Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  november 2014

 WAN TAKIMAKANDRA NANGA WAN BIRTISMA

O ten Gado Kownukondre bigin tiri? (Pisi 2)

O ten Gado Kownukondre bigin tiri? (Pisi 2)

A pisi tori di e kon now, na wan takimakandra di wan Kotoigi fu Yehovah ben kan abi nanga wan birtisma. Kon meki wi taki dati wan Kotoigi di nen Winston go baka na a oso fu wan man di nen John.

LUKU SYATU BAKA SAN NEBUKADNESAR DREN

Winston: John mi breiti fu si yu baka. Mi lobi fa wi e taki fu Bijbel ibri wiki. * Fa a e go nanga yu?

John: A e go, mi no musu lei.

Winston: Mi breiti fu yere dati. A lasti leisi di mi ben de dya, wi ben luku fu san ede Yehovah Kotoigi e taki dati Gado Kownukondre bigin tiri na ini 1914. * Soleki fa wi ben si, dan kapitel 4 fu a buku Danièl abi wan profeititori di yepi wi fu frustan a tori dati moro krin. Yu sabi ete san skrifi drape?

John: Na a tori fu a dren di Kownu Nebukadnesar ben kisi fu wan bigi bon.

Winston: Iya, dati na en. Na ini a dren fu Nebukadnesar a ben si wan bigi bon di doro te na hemel. A ben yere fa wan boskopuman fu Gado taki dati den ben musu koti a bon trowe ma den ben musu libi a tompu na ini a gron. Baka „seibi pisi ten” a bon ben o gro baka. * Wi ben si tu fu san ede wi kan taki dati a profeititori kon tru na tu difrenti fasi. Yu sabi ete fa a kon tru a fosi leisi?

John: A ben abi fu du nanga Nebukadnesar srefi tòk? A ben lasi en frustan seibi yari.

Winston: Dati na en. Nebukadnesar ben lasi en frustan fu wan pisi ten, èn na so a tiri fu en kon na wan kaba. Ma di a profeititori kon tru na wan moro prenspari fasi, dan a tiri fu Gado ben o kon na wan kaba gi seibi pisi ten. Soleki fa wi si, dan den seibi pisi ten bigin di Yerusalem kisi pori na ini 607 Fosi Krestes. Sensi a ten dati, nowan kownu na grontapu ben e teki presi moro gi Yehovah Gado fu tiri a pipel fu en. Ma na a kaba fu den seibi pisi ten, Gado ben o poti wan nyun Tiriman fu tiri a pipel fu en. A ben o de wan sma na hemel. Fu taki en tra fasi, a kaba fu den seibi pisi ten ben o sori taki a hemel Kownukondre fu Gado ben bigin tiri. Wi ben taki kaba o ten den seibi pisi ten bigin. Sobun, efu wi kan sabi o langa den ben de, dan wi kan sabi o ten Gado Kownukondre bigin tiri. Yu e frustan san mi taki te nanga now?

John: Iya, fa wi luku en baka, mi man memre ala sani.

Winston: A bun, kon meki wi go luku o langa den seibi pisi ten de. Mi leisi wan tu sani baka, so taki mi kan memre den prenspari penti. Mi o pruberi fu fruteri yu den.

John: Oke.

 DEN SEIBI PISI TEN E KON NA WAN KABA —DEN LASTI DEI E BIGIN

Winston: Na ini a tori fu Nebukadnesar, den seibi pisi ten ben de seibi yari. Ma te a profeititori abi fu du nanga Gado Kownukondre, a moro prenspari fasi fa a profeititori kon tru, dan den seibi pisi ten musu fu langa moro leki seibi yari.

John: Fu san ede yu e taki dati?

Winston: Memre taki den seibi pisi ten bigin di Yerusalem kisi pori na ini 607 Fosi Krestes. Efu wi bigin na a yari dati, èn teri seibi yari go moro fara, dan wi e doro 600 Fosi Krestes. Ma na ini a yari dati, nowan prenspari sani pasa di abi fu du nanga a tirimakti fu Gado. Boiti dati, wi ben si taki di Yesus ben de na grontapu a ben sori taki den seibi pisi ten no ben kon na wan kaba ete.

John: Oh, ai, mi ben frigiti a sani dati.

Winston: Sobun, den seibi pisi ten, a no seibi yari, ma na wan moro langa pisi ten.

John: O langa dan?

Winston: A buku Openbaring di e taki fu wan tu sani na ini a buku Danièl, e yepi wi fu sabi soifri o langa den seibi pisi ten de. A e sori taki dri nanga afu pisi ten na 1260 dei. * Sobun seibi pisi ten, tu tron dri nanga afu pisi ten na 2520 dei. Yu e frustan san wi luku te nanga now?

