Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2014

 TORI FU A KAFTI | FU SAN EDE TAKRU SANI E PASA NANGA BUN SMA?

Takru sani e pasa na ala sei!

Takru sani e pasa na ala sei!

Smita, * ben de wan uma fu 35 yari di ben e libi na ini Dhaka, na Bangladesh. A ben de wan lobi-ati sma di ben e broko en ede nanga trawan. Sma ben sabi en leki wan uma di ben e wroko tranga èn a ben de wan koloku yongu wefi di ben wani yepi trawan fu kon sabi san a ben leri fu Gado. Den famiri nanga den mati fu Smita no ben man bribi di a kon siki wantronso èn dede wan tu dei baka dati!

James nanga en wefi, wan yongu trowpaar di ben abi sowan 30 yari, ben abi den srefi fasi leki Smita. Wan mofoyari, den go luku den mati na a west-sei fu Amerkankondre. Noiti moro den drai go baka na New York pe den ben e tan. Den lasi den libi di den kisi hebi ongoloku nanga wagi, èn a sani dati ben meki den lobiwan fu den èn den sma na den wrokope sari srefisrefi.

Yu no abi fu luku fara fu si taki ogri nanga pina lai na ini a ten disi. Borgu nanga srudati e lasi den libi na ini feti. Furu sma e pina fu di trawan e du ogri-ati sani nanga den. Sma e lasi den libi fu di den e kisi hebi mankeri, trawan e kisi siki di e malengri den, awansi den na yonguwan noso owruwan, gudusma noso pôtisma. Rampu kan pori heri libimakandra, awansi pe fu grontapu. Na ala sei sma e denki takru fu trawan èn den no e libi bun nanga trawan. Kande den sani disi miti yu tu.

Dati meki wi kan frustan te sma e poti den sortu aksi disi:

  • Fu san ede takru sani e pasa nanga bun sma?

  • Na Gado e meki den sortu sani disi pasa?

  • Rampu e pasa wantronso, noso na libisma e meki den pasa?

  • A kan taki na Karma, dati wani taki den sani di sma ben du na ini den fosi libi, e meki taki sma e pina?

  • Efu wan almakti Gado de, dan fu san ede a no e kibri bun sma gi ogri?

  • Oiti wan kaba o kon na ogri nanga pina?

Fu man piki den aksi dati, wi musu kon sabi san na a piki tapu den tu prenspari aksi disi: Fu san ede takru sani e pasa, èn san Gado o du?

^ paragraaf 3 Wi kenki den nen.