Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  augustus 2014

 TEKI NA EKSEMPRE FU SMA DI BEN ABI BRIBI | YOSEF

„Grantangi, arki san mi dren”

„Grantangi, arki san mi dren”

YOSEF e tan luku go na a owstusei èn a e winsi taki a ben kan lowe gowe fu den bisnisman di ben e teki waka. Drape baka den bergi dati, no so fara fu pe a de, a foto Hebron de pe a e tan. A e prakseri fa en papa Yakob e sreka ensrefi gi a neti, aladi a no sabi srefisrefi san e pasa nanga a boi fu en di a lobi so te. Ma Yosef no man go na en now. A yonguman disi sabi taki kande noiti moro a o si en lobi papa di kon owru. Den bisnisman e luku en aladi den e waka nanga den kameili fu den tapu a pasi di sma gwenti teki go na a zuidsei. Gi den, a boi disi ben warti neleki a switismeri tara nanga oli di den ben e tyari go seri te na Egepte.

Yosef no ben kan abi moro leki 17 yari. Prakseri fa a ben e pingi en ai luku go na a west-sei pe a son e saka go na ini a Redi Se, aladi a ben e pruberi fu frustan fu san ede ala den sani disi ben e miti en. A no ben man bribi taki en eigi brada ben suku fu kiri en, èn taki den ben seri en leki srafu. A ben musu fu muilek gi Yosef fu no krei. A no ben sabi srefisrefi san ben o pasa nanga en.

Yosef tron srafu, ma a no lasi a bribi fu en

Fa a du kon taki Yosef kon de na ini so wan muilek situwâsi? San wi kan leri fu a bribi fu wan yonguman di pina fu di sma fu en eigi famiri ben e teige en?

WAN OSOFAMIRI DI BEN ABI PROBLEMA

Yosef ben de fu wan bigi osofamiri di no ben de koloku èn wánfasi no ben de na ini a famiri dati. Den sani di Bijbel e taki fu na osofamiri fu Yakob e sori krin san na a takru bakapisi te wan man abi moro leki wán uma. Gado ben gi pasi taki a pipel fu en ben abi na owru gwenti disi, ma di en Manpikin kon, dan a leri sma baka taki biginbigin Gado ben wani taki wan man abi wán uma nomo (Mateyus 19:4-6). Yakob ben abi awinsi 14 pikin nanga fo uma, dati ben de den tu uma fu en, Lea nanga Rakel, nanga den umasrafu fu den, Silpa nanga Bilha. Sensi a bigin, Yakob ben lobi Rakel di ben moi srefisrefi. Noiti a ben e firi so gi Lea, Rakel en bigi sisa, di a ben musu fu trow nanga en fu di en omu ben kori en. Den tu uma ben dyarusu tapu makandra, èn den pikin na ini na osofamiri kon abi a fasi dati tu.Genesis 29:16-35; 30:1, 8, 19, 20; 37:35.

Wan heri pisi ten, Rakel no ben man kisi pikin, èn di a kisi Yosef te fu kaba, dan Yakob ben lobi a boi disi di a ben kisi tapu en owrudei, moro  ala den trawan. Fu eksempre, di a famiri ben e go fu miti Esau, Yakob bigi brada di ben e suku fu kiri en, dan Yakob sorgu taki Rakel nanga a pikin boi Yosef ben de te na bakasei fu a grupu. Drape ogri no ben o miti den makriki. A span dei dati ben musu fu de wan sani gi Yosef. Prakseri fa a ben firi a mamanten dati aladi a ben e piri en ai e luku en papa, fu di a ben e aksi ensrefi fa a du kon taki na owru papa fu en di ben de steifisteifi ete, ben e tingatinga now. Kande a no ben man bribi di a yere san ben pasa: A neti na fesi, en papa ben feti nanga wan makti engel! Ma fu san ede? Fu di Yakob ben wani taki Yehovah Gado blesi en. A blesi di Yakob kisi, na taki en nen kenki kon tron Israel. Wan heri pipel ben o tyari en nen! (Genesis 32:22-31) Te fu kaba, Yosef kon sabi taki den manpikin fu Israel ben o tron den afo fu a pipel dati!

