Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2015

 WAN TAKIMAKANDRA NANGA WAN YEHOVAH KOTOIGI

Fu san ede wi musu ondrosuku Bijbel?

Fu san ede wi musu ondrosuku Bijbel?

A pisi tori di e kon now, na wan takimakandra di wan Kotoigi fu Yehovah ben kan abi nanga wan birtisma. Kon meki wi taki dati wan Kotoigi di nen Brian kon na a oso fu wan man di nen Eric.

BIJBEL E TAKI SOIFRI SAN PASA NA INI OWRUTEN

Eric: Mi no denki taki wi o man taki furu yèrè. Mi a no wan man di e go na kerki.

Brian: Oke, mi e frustan dati. Ma mi nen na Brian. Fa yu nen?

Eric: Eric.

Brian: Mi breiti taki mi miti yu, Eric.

Eric: Mi tu.

Brian: Ma mi wani aksi yu wan sani, yu ben e go na kerki di yu ben moro yongu?

Eric: Iya. Ma di mi gowe libi oso fu go na universiteit, dan mi no go na kerki moro.

Brian: Oke. San yu studeri na universiteit?

Eric: Mi studeri sani di abi fu du nanga a libimakandra èn sosrefi geschiedenis. Mi lobi fositen tori, yu sabi tòk, mi wani sabi san libisma du na ini owruten te kon miti now.

Brian: Son leisi den tori dati span. Yu musu fu sabi taki Bijbel na wan buku di e taki fu owruten tori. Oiti yu ondrosuku Bijbel?

Eric: No. Mi sabi taki na wan bun buku, ma noiti mi si en leki wan buku di e taki fu owruten tori.

Brian: Mi si taki yu na wan man di wani kon sabi moro. Efu yu abi pikinso ten, dan mi wani sori yu na ini Bijbel wan tu sani di pasa trutru na ini owruten.

Eric: A bun. Ma mi no abi wan Bijbel.

Brian: A no abi trobi. Yu kan luku na ini mi Bijbel. Luku a fosi sani dyaso na 1 Kroniki kapitel 29 vers 26 nanga 27. Drape skrifi: „David, a manpikin fu Isai, tiri heri Israel. Ala nanga ala David tiri leki kownu fu Israel fotenti yari langa. Na ini Hebron a tiri seibi yari èn na ini Yerusalem a tiri dritenti na dri yari.”

Eric: Fu san ede yu e taki dati a sani disi pasa trutru?

Brian: We, wan pisi ten pasa, sma di e krutu Bijbel ben feni taki Kownu David no ben libi trutru.

Eric: Tru? Fu san ede den ben taki dati?

Brian: We, boiti Bijbel, furu buweisi no ben de taki a man disi ben de trutru. Ma na ini 1993, wan tu sabiman feni wan bun owru ston pe wan sani skrifi di wani taki „Oso fu David”.

Eric: Mi no ben sabi dati.

Brian: Wan tra man na ini Bijbel di sma ben e tweifri efu a ben libi trutru, na Pontius Pilatus, wan granman di ben e tiri na ini a ten fu Yesus. Na ini Lukas kapitel 3 vers 1 a nen fu en kari, makandra nanga wan tu tra tiriman fu a ten fu dati.

Eric: Ai, a skrifi: ’Di Pontius Pilatus ben de granman fu Yudea. Herodes ben de tiriman fu Galilea.’

 Brian: Iya, omeni yari langa son sabiman ben e tweifri efu Pontius Pilatus ben de trutru. Ma 50 yari pasa, sabiman feni wan ston na a Mindri Owstusei pe a nen fu a man disi skrifi na tapu.

Eric: Ooh. Noiti mi ben yere den tori disi.

Brian: Dan mi breiti taki mi fruteri yu.

Eric: Mi no musu lei yèrè, ala ten mi ben e si Bijbel leki wan buku di e fruteri moi tori, ma noiti mi ben denki taki a de gi a ten disi. Kande a e taki fu sani di pasa trutru, ma mi no denki taki wi kan leri wan sani fu en.

BIJBEL NA WAN OWRU BUKU, MA A BUN GI A TEN FU WI

Brian: Furu sma ben o agri nanga yu. Ma mi e denki tra fasi. Yu sabi fu san ede? Sensi a bigin, teleki now, libisma abi den srefi prenspari sani fanowdu. Te nanga now libisma abi nyanyan, krosi, nanga tanpe fanowdu. Te nanga now, wi e si en leki wan prenspari sani fu taki nanga trawan èn fu abi wan koloku osofamiri. Yu no feni taki den sani dati prenspari gi wi alamala?

Eric: Iya.

Brian: Bijbel kan yepi wi nanga den tori dati. Na wan owru buku, ma a kan yepi wi ete na ini a ten disi.

Eric: Fa dan?

Brian: Meki mi taki en so: Bijbel abi prenspari leri di bun ete gi a ten disi, aladi den ben skrifi hondrohondro yari pasa.

Bijbel abi prenspari leri di bun ete gi a ten disi, aladi den ben skrifi hondrohondro yari pasa

Eric: Oke. Sortu leri?

Brian: Bijbel e leri wi fa wi musu si moni, fa wi osofamiri kan de koloku, noso fa wi kan de bun mati fu trawan. Bijbel de leki wan leti na tapu wi pasi. Yu no feni taki na ini a ten disi a muilek fu de wan bun masra noso wan bun papa?

