi fu mi.

A FASI FA BIJBEL KENKI MI LIBI:

Na ini 1970, mi drai go baka na Hongaria pe mi miti Rose, a frow di ben o tron mi wefi. Na a ten dati, Hongaria ben de wan komunist kondre. Syatu baka di wi trow, mi nanga Rose lowe go na Oostenrijk. Wi ben wani go tan na Sydney, na ini Australia, pe mi omu ben e libi.

Te fu kaba, mi feni wroko na ini Oostenrijk. Wan dei, wan sma na mi wrokope taigi mi taki Bijbel ben kan piki ala den aksi fu mi. A gi mi wan tu buku di ben e taki fu Bijbel. Mi leisi den buku dati esi-esi èn mi ben wani kon sabi moro. Dati meki mi skrifi go na Yehovah Kotoigi, den sma di ben tyari den buku disi kon na doro, fu aksi den fu seni moro buku kon gi mi.

A dei di wi trow wán yari, wan yongu Kotoigi fu Oostenrijk kon na mi nanga Rose. A tyari den buku kon di mi ben seni aksi, èn a aksi mi efu mi ben wani studeri Bijbel. Mi ben feni dati bun. Fu di mi ben e angri fu kon sabi moro, meki wi ben e studeri tu leisi wan wiki. Ibri leisi a studie ben e teki moro leki fo yuru!

Mi ben breiti srefisrefi nanga den sani di den Kotoigi ben e leri mi fu Bijbel. Den sori mi Gado nen, Yehovah, na ini a Hongariatongo Bijbel fu mi, èn mi no ben man bribi san mi leri. Na ini den 27 yari di mi ben e go na kerki, noiti mi yere sma kari Gado nen. Mi ben lobi den krin piki di Bijbel e gi tapu den aksi fu mi. Fu eksempre, mi leri taki den dedewan no sabi notinoti, a de neleki den de na ini wan dipi sribi (Preikiman 9:5, 10; Yohanes 11:11-15). Mi leri tu taki Bijbel e pramisi taki wan nyun grontapu o kon pe „dede no o de moro” (Openbaring 21:3, 4). Mi e howpu fu si mi papa baka, bika na ini a nyun grontapu dati ’Gado sa gi sma wan opobaka’.Tori fu den apostel 24:15.

Rose ben de klariklari fu studeri Bijbel makandra nanga mi. Wi go na fesi esi-esi èn wi kaba studeri a buku na ini tu mun nomo! Wi ben e go na ibri konmakandra di den Kotoigi ben hori na ini a Kownukondre zaal. A ben naki wi ati fu si fa den Yehovah Kotoigi ben lobi makandra, fa den ben e yepi makandra, èn fa den ben de na ini wánfasi.Yohanes 13:34, 35.

Na ini 1976, mi nanga Rose kisi visum fu go na Australia. Wi suku Yehovah Kotoigi wantewante di wi doro drape. Den Kotoigi fu drape meki wi firi wantewante leki wi doro na oso. Na ini 1978, wi srefi tron Kotoigi.

DEN WINI DI MI KISI:

Te fu kaba mi kisi piki tapu den aksi di mi ben abi so langa kaba. Fu di mi kon leri sabi Yehovah Gado moro bun, meki mi feni sosrefi a moro bun Papa di mi ben kan abi (Yakobus 4:8). Boiti dati, a howpu di mi abi fu si mi papa baka na ini a nyun grontapu di o kon, prenspari srefisrefi gi mi.Yohanes 5:28, 29.

Na ini 1989, mi nanga Rose bosroiti fu drai go baka na Hongaria so taki wi ben kan fruteri wi mati, wi famiri, nanga tra sma di wi ben o miti fu a bribi fu wi. Wi kisi a grani fu studeri Bijbel nanga hondrohondro sma. Moro leki 70 fu den sma dati e dini Yehovah makandra nanga wi now, sosrefi mi lobi-ati mama.

Mi ben begi 17 yari langa fu kisi piki tapu den aksi fu mi. Na ini den 39 yari baka dati, mi tan begi èn mi e du dati teleki now. Ma now mi kan taki „Grantangi mi lobi-ati hemel Tata, taki yu piki den aksi di mi ben abi di mi ben pikin.”