Bakaten, a yongu boi Yosef ben sari di a sma di a ben lobi so te dede gowe libi en frukufruku. En mama dede di a ben e kisi en pikin brada, Benyamin. En papa ben sari srefisrefi fu a sani disi. Prakseri fa Yakob ben e figi den watra-ai fu Yosef, aladi a ben e trowstu en nanga a srefi howpu di ben trowstu Abraham, a granpapa fu Yakob. Yosef ben musu fu firi bun di a kon sabi taki wan dei Yehovah ben o gi en mama libi baka! Kande a sani dati meki taki Yosef kon abi moro lobi gi a „Gado fu den wan di de na libi” (Lukas 20:38; Hebrewsma 11:17-19). Baka di Yakob lasi en wefi, dan ala ten a ben e sori lobi gi den tu boi di a ben abi nanga Rakel.Genesis 35:18-20; 37:3; 44:27-29.

Furu pikin ben o kisi takru maniri efu sma ben e pori den so. Ma Yosef leri furu bun sani fu en papa nanga mama, a kon abi wan tranga bribi, èn a ben e frustan krin tu san bun èn san ogri. Di a ben abi 17 yari, a ben e wroko leki skapuman e yepi wan tu fu den bigi brada fu en. Ne a si taki den ben e du ogri. A ben o kibri a tori soso fu di a no ben wani taki den mandi na en tapu? Awansi fa a no fa, a du san bun. A fruteri en papa san den brada fu en ben du (Genesis 37:2). Kande na fu di Yosef no ben frede fu du san bun, meki Yakob ben lobi en so. Dati na wan moi eksempre gi Kresten yonguwan! Kande wan brada noso wan mati fu den du wan seryusu sondu èn den e prakseri fu kibri a tori. Efu dati de so, dan a bun fu teki na eksempre fu Yosef èn fu sorgu taki den sma di man yepi a sma di du a sondu, e kon sabi fu a tori.Lefitikus 5:1.

Wi kan teki leri tu fu a situwâsi fu Yosef en famiri. Aladi tru Kresten na ini a ten disi no abi moro leki wán uma, toku furu osofamiri de di abi wan kwekimama, wan kwekipapa, noso kwekipikin. A sani di den alamala kan leri fu Yakob osofamiri, na taki te sma abi moro lobi gi trawan na ini na osofamiri èn te sma e teki sei na ini na  osofamiri, dan dati kan pori a wánfasi fu a famiri. Koni papa nanga mama di abi kwekipikin e du ala san den man fu sori den eigi pikin nanga den kwekipikin fu den taki den lobi ibriwan fu den, taki ibriwan fu den warti, èn taki ibriwan fu den kan yepi fu meki a osofamiri de koloku.Romesma 2:11.

DYARUSU E BIGIN

Yakob ben lobi Yosef fu di a ben e gi yesi èn fu di a ben e du san reti

Kande na fu di Yosef no ben frede fu du san bun, meki Yakob gi en wan grani. A meki wan sma meki wan moi dyakti gi a boi fu en (Genesis 37:3). Sma gwenti taki dati a dyakti ben abi strepi noso taki a ben abi furu kloru, ma nofo buweisi no de gi dati. A ben musu fu de so taki a ben de wan langa moi dyakti, èn a kan taki a ben e doro te na Yosef en anu nanga en futu. Kande a ben gersi wan dyakti di wan guduman noso wan prins ben e weri.

A no de fu taki dati Yakob ben abi bun reide fu du dati, èn seiker Yosef ben breiti di en papa sori lobi nanga warderi gi en na a fasi dati. Ma a dyakti ben o tyari bigi problema kon gi en. San wi no musu frigiti, na taki a boi ben de wan skapuman. Dati wani taki dati a ben e du hebi wroko. Prakseri fa a boi di ben e weri a kefalek dyakti dati ben e pruberi fu waka na ini a hei grasi, kren abra bergi, noso puru wan lasi skapu na ini wan makabusi. Ma wan moro prenspari aksi na, fa den brada fu Yosef ben o feni en taki Yakob ben gi en a dyakti dati?

Bijbel e taki: „Di den brada fu Yosef kon si taki den papa ben lobi en moro den alamala, den kisi bita-ati gi en èn den no ben man taki switi nanga en” * (Genesis 37:4). Wi kan frustan taki den brada fu Yosef ben e dyarusu, ma toku den du don fu meki a takru firi dati basi den (Odo 14:30; 27:4). Oiti yu dyarusu tapu wan sma fu di trawan poti prakseri na en noso fu di a kisi grani? Prakseri den brada fu Yosef. A dyarusu fu den meki taki den du sani di ben o hati den bakaten. Na eksempre fu den musu memre Kresten taki a moro bun fu „prisiri nanga sma di e prisiri”.Romesma 12:15.

