Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  december 2014

Mi musu leni moni?

Mi musu leni moni?

„Leni moni de leki trowfesa, pai baka de leki dede-oso.”—Wan Swahili odo.

FURU sma fu Owstu-Afrika sabi na odo disi, èn a e sori krin fa furu sma na heri grontapu e denki fu a tori disi. Na so yu e denki tu fu a leni di sma e leni moni fu wan mati noso fu wan tra presi? Son leisi a kan gersi leki na wan bun sani fu leni moni, ma yu denki taki na wan koni sani fu du? Sortu problema sma kan kisi te den e leni moni?

Wan tra Swahili odo e sori san kan pasa te sma e leni moni. A e taki: „Lenileni libi e pori mati.” Iya, paiman kan tyari problema kon na mindri mati nanga famiri. Awinsi yu seti ala sani bun, noso awinsi yu abi bun prakseri, toku a no ala ten sani e waka soleki fa yu ben fruwakti. Fu eksempre efu ten e pasa èn a sma no e pai a paiman fu en, dan a sma di leni en a moni kan bigin mandi. En ati kan bron so te, taki te fu kaba en nanga a sma di a leni a moni e kisi trobi, èn srefi den famiri fu den kan kisi trobi nanga makandra. Fu di paiman kan tyari problema kon, meki wi no musu de gaw fu leni moni soso fu man lusu moni problema.

Te wan sma e leni moni, dan dati kan pori a matifasi di a abi nanga Gado. Fa so? We, Bijbel e taki dati na ogri sma e weigri fu pai paiman (Psalm 37:21). A e taki tu taki „a sma di lobi leni moni na a futuboi fu a man di leni en a moni” (Odo 22:7). A sma di leni moni fu wan trawan musu frustan taki solanga a no pai a moni baka, a abi wan fruplekti na a sma di leni en a moni. Dati meki wan tra Afrikan odo e taki: „Efu yu leni den futu fu wan sma, yu o abi fu go pe a e tyari yu.” Na odo disi e sori taki wan sma di abi bigi paiman no man du moro san en srefi wani.

Dati meki wi musu si en leki wan prenspari sani fu pai baka san wi leni, noso wi o kisi problema. Te wan sma abi furu paiman, dan dati kan gi en broko-ede, kande a no man sribi te neti, kande a musu wroko moro langa, kande en nanga en trowpatna e meki trobi, noso kande famiri e kisi trobi srefi. Sma kan tyari en go na krutu srefi, noso kande a musu koti strafu. A sani disi di skrifi na Romesma 13:8 na koni rai:  „Un no musu abi nowan paiman na nowan sma, boiti a lobi di unu musu sori gi makandra.”

A DE FANOWDU?

Den sani disi e sori taki wi musu luku bun te wi wani leni moni. A bun fu aksi yusrefi: A nowtu bigi so te taki mi musu leni a moni? Mi musu gebroiki mi moni moro bun so taki mi man sorgu mi osofamiri? Na bigi-ai mi abi, fu di mi wani bai sani di mi no man pai? Nofo tron, a moro bun fu breiti nanga san yu abi, na presi fu poti yusrefi na ini paiman.

Ma son leisi a kan de fanowdu fu leni moni, kande te wan problema opo kon èn tra fasi no de fu lusu a problema dati. Awinsi fa a no fa, efu wan sma e bosroiti fu leni moni, a musu hori ensrefi na a mofo di a meki. Fa a kan du disi?

Noiti no suku fu kisi wini fu wan sma soso fu di yu feni taki a abi furu moni. Wi no musu denki taki na fu di wan sma abi moni, dan a de fruplekti fu yepi wi. Wi no musu denki tu taki na fu di a sma disi abi moni, meki wi no abi fu du muiti fu pai en baka. No dyarusu tapu sma di abi moni.Odo 28:22.

Sorgu tu taki yu e pai baka san yu leni, èn no draidrai fu du dati. Efu a sma di leni yu a moni no taigi yu o ten yu musu pai en, dan yu srefi musu poti wan ten èn yu musu hori yusrefi na dati. A bun tu taki unu e skrifi sani poti tapu papira so taki bakaten unu no e kisi problema (Yeremia 32:9, 10). A ben o bun te yu srefi e go pai a sma di leni yu a moni, so taki yu kan taigi en tangi. Te yu gwenti pai baka san yu leni, dan yu o tan bun mati fu trawan. Yesus ben taki a prenspari sani disi: „Te unu taki ’iya’, dan meki a tan iya. Te unu taki ’nôno’, dan meki a tan nôno” (Mateyus 5:37). Boiti dati, hori a tumusi prenspari Bijbel leri disi na prakseri: „Ala sani di unu wani meki sma du gi unu, na dati un musu du gi den tu.”Mateyus 7:12.

BIJBEL RAI DI KAN YEPI

Bijbel e sori san kan yepi wi te wi e kisi a firi fu leni moni. A e taki: „Wan sma e kisi furu wini te a e dini Gado fayafaya, ma dati o pasa soso te a breiti nanga san a abi” (1 Timoteyus 6:6). Sobun, a moro bun fasi fa wan sma kan wai pasi gi den problema di kan kon te a e leni moni, na te a breiti nanga san a abi. Ma a tru taki a sani disi no makriki na ini a grontapu disi pe sma wani kisi wantewante san den wani. A sani di kan yepi, na te wan sma „e dini Gado fayafaya”. Fa so?

Luku na eksempre fu wan Kresten trowpaar na ini Asia. Di den ben yongu, a ben de wan bigi sani gi den taki son sma ben kan bai den eigi oso. Dati meki den bai wan oso nanga a moni di den ben poti na wan sei èn di den leni fu bangi èn fu famiriman. Te fu kaba, a ben kon hebi gi den fu pai so furu moni ala mun. Den bigin wroko moro langa èn den no ben abi ten moro gi den pikin fu den. A masra e taki: „A broko-ede, a pen, nanga a lasi di mi ben e lasi sribi, ben de leki wan hebi ston tapu mi ede. A ben e kwinsi mi.”

„Te yu e si gudu soleki fa Gado e si en, dan dati kan kibri yu gi problema”

Te fu kaba, den prakseri san skrifi na 1 Timoteyus 6:6 èn den kon si taki a wan-enkri fasi fa den ben kan lusu a problema, na fu seri na oso. Baka tu yari fosi den ben man pai ala den paiman fu den. San a trowpaar disi leri fu a sani di miti den? Den e taki: „Te yu e si gudu soleki fa Gado e si en, dan dati kan kibri yu gi problema.”

Furu sma sabi a Swahili odo di kari na a bigin. Toku dati no tapu sma fu leni moni. Now di wi luku ala den Bijbel rai di wi kisi na ini na artikel disi, dan yu no denki taki wi musu denki seryusu fu na aksi disi: Mi musu leni moni?