Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  augustus 2014

 BIJBEL E KENKI SMA LIBI

Mi ben e feti fu puru kruktudu nanga ogri

Mi ben e feti fu puru kruktudu nanga ogri
  • A GEBORE NA INI: 1960

  • KONDRE: LIBANON

  • A BEN SABI FETI KUNG FU

A LIBI FU MI FOSI:

Mi gro kon bigi na ini Rmaysh, krosibei fu Israel nanga Libanon, na a ten di wan borgufeti ben de. Mi man memre krin ete fa landmijn ben e sutu èn fa sma ben e lasi anu nanga futu. A libi ben tranga, èn ogridu ben lai na ala sei.

Mi famiri ben de fu a Maroniet kerki, wan fu den Lomsu Kerki fu Owstu Europa. Ala ten mi papa ben e meki muiti fu sorgu a famiri fu wi di ben abi 12 sma, ma mi mama ben e sorgu taki wi ben e go na kerki. Baka wan pisi ten, mi bigin si taki neleki a heri libimakandra, kerki no ben e yepi den pôtiwan.

Di mi ben de wan tini, mi kon lobi kung fu. Mi ben e oefen hebi èn mi leri fa fu naki èn skopu sma. Mi leri tu fa fu gebroiki difrenti sortu kung fu fetisani. Mi ben denki: ’Mi no man tapu a borgufeti, ma mi kan pruberi fu tapu ogri-ati sma fu no du ogri.’ Solanga mi ben e si tu sma e feti, mi ben e pruberi fu tapu a feti. Mi ben de wan faya-ati sma, èn mi ben e lasi misrefi esi-esi. Sma na a heri zuidsei fu Libanon ben frede mi, fu di mi ben e feti nanga sma di ben e du kruktudu nanga ogri.

Na ini 1980, mi tron wan memre fu wan kung fu grupu na ini Beirut. Bom, gon, nanga raket ben sutu ibri dei, ma toku mi ben e go oefen. Ala san mi ben e du te dei opo na nyan nanga sribi, èn mi ben e libi leki Bruce Lee, wan Amerkan Sneisi di ben e prei felem èn di ben de kung fu kampioen. Mi ben seti mi wiwiri leki en, mi ben e waka leki en, èn mi ben e bari leki en te mi ben e feti kung fu. Noiti mi ben e lafu.

A FASI FA BIJBEL KENKI MI LIBI:

Mi ben wani go na China fu go leri feti kung fu moro bun. Wan neti, di mi ben e oefen hebi fu sreka misrefi gi China, mi yere wan sma e naki na a doro. Wan mati fu mi ben kon nanga tu Yehovah Kotoigi. Mi ben oefen na ini mi blaka paki èn mi heri skin ben e  lon sweti. Mi taigi den taki mi no ben sabi noti fu Bijbel. Mi no ben sabi taki sensi a momenti dati mi libi ben o kenki.

Den Kotoigi sori mi na ini Bijbel fu san ede libisma noiti o man tyari wan kaba kon na kruktudu nanga ogridu. Den sori mi taki na Satan Didibri e tyari den problema dati kon (Openbaring 12:12). Mi ben kan si na den Kotoigi taki den ben abi wan korostu firi èn taki den ben e bribi den sani di den ben e taki. Mi ben lobi a sani dati. Wan tra sani di mi ben feni moi, na taki den leri mi taki Gado abi wan nen (Psalm 83:18). Den sori mi sosrefi 1 Timoteyus 4:8, pe skrifi: „Te wi e oefen a skin, dan dati bun gi wan tu sani nomo. Ma te wi e dini Gado fayafaya, dan dati bun gi ala sani, bika dati o meki wi kisi blesi na ini a libi fu wi now èn na ini a ten di e kon.” Den wortu dati ben abi furu krakti tapu mi libi.

A de wan sari sani taki mi no ben man miti moro nanga den Kotoigi, fu di mi famiri taigi den fu no kon baka. Toku mi bosroiti fu tapu nanga kung fu èn fu bigin studeri Bijbel. Den brada fu mi no ben lobi a sani dati, ma mi ben de nomonomo fu feni den Kotoigi baka èn fu studeri Bijbel.

Mi tan suku den Kotoigi, ma mi no ben man feni den. Na a srefi ten, mi ben e sari srefisrefi di mi papa dede wantronso, èn mi ben e sari tu fu di tra problema ben miti mi famiri. Mi ben bigin wroko gi wan bow bedrijf èn wan dei, wan wrokoman drape di nen Adel aksi mi fu san ede mi ben e sari so. A bigin taki nanga mi fu a howpu di Bijbel e gi taki den dedewan o kisi libi baka. Na ini den neigi mun baka dati, a Kotoigi disi di ben abi switifasi, teki en ten fu studeri Bijbel nanga mi.

Safrisafri mi bigin si taki mi ben musu kenki den fasi fu mi. A no ben makriki. Ala ten mi ben e swa mi fesi èn pikinpikin sani ben e meki mi atibron. Bijbel yepi mi fu hori misrefi èn fu no lasi misrefi esi-esi. Fu eksempre, Mateyus 5:44 e taki fu a rai disi fu Yesus: „Tan lobi un feanti èn tan begi gi den sma di e frufolgu unu.” Romesma 12:19 e gi wi a warskow disi: „No pai wan sma gi na ogri di a du nanga yu, . . . bika Gado Buku taki: ’„Na mi o puru atibron na den tapu. Mi o pai den baka gi den ogri di den du,” na so Yehovah taki.’” Den tekst dati nanga trawan sosrefi, yepi mi safrisafri fu kon abi wan korostu firi.

DEN WINI DI MI KISI:

Na a bigin mi famiri no ben e agri nanga a bosroiti di mi ben teki fu studeri nanga Yehovah Kotoigi, ma now den kon abi lespeki gi den Kotoigi. Now wan fu den brada fu mi e anbegi Yehovah makandra nanga mi, èn mi mama ben e opo taki gi a bribi fu wi te na a dede fu en.

Gado blesi mi tu nanga mi frow Anita di de wan lobi patna gi mi. Mi nanga en e wroko 70 yuru ibri mun na ini a preikiwroko. Sensi a yari 2000, mi nanga Anita e libi na Eskilstuna, na ini Sweden, pe wi e studeri Bijbel nanga sma di e taki Arabiatongo.

Mi e firi ete gi sma di e pina fu di trawan e du ogri-ati sani nanga den. Ma fu di mi sabi fu san ede den sani disi e pasa, èn fu di mi sabi taki heri esi Gado o tyari wan kaba kon na den, meki mi de koloku èn mi abi wan korostu firi.Psalm 37:29.

Mi nanga mi frow e firi koloku na ini a preikiwroko. Wi lobi fu gi sma leri fu Yehovah