John: Iya, mi frustan. Ma mi no man si ete fa disi e sori taki Gado Kownukondre bigin tiri na ini 1914.

Winston: Oke, kon meki wi luku a tori moro fara. Son leisi, na ini Bijbel profeiti, wán dei e teri gi wán yari. * Efu wi teki wán dei leki wán yari, dan den seibi pisi ten na 2520 yari. Efu wi bigin na 607 Fosi Krestes, èn wi e teri 2520 yari go moro fara, dan wi e doro a yari 1914. * Na so wi sabi taki 1914 na a yari di den seibi pisi ten kon na wan kaba, èn taki Yesus bigin tiri leki Kownu fu Gado Kownukondre. Wan prenspari sani di wi e si, na taki sensi 1914, bigi sani pasa na heri grontapu, soleki fa Bijbel ben taki fu den lasti dei.

John: Sortu sani so?

Winston: Luku san Yesus taki dyaso na Mateyus 24:7. Yesus e taki san ben o pasa te a ben o bigin tiri na ini hemel: „A wan pipel o go feti nanga a tra pipel, èn a wan kownukondre o go feti nanga a tra kownukondre. Na ini a wan presi baka a trawan angriten nanga gronseki o de.” Luku taki Yesus e taki dati angriten nanga gronseki ben o de na a pisi ten dati. Wi si furu fu den sani dati na ini a ten di pasa, a no so?

John: Ai.

Winston: Yesus e taki tu fu feti di ben o de te a ben o tiri leki Kownu fu Gado Kownukondre. Èn a buku Openbaring no e taki fu pikinpikin feti, ma fu feti di ben o abi krakti tapu heri grontapu na a ten fu a kaba. * Yu sabi ete o ten a Fosi Grontapufeti bigin?

John: Dati ben de ini 1914, a srefi yari di unu taki dati Yesus bigin tiri. Noiti mi ben si en so.

Winston: Te wi e luku ala den sani disi, a  profeititori fu den seibi pisi ten nanga tra profeititori di e taki fu den lasti dei, dan wi kan frustan taki na so a de. Yehovah Kotoigi de seiker taki Yesus bigin tiri leki Kownu fu Gado Kownukondre na ini 1914 èn taki den lasti dei bigin a srefi yari dati. *

John: Mi abi pikinso ten fanowdu fu frustan a tori disi krin.

Winston: A o go. Mi srefi ben abi ten fanowdu fu frustan ala den sani disi. Ma mi howpu taki a takimakandra fu wi yepi yu fu kon si taki aladi a yari 1914 no skrifi na ini Bijbel, toku den sani di Yehovah Kotoigi e bribi fu a tori dati e komoto fu Bijbel.

John: Na dati mi si, èn na dati mi lobi. Ala ten yu e gebroiki Bijbel fu horibaka gi den sani di yu e taki. Noiti yu e taki san yusrefi denki. Yu sabi san mi no man frustan? Fu san ede Gado no taigi wi krin na ini Bijbel taki 1914 ben o de a yari di Yesus ben o bigin tiri na hemel?

Winston: Dati na wan moi aksi, John. Fu taki en leti, wan lo sani de di no skrifi krin na ini Bijbel. Fu san ede yu denki taki Gado meki sma skrifi Bijbel na so wan fasi taki wi ben o abi fu du muiti fu kon frustan san skrifi na ini? Kande wi kan taki fu a tori dati a tra leisi te mi kon na yu.

John: Dati ben o bun.

Wan sani de di yu wani kon sabi fu Bijbel? Yu e aksi yusrefi fu san ede Yehovah Kotoigi e bribi noso e du son sani? Efu dati de so, dan yu no musu frede fu taki fu a tori nanga wan Yehovah Kotoigi. A o breiti fu taki nanga yu fu a tori dati.

^ paragraaf 5 Yehovah kotoigi e studeri Bijbel nanga sma sondro taki den abi fu pai gi dati, èn na so den man taki fu difrenti Bijbel tori nanga den birtisma fu den.

^ paragraaf 7 Luku na artikel „Wan takimakandra nanga wan birtisma—O ten Gado Kownukondre bigin tiri?—Pisi 1” na ini A Waktitoren fu 1 oktober 2014.

^ paragraaf 24 Luku a karta „A bon di Nebukadnesar dren”.

^ paragraaf 30 Luku kapitel 9 fu a buku San Bijbel e leri wi trutru? di Yehovah Kotoigi tyari kon na doro. A de fu feni tu na www.jw.org/srn.