Eric: Iya, nanga dati yu abi leti. Mi trow pikinmoro wán yari kaba, ma a no ala ten mi nanga mi frow e agri nanga makandra.

Brian: Dati kan. Ma Bijbel abi wan tu moi leri di kan yepi yu. Luku Efeisesma kapitel 5. Meki wi leisi vers 22, 23, nanga 28. Yu wani leisi den?

Eric: A bun: „Meki den wefi saka densrefi na den masra ondro neleki fa den e saka densrefi na Masra ondro, bika wan masra na a ede fu en wefi neleki fa Krestes na a ede fu a gemeente. En na wan frulusuman fu a skin disi.” Vers 28 e taki: „Na a srefi fasi den masra musu lobi den wefi leki den eigi skin. A man di lobi en wefi lobi ensrefi tu.”

Brian: Thanks. Yu no feni taki efu masra nanga wefi e du san skrifi dyaso, sani o waka bun na ini na osofamiri?

Eric: Ai, mi denki so. Ma dati makriki fu taki.

Brian: A tru, wi alamala e meki fowtu. Dati meki Bijbel e sori taki wi musu de klariklari fu fiti wisrefi. * Ibri trowpatna musu de klariklari fu du dati. Mi nanga mi frow kon si taki Bijbel e yepi wi na ini a tori disi.

Eric: Ai, mi e frustan san yu e taki.

Brian: Yehovah Kotoigi abi wan Website pe yu kan feni bun rai di kan yepi trowpatna nanga osofamiri. Efu yu abi pikinso ten, dan mi kan sori yu san yu kan feni drape.

Eric: A bun, yu kan sori mi.

Brian: Oke. A nen fu a Website na www.jw.org/srn. Luku a home page dyaso.

Eric: Mi lobi den fowtow.

Brian: Na fowtow fu a preikiwroko di wi e du na heri grontapu. Dyaso yu abi „Buku nanga tra sani”. Te yu go na Online Library, dan yu kan feni artikel di e taki fu a trowlibi. Efu yu skrifi „Fa yu kan abi wan koloku osofamiri libi” na ini a faki disi, dan yu o si artikel di e taki fu a tori dati. Yu kan luku sortuwan yu wani.

Eric: A wan disi „Fa fu lusu problema”. Dati mi wani sabi.

 Brian: Na artikel disi e taki fu fo sani di trowpatna kan du fu lusu problema. Luku a paragraaf disi. Yu wani leisi en?

Eric: A bun. „Neleki fa na ati nanga den fokofoko de fanowdu fu meki a brudu du en wroko, na so lobi nanga lespeki de fanowdu fu meki trowpatna taki bun nanga makandra.” Mi lobi fa den taki en.

Brian: Thanks taki yu leisi en. Wan Bijbeltekst skrifi dyaso. Yu kan druk na en tapu fu opo en.

Eric: Iya, mi si en. Efeisesma 5:33. „Meki ibriwan fu unu lobi en wefi leki fa a lobi ensrefi. Na a tra sei, a wefi musu abi bigi lespeki gi en masra.”

Brian: Yu no e si taki a tekst disi e sori taki ibri sma musu gi a trawan san a e fruwakti fu kisi?

Eric: No, mi no e si en ete.

Brian: We, wan masra wani firi taki en frow e lespeki en. Ma wan frow wani de seiker taki en masra lobi en trutru. A no so a de?

Eric: Iya. Na so a de.

Brian: Efu wan masra gwenti suku fasi fu sori en frow taki a lobi en, dan yu no denki taki a ben o moro makriki gi a frow fu lespeki en?

Eric: A libi ben o go iya.

Brian: Sobun, a wán tekst disi kaba di skrifi sowan 2000 yari pasa, e sori san ibri trowpatna abi fanowdu èn efu den du san skrifi, dan a o yepi den. Leki fa wi ben si, a trowlibi o waka bun.

Eric: Mi no ben sabi taki na so furu sani yu kan leri fu Bijbel.

Brian: Mi breiti fu yere dati, Eric. Mi ben o wani miti yu dya baka fu yere fa yu feni a tori: „Fo sani di trowpatna kan du fu lusu problema”, na ini a srefi artikel disi di de fu feni tapu a Website fu wi. *

Eric: A bun. Mi nanga mi frow o luku en makandra.

Wan sani de di yu wani kon sabi fu Bijbel? Yu e aksi yusrefi fu san ede Yehovah Kotoigi e bribi noso e du son sani? Efu dati de so, dan yu no musu frede fu taki fu a tori dati nanga wan Yehovah Kotoigi. A o breiti fu taki nanga yu fu a tori dati.

^ paragraaf 63 Efu yu wani sabi moro, dan luku kapitel 14 fu a buku San Bijbel e leri wi trutru? di Yehovah Kotoigi tyari kon na doro.

Kon sabi moro

GADO ABI BUN NYUNSU GI WI!

Sortu wini den leri fu Bijbel abi gi wi?

Yesus sori fu san ede wi abi tiri fanowdu. A ben taki sosrefi fu tu leri fu Bijbel di prenspari srefisrefi.

FA WI E STUDERI BIJBEL NANGA SMA

Fu san ede wi musu studeri Bijbel?

Na heri grontapu, milyunmilyun sma e feni piki tapu prenspari aksi fu a libi, na ini Bijbel. Yu wani de wan fu den tu?