Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yanuari 2015

Yu ben sabi a sani disi?

Yu ben sabi a sani disi?

San a Griki wortu „enukos” na ini Bijbel wani taki?

Wan Asiria prenki fu wan enukos

Na son presi na ini Bijbel, a wortu disi abi fu du nanga wan man di sma ben koti den koko fu en syenpresi puru. Son leisi dati ben pasa fu di den man disi ben kisi strafu noso fu di sma ben teki den leki katiboman noso leki srafu. Man di ben de fu frutrow èn di sma ben koti den koko fu den syenpresi puru, ben abi a frantwortu fu luku den uma fu a kownu di ben e tan na ini a kownu-oso. Fu eksempre, den edeman Hegai nanga Sasgas ben abi a frantwortu fu luku den wefi fu Kownu Ahasferos fu Persia, di sma e taki dati en ben de Serkses I.Ester 2:3, 14.

Ma na son presi na ini Bijbel a wortu disi abi fu du nanga „wan heihei man di e wroko gi kownu”. Wan tu fu den heihei man dati ben de Ebed-Meilek di ben e wroko makandra nanga Yeremia, èn na Etiopiaman di a preikiman Filipus ben preiki gi. Soleki fa a sori, dan Ebed-Meilek ben de wan heihei man nanga bigi frantwortu, fu di a ben man taki langalanga nanga Kownu Sedekia (Yeremia 38:7, 8). Na Etiopiaman ben abi a frantwortu fu luku ala den gudu fu a kownu-oso, èn a „ben go na Yerusalem fu anbegi Gado”.Tori fu den apostel 8:27.

Fu san ede skapuman na ini Bijbel ten ben e prati den skapu fu den bokoboko?

Di Yesus ben e taki fu a krutudei di o kon, dan a taki: „Te a Manpikin fu libisma kon nanga en glori, . . . a o prati den sma neleki fa wan skapuman e prati den skapu fu den bokoboko” (Mateyus 25:31, 32). Fu san ede skapuman ben e prati den meti disi fu makandra?

Nofo tron skapuman ben e meki skapu nanga bokoboko nyan grasi makandra na deiten. Na neti den ben e tyari den meti disi kon makandra na ini pen fu kibri den gi ogri meti, fufuruman, èn gi a kowru (Genesis 30:32, 33; 31:38-40). Den ben e poti den tu sortu meti disi aparti fu kibri den moro tiriwan, soleki den umaskapu nanga den pikin skapu, so taki den bokoboko di ben de moro krasi no ben e feti nanga den. A skapuman ben e prati den skapu tu fu den bokoboko te den ben tyari den kon makandra fu „meki pikin, fu merki den, èn fu koti a wiwiri fu den”, na so a buku All Things in the Bible e taki. Sobun, Yesus ben poti prakseri na sani di den sma na ini owruten Israel ben gwenti si noso du, fu di furu sma drape ben gwenti kweki skapu.