A ben musu fu de so taki Yosef ben e firi taki den brada fu en no ben lobi en. A ben kibri a moi dyakti fu en te den brada fu en ben de krosibei? Kande a ben wani du dati. Ma hori na prakseri taki Yakob ben wani taki Yosef ben musu frustan taki a ben gi en a dyakti fu di a ben lobi en. Yosef no ben wani taki en papa firi wan fasi, èn dati meki ala ten a ben e weri a dyakti. Disi na wan moi eksempre gi wi. Aladi wi hemel Tata noiti no e teki sei, toku son leisi a e gi grani na sonwan fu den futuboi fu en. Boiti dati, a e aksi den fu sori taki den de tra fasi leki a grontapu disi di pori èn  pe sma e libi wan yayo libi. Neleki fa a ben de nanga a moi dyakti fu Yosef, na so a fasi fa tru Kresten e tyari densrefi e meki taki den de tra fasi leki den sma na den lontu. A sani disi kan meki taki trawan kan dyarusu noso mandi na den tapu (1 Petrus 4:4). Wan Kresten musu kibri gi trawan taki a de wan futuboi fu Gado? Kwetikweti, fu di Yosef no ben kibri en dyakti tu.Lukas 11:33.

DEN DREN FU YOSEF

Syatu baka dati, Yosef kisi tu aparti dren. Na ini a fosi dren, Yosef si fa en nanga den brada fu en ben e tai aleisi na ini bosu. Ne den bosu fu den brada fu en go tanapu lontu a bosu fu en èn den boigi gi a bosu fu en di ben e tanapu leti opo. Na ini a tra dren, a son, a mun, nanga 11 stari ben e boigi gi Yosef (Genesis 37:6, 7, 9). San Yosef ben musu du nanga den dren dati?

Den dren ben komoto fu Yehovah Gado. Den ben de profeiti dren, èn Gado ben wani taki Yosef fruteri en famiri san a dren. Fu taki en leti, Yosef ben musu du a srefi sani di ala den profeiti di ben kon bakaten ben du. Den man disi ben musu tyari boskopu nanga krutuboskopu fu Gado gi a tranga-ede pipel fu en.

Yosef aksi den brada fu en na wan lespeki fasi: „Grantangi, arki san mi dren.” Den brada fu en ben frustan a dren, ma den no ben lobi en kwetikweti. Den taigi en: „Yu wani taigi wi taki yu o tron wi kownu èn taki yu o basi wi?” A tori e taki moro fara: „Na so den dren fu en èn den sani di a ben e taki, meki den kisi moro bita-ati gi en.” Di Yosef fruteri en papa nanga den brada fu en a tra dren, dan den no ben lobi a dren dati tu. Bijbel e taki: „En papa piri-ai gi en. A taigi en: ’San na a dren di yu dren? Yu wani taigi mi taki mi, yu mama, nanga yu brada o boigi gi yu nanga wi fesi go na gron?’” Ma Yakob tan prakseri den dren. A kan taki na Yehovah ben e taki nanga a boi?Genesis 37:6, 8, 10, 11.

Yosef a no a fosi noso a lasti futuboi fu Yehovah di ben musu tyari wan profeiti boskopu di sma no ben o lobi, èn di ben o meki srefi taki sma frufolgu en. Yesus ben de a moro prenspariwan fu den sortu boskopuman dati, èn a taigi den bakaman fu en: „Efu den frufolgu mi, dan den o frufolgu unu tu” (Yohanes 15:20). Yongu Kresten nanga owruwan sosrefi kan leri furu fu a bribi nanga a deki-ati fu a yonguman Yosef.

BITA-ATI E TYARI OGRI KON

A no ben de langa baka dati di Yakob seni Yosef fu go du wan boskopu. Den moro bigi boi fu en ben e luku den skapu na a noordsei fu Sikem, pe den ben meki bigi feanti wan syatu pisi ten na fesi. A no de fu taki dati Yakob ben e broko en ede nanga den manpikin fu en, sobun a seni Yosef fu go luku efu sani ben e go bun nanga den. Yu kan frustan fa Yosef ben e firi? A ben sabi taki den brada fu en ben e teige en srefisrefi! Fa den ben o feni en te a ben o go taigi den san den papa ben taki? Toku Yosef gi yesi, èn a go na den.Genesis 34:25-30; 37:12-14.

