Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  december 2014

 TORI FU A KAFTI | YU KAN DE WAN MATI FU GADO

Yu sabi Gado nen èn yu e gebroiki en?

Yu sabi Gado nen èn yu e gebroiki en?

Yu abi wan bun mati ma yu no sabi en nen? Seiker dati no de so. Irina, wan uma fu Bulgaria ben abi leti fu taki a sani disi: „Yu no man de wan mati fu Gado efu yu no sabi en nen.” Koloku taki Gado wani taki wi tron mati fu en, soleki fa wi si dati na ini a fosi artikel. Dati meki na ini Bijbel, Gado meki wi kon sabi suma na en. A taki: „Mi na Yehovah. Dati na mi nen.”Yesaya 42:8.

Na ini Bijbel, Gado meki wi kon sabi suma na en. A taki: „Mi na Yehovah. Dati na mi nen.”Yesaya 42:8

Yu denki taki a prenspari gi Yehovah taki wi sabi en nen èn taki wi e gebroiki en? Luku a sani disi: A nen fu Gado, di skrifi nanga fo Hebrew letter èn di sma sabi leki a Tetragrammaton, de fu feni pikinmoro 7000 leisi na ini den fosi Hebrew Buku fu Bijbel. Nowan tra nen skrifi so furu leisi na ini Bijbel. A sani disi e sori krin taki Yehovah wani taki wi sabi en nen èn taki wi e gebroiki en. *

Te wan sma wani kon sabi wan trawan, dan a fosi sani di a wani sabi na a nen fu a sma. Yu sabi Gado nen?

Ma son sma ben kan feni taki Gado santa èn taki en na a Almaktiwan. Fu dati ede den no ben o sori lespeki gi en te den ben o gebroiki en nen. A tru taki a no ben o bun fu gebroiki Gado nen na wan fasi di no fiti, neleki fa yu no ben o du dati nanga a nen fu yu bun mati. Ma Yehovah wani taki den sma di lobi en musu gi en nen grani, èn den musu fruteri trawan a nen fu en (Psalm 69:30, 31; 96:2, 8). No frigiti taki Yesus ben leri den bakaman fu en fu begi: „Wi Tata na hemel, meki yu nen de santa.” Te wi e fruteri sma a nen fu Gado, dan wi e yepi fu santa a nen fu en. Na so wi e tron moro bun mati fu Gado.Mateyus 6:9.

Bijbel e sori taki Gado e prakseri den wan „di e hori en nen na prakseri” (Maleaki 3:16). Te wan sma e du dati, dan Yehovah e pramisi en: „Mi o kibri en, fu di a kon sabi mi nen. A o kari mi èn mi o piki en. Mi o de nanga en te a de na nowtu” (Psalm 91:14, 15). A prenspari taki wi sabi Yehovah en nen èn taki wi e gebroiki en efu wi wani de bun mati fu en.

^ paragraaf 4 A sari taki furu Bijbel no abi Gado nen na ini, aladi a nen dati de fu feni so furu na ini den Hebrew Buku fu Bijbel di furu sma sabi leki na Owru Testamenti. Na presi fu dati, den poti wortu soleki „Masra” noso „Gado” na den presi pe a nen fu Gado ben musu skrifi. Efu yu wani sabi moro fu a tori disi, dan luku bladzijde 195-197 fu a buku San Bijbel e leri wi trutru? di Yehovah Kotoigi tyari kon na doro.