Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yanuari 2015

Un masra—Meki yu frow firi taki yu lobi en

Un masra—Meki yu frow firi taki yu lobi en

FA WAN man kan sori en frow taki a lobi en? Furu sma kweki nanga a denki taki a moro prenspari frantwortu fu wan man, na fu meki moni fu sorgu en osofamiri. Ma toku son frow di abi furu sani no e firi taki a masra fu den lobi den. Den uma disi e frede a masra fu den srefi. Fu eksempre, wan Spanyoro uma di nen Rosa, e taki fu en trowmasra: „Te a de nanga tra sma dan a abi switifasi, ma te a de na oso a grofu.” Joy di e libi na Nigeria e taki: „Te mi no ben e agri nanga mi masra, dan a ben e taigi mi, ’Yu musu du ala san mi taigi yu, bika mi na yu masra.’”

Fa wan masra kan tyari a frantwortu fu en na wan lobi-ati fasi? San wan masra musu du fu meki en frow firi taki a lobi en, so taki a frow kan „feni rostu na ini en oso”?Rut 1:9.

SAN BIJBEL E TAKI FU A FRANWORTU DI WAN MASRA ABI?

Aladi Gado e si wan man nanga en frow na a srefi fasi, toku Bijbel e taki dati ibriwan fu den abi wan prenspari frantwortu na ini na osofamiri. Romesma 7:2 e taki dati wan frow di trow de na ondro „den wét fu en masra”. Neleki fa furu organisâsi e poti wan edeman fu luku den afersi fu den, na so Gado poti a masra leki ede fu en frow (1 Korentesma 11:3). Masra musu teki fesi na ini na osofamiri.

Un masra, fa un musu tyari a frantwortu di Gado gi unu? „Tan lobi un wefi neleki fa Krestes lobi a gemeente”, na so Bijbel e taki (Efeisesma 5:25). Iya, aladi Yesus Krestes no ben trow noiti, toku na eksempre fu en kan yepi yu fu tron wan bun masra. Meki wi go luku fa.

YESUS NA WAN BUN EKSEMPRE GI MASRA

Yesus ben e trowstu trawan èn a ben e yepi den. Yesus pramisi ala sma di ben lasi-ati fu di den ben abi problema: „Un kon na mi èn mi o gi unu krakti baka” (Mateyus 11:28, 29). A ben gwenti gi den frulekti te den ben e pina èn a ben e yepi den fu kon krosibei na Gado. A no de fu taki dati sma ben lobi fu de makandra nanga Yesus, fu di den ben sabi taki a ben o lekti a lai fu den.

A fasi fa masra kan teki na eksempre fu Yesus. Suku fasi fa yu kan lekti a wroko fu yu frow. Son wefi e firi leki Rosa  di ben kragi: „Mi masra ben e si mi leki en srafu.” Ma wan man di nen Kweku èn di abi wan koloku trowlibi, e taki: „Mi gwenti aksi mi frow fa mi kan yepi en nanga den wroko fu en. Fu di mi lobi en, meki nofo tron mi e yepi en nanga na osowroko, sondro fu a aksi mi.”

Yesus ben e hori trawan na prakseri èn a ben e firi gi den. Twarfu yari langa, wan pôti uma ben pina fu di a ben abi wan takru siki. Di na uma disi yere taki Yesus ben man dresi sma na wan wondru fasi, dan „a ben prakseri: ’Efu mi e fasi en dyakti nomo, mi o kon betre.’” A ben abi leti. A waka go na Yesus, a fasi den franya fu en krosi, èn wantewante a kon betre baka. Aladi son sma drape ben kan denki taki na prefuru na uma disi ben e prefuru, toku Yesus frustan taki na yepi na uma disi ben e suku. * A taigi en na wan switi fasi: „Mi umapikin . . . Yu o de gosontu  now, bika yu no abi a takru siki moro.” A no gi na uma syen èn a no bari en tu, ma na presi fu dati a frustan taki na siki a ben siki. Na so a sori taki a ben de wan man di ben e firi gi trawan.Markus 5:25-34.

A fasi fa masra kan teki na eksempre fu Yesus. Te yu wefi no e firi bun, dan sori en taki yu e broko yu ede nanga en èn abi pasensi nanga en. Pruberi fu frustan fu san ede a e du son sani. Ricardo e taki: „Te mi e si taki mi frow no e firi switi, dan mi e du tranga muiti fu no taki sani di kan meki a firi moro fruferi.”

Yesus ben e taki nanga den disipel fu en. Yesus ben taki furu nanga den mati fu en. „Mi taigi unu ala den sani di mi yere fu mi Tata”, na so a ben taki (Yohanes 15:15). A tru taki son leisi, Yesus ben wani de en wawan fu kan begi. Ma nofo tron a ben e fruteri den disipel fu en san ben de na tapu en ati. A neti fosi den kiri en leki wan ogriman, a taigi den krin taki a ben e „sari trutru” (Mateyus 26:38). Srefi te den ben e du sani di a no ben feni bun, toku Yesus no tapu noiti fu taki nanga den mati fu en.Mateyus 26:40, 41.

Te wan man e prakseri na eksempre fu Yesus, dan dati kan yepi en fu tron wan moro bun masra noso papa

A fasi fa masra kan teki na eksempre fu Yesus. Taigi yu frow fa yu e denki èn fa yu e firi. Kande wan uma e kragi taki en masra lobi taki te a de nanga tra sma, ma na oso a no wani taki. Ma luku fa Ana e firi te en masra e fruteri en fa a e denki noso fa a e firi. A e taki: „Mi e firi taki a lobi mi trutru, èn mi e firi leki wi na wán.”

No kon abi a gwenti fu no e taki nanga yu frow, soso fu di yu wani strafu en. Wan uma e taki: „Te mi masra en ati e bron, dan omeni dei langa a no ben e taki nanga mi. A ben e gi mi a firi taki mi du wan sani èn taki a ben e teige mi.” Ma Edwin e pruberi fu de leki Yesus. A e taki: „Te mi ati e bron, dan mi no e piki wantewante, ma mi e wakti a yoisti momenti fu taki fu a tori.”

Joy di wi ben kari na a bigin fu na artikel, si fa en masra kon kenki sensi a bigin studeri Bijbel nanga Yehovah Kotoigi. Joy e fruteri: „A tyari kenki kon èn a e du tranga muiti fu sori moro lobi, neleki fa Yesus ben du dati.” Milyunmilyun trowpaar e kisi wini fu a srefi Bijbel rai disi. Yu wani kisi wini tu fu a rai dati? Yu kan aksi wan Kotoigi fu Yehovah fu studeri Bijbel nanga yu, sondro taki yu abi fu pai gi dati.

^ paragraaf 10 Soleki fa a Wet di Gado ben gi den Israelsma e sori, dan a siki fu na uma disi meki taki a no ben krin, èn fu dati ede iniwan sma di a ben fasi no ben o krin tu.Lefitikus 15:19, 25.