Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  november 2014

 TORI FU A KAFTI | SATAN DE TRUTRU?

Wi musu frede Satan?

Wi musu frede Satan?

Koolmonoxide na wan gas di wi no man si èn a kan kiri wi tu, neleki Satan

Koolmonoxide na wan gas di no abi kloru, a no abi smeri, èn a kan kiri sma sondro taki den sabi. A kan taki a gas disi kiri bun furu sma na grontapu. Ma wi no abi fu frede. Fasi de fa wi kan kon sabi efu a gas dati de na wi lontu, èn fasi de tu fa wi kan kibri wisrefi. Furu sma e seti alarm di kan warskow den biten.

Neleki fa a de nanga a gas disi, na so wi no man si Satan. A muilek fu sabi o ten a wani du ogri nanga wi, èn a kan kiri wi tu. Ma Gado no libi wi sondro yepi. Wi no abi fu frede Satan efu wi e gebroiki den moi sani disi di Gado gi wi.

Wi kan teki wi eigi bosroiti. Yakobus 4:7 e taki: „Kakafutu gi Didibri èn a o lon gowe fu unu.” Aladi Satan abi furu makti, toku a no man dwengi yu fu du sani di yu no wani du. Na yu srefi musu bosroiti dati. Na ini 1 Petrus 5:9 skrifi: „Kakafutu gi en [Didibri] èn abi wan tranga bribi.” Memre taki Satan gowe libi Yesus baka di Yesus kakafutu gi en ala den dri leisi di a ben suku fu kori en (Mateyus 4:11). Yu kan bosroiti tu fu kakafutu gi Satan te a wani kori yu.

Yu kan de wan mati fu Gado. Yakobus 4:8 e gi wi deki-ati fu „kon krosibei na Gado”. Yehovah srefi e gi yu a kari fu tron wan mati fu en. Fa yu kan du dati? A moro bun fasi fa yu kan du dati, na te yu e kon leri sabi en nanga yepi fu Bijbel (Yohanes 17:3). Den sani di yu e kon sabi fu Yehovah o meki taki yu o kon lobi en, èn dati o meki taki yu o wani gi yesi na en (1 Yohanes 5:3). Te yu e kon moro krosibei na yu hemel Tata, dan san a o du? Yakobus e taki moro fara: ’Gado o kon krosibei na yu’.

Yehovah e gi wi san wi abi fanowdu fu kibri wi

A e pramisi taki a o kibri wi. Odo 18:10 e taki: „A nen fu Yehovah na wan bun kibripresi. Den reti-ati sma e lon go na ini èn den e kisi kibri.” Ma disi no wani taki dati wi musu gebroiki a nen fu Gado leki wan sortu tapu. Na presi fu dati, den wan di abi trutru lespeki gi a nen fu Gado, kan begi en ala ten fu kibri den.

Wan bun eksempre. Tori fu den apostel 19:19 e taki wan moi sani fu sma na ini Efeise di ben teki a Kresten bribi: „Bun furu fu den sma di ben e du bonuwroko tyari den buku fu den kon na wán èn den bron den na fesi ala sma. Di den teri ala den sani disi, dan den kon si taki den ben warti feifitenti  dusun pisi solfru moni.” * Den Kresten dati pori iniwan sani di ben abi fu du nanga afkodrei, awansi fa den sani dati ben diri. Na eksempre disi kan yepi wi furu na ini a ten disi. A grontapu disi lai nanga bonu nanga afkodrei. Srefi pikinpikin sani di sma e gebroiki fu du afkodrei, noso son gwenti di den abi kan gi ogri yeye okasi fu abi krakti na den tapu. Wi no musu abi noti fu du nanga den sani dati, awansi san pasa.Deuteronomium 18:10-12.

Rogelio di kari na ini a fosi artikel no ben e bribi taki Didibri de trutru. Ma baka di a pasa 50 yari a bigin denki tra fasi. Fu san ede? Rogellio e taki: „Fu a fosi leisi na ini mi libi mi kon abi wan Bijbel. Den sani di mi leri fu Bijbel sori mi krin taki Didibri de trutru. Na den sani dati e kibri mi fu no fadon na ini a trapu fu en.”

„Den sani di mi leri fu Bijbel sori mi krin taki Didibri de trutru. Na den sani dati e kibri mi fu no fadon na ini a trapu fu en”

Yu ben o wani si a dei te Satan no de moro? A sani dati kan. Bijbel e taki dati wan dei, Gado o „fringi en [Didibri di e kori furu sma] go na ini a se di e bron nanga faya di e pori sani krinkrin” (Openbaring 20:10). A no de fu taki dati faya no man du noti nanga wan yeye di wi no man si. Dati meki a musu de so taki a se di e bron nanga faya wani taki dati Didibri o kisi pori fu ala ten. Satan no o de noiti moro. Dati sa de wan moi ten gi den wan di lobi Gado!

Dati meki yu musu tan meki muiti fu kon sabi moro fu Yehovah èn fu a wani fu en. * Prakseri taki yu sa de na libi te ala sma o man taki: „Satan no de moro!”

^ paragraaf 8 Efu a solfru moni disi ben de moni fu Rome, dan ala nanga ala a ben doro a moni di sowan 50.000 wrokoman ben e meki wán dei. Dati na bun furu moni.

^ paragraaf 11 Efu yu wani sabi moro fa Satan e kori sma nanga yepi fu afkodrei, dan luku kapitel 10 fu a buku San Bijbel e leri wi trutru? Yu kan aksi iniwan Yehovah Kotoigi fu gi yu wan fu a buku dati.