Yosef ben musu waka fara, kande a ben teki sowan fo noso feifi dei fu doro drape. Sikem ben de sowan 80 kilometer go na a noordsei fu Hebron. Ma di Yosef doro na Sikem, dan a kon sabi taki den brada fu en ben go na Dotan, sowan 22 kilometer go na a noordsei. Di Yosef doro Dotan te fu kaba, dan den brada si a e waka kon. Wantewante den ati bigin kuku. Bijbel e taki: „Den taigi makandra: ’Luku! A man di e dren den bigi dren e kon. Kon meki wi kiri en èn trowe en go na ini wan fu den watrapeti. Wi o taki dati na wan ogri meti nyan en. Dan wi o si san o pasa nanga den dren fu en.’” Ma Ruben kisi den brada fu en so fara fu trowe Yosef na ini wan peti, fu di a ben e howpu taki a ben kan puru a boi drape bakaten.Genesis 37:19-22.

Sondro fu sabi taki den brada fu en ben wani kiri en, Yosef waka go miti den, èn seiker a ben e howpu taki den no ben o mandi nanga en. Na presi fu dati, den brada fu en grabu en! Den hari a moi dyakti fu en puru na en skin, ne den srepi en go na wan drei peti, èn den pusu en go na ini. Yosef fadon go te na gron! Di a kisi ensrefi baka, dan a du muiti fu opo tanapu, ma a no ben man kren komoto na ini a peti. A ben e si soso a mofo  fu a peti, èn safrisafri a no ben e yere den sten fu en brada moro. A bari kari den, a begi den, ma den no yepi en. Den sidon nyan krosibei fu a peti leki noti no pasa. Di Ruben gowe, den prakseri baka fu kiri a boi, ma Yuda taigi den fu seri en gi bisnisman di ben e pasa drape. Dotan ben de krosibei fu a pasi di bisnisman ben gwenti teki fu go na Egepte, èn a no teki langa fosi wan grupu Ismaelsma nanga Midiansma pasa drape. Fosi Ruben drai kon baka, den ben seri Yosef kaba. Den ben seri a brada fu den leki srafu gi 20 pisi solfru. *Genesis 37:23-28; 42:21.

Yosef ben e du san bun, ma toku den brada fu en ben e teige en

Dan wi e doro baka na a bigin fu a tori. Di den ben e tyari Yosef go na a zuidsei, na Egepte, dan a ben gersi leki a ben lasi ala sani. Den ben e tyari en gowe fu en famiri nanga tranga! Furu yari langa a no ben o sabi noti fu en famiri. A no ben o sabi fa Ruben ben bruya di a kon baka èn a no si en, a no ben o sabi fa Yakob ben sari di den kori en taki en lobi manpikin Yosef dede, a no ben o sabi noti fu en owru granpapa, Isak, di ben de na libi ete. Boiti dati, a no ben o sabi noti fu en pikin brada Benyamin di a ben lobi so te èn di a ben o misi srefisrefi. Ma a tru taki Yosef no ben abi notinoti?Genesis 37:29-35.

Yosef ben abi wan sani ete di den brada fu en noiti no ben o man teki. Dati na a bribi fu en. A ben sabi furu fu en Gado, Yehovah, èn noti no ben kan meki a lasi a sani dati, awansi a ben lasi en oso, awansi a ben e pina leki strafuman tapu a langa pasi go na Egepte, èn awansi den ben lagi en fu di den seri en leki srafu gi Potifar, wan guduman fu Egepte (Genesis 37:36). Den sani disi di ben miti Yosef meki taki a bribi fu en kon tranga èn awansi san pasa a ben o tan du a wani fu a Gado fu en. Tra artikel di o kon bakaten, o sori fa a bribi fu Yosef meki taki en Gado, Yehovah, ben kan gebroiki en moro bun èn fa a tyari wini kon gi a famiri fu en di ben abi problema. A de wan koni sani te wi e sori bribi neleki Yosef!

^ paragraaf 15 Son ondrosukuman e taki dati den brada fu Yosef ben e denki taki a kado di a papa fu den ben gi Yosef ben e sori taki a ben o gi a boi disi a reti fu a fosi manpikin. Den ben sabi taki Yosef ben de a fosi manpikin fu a wefi di Yakob ben lobi moro, iya, a wan di a ben wani trow nanga en. Boiti dati, Yakob en fosi manpikin, Ruben, ben sribi nanga a tra wefi fu en papa. Na so a ben gi en papa syen èn a lasi a reti di a ben abi leki a fosi manpikin.Genesis 35:22; 49:3, 4.

^ paragraaf 25 Srefi na ini a pikin sani disi Bijbel e taki sani soifri. Owruten bukulolo fu a ten dati e sori taki na ini Egepte, sma ben e pai 20 pisi solfru gi wan srafu.