Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  augustus 2014

 LEISIMAN E AKSI . . .

Suma meki Gado?

Suma meki Gado?

Prakseri taki wan papa e taki nanga a boi fu en di abi seibi yari. A e taki: „Bun langa pasa, Gado meki grontapu nanga ala sani na ini, a meki a son, a mun, nanga den stari.” A boi e prakseri a tori wan pisi ten, dan a e aksi: „Papa, dan suma meki Gado?”

„Nowan sma no meki Gado”, na so a papa e piki. „A ben de ala ten kaba.” Na a momenti dati, a boi breiti nanga a piki, ma te a e kon bigi, na aksi dati e tan hari en prakseri. A no man frustan fa wan sma no kan abi wan bigin. Srefi na universum ben abi wan bigin. A e aksi ensrefi: ’Pe Gado komoto?’

Fa Bijbel e piki na aksi disi? Te yu luku en bun, dan Bijbel e piki en na a srefi fasi fa a papa na ini na eksempre ben du dati. Moses ben skrifi: „Ke Yehovah, fosi yu ben meki den bergi, noso fosi yu ben meki grontapu nanga a gron, yu ben de Gado ala ten kaba” (Psalm 90:1, 2). A profeiti Yesaya ben taki tu: „Na sabi unu no sabi disi? Noiti unu ben yere fu disi? Yehovah, a Mekiman fu den moro farawe pisi fu grontapu, na wan Gado di e tan fu ala ten”! (Yesaya 40:28) A brifi fu Yudas, e taki tu dati Gado de „sensi owruten”.Yudas 25.

Den tekst disi e sori wi taki Gado na „a têgo Kownu”, soleki fa na apostel Paulus ben taki (1 Timoteyus 1:17). Disi wani taki dati Gado ben de ala ten, awansi o fara wi e prakseri go baka. A o tan tu fu ala ten (Openbaring 1:8). Sobun, wan prenspari sani fu na Almaktiwan, na taki a ben de ala ten èn a o tan fu ala ten.

Fu san ede a muilek gi wi fu frustan a sani disi? Fu di wi no e libi langa, meki wi no man si ten soleki fa Yehovah e si ten. Fu di Gado de fu ala ten, meki gi en wán dusun yari de leki wán dei (2 Petrus 3:8). Luku na eksempre disi: Wan sprenka, di e libi sowan 50 dei nomo, o man frustan san a wani taki fu libi 70 noso 80 yari? Kwetikweti! We, Bijbel e taki dati, wi de leki sprenka te wi e teki wisrefi gersi nanga wi Gran Mekiman. Wi no man denki srefi leki fa en e denki (Yesaya 40:22; 55:8, 9). Sobun, a no e fruwondru wi taki libisma no man frustan ala sani fu Yehovah.

Aladi a kan muilek gi wi fu frustan taki Gado ben de ala ten, toku wi kan si taki a sani disi kan. Efu wan tra sma ben meki Gado, dan na a sma dati ben o de a Mekiman. Ma soleki fa Bijbel e taki, dan Yehovah na a sma di „meki ala sani” (Openbaring 4:11). Boiti dati, wi sabi taki wan ten ben de di na universum no ben de (Genesis 1:1, 2). Pe a komoto? A sma di meki en ben musu fu de fosi. A ben de tu fosi tra sani, soleki en wan-enkri Manpikin nanga den engel (Yob 38:4, 7; Kolosesma 1:15). Dati meki a de krin taki en wawan ben de fosi. A no kan taki wan sma meki en, nowan sani no ben de di ben kan meki en.

Libisma nanga na universum de leki buweisi taki wan têgo Gado de. A Sma di seti a bigi universum, a Sma di meki den wet di e tiri en, ben musu fu de ala ten. Na en wawan ben kan bro libi na ini ala tra sani.Yob 33:4.

Kon sabi moro

San Bijbel e leri wi trutru?

Suma na Gado trutru?

KON KROSIBEI NA YEHOVAH

„Yehovah abi . . . bigi makti”

A makti fu Yehovah musu meki wi frede en? Wi musu piki iya èn nôno.