Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2014

Yu man si a Gado di sma no man si?

Yu man si a Gado di sma no man si?

„GADO na wan Yeye”, di libisma no man si (Yohanes 4:24). Ma Bijbel e taki dati son sma si Gado (Hebrewsma 11:27). Fa dati kan? A tru taki yu man si a „Gado di sma no man si”?Kolosesma 1:15.

Meki wi teki wi srefi gersi nanga wan sma di breni sensi di a gebore. A de so taki a no man frustan srefisrefi san e pasa na en lontu fu di a breni? Dati no abi fu de so. Difrenti fasi de fa wan breni sma kan kon sabi suma nanga san de na en lontu, èn sosrefi san e pasa. „Mi no e si nanga mi ai, ma mi e si nanga mi frustan”, na dati wan breni man ben taki.

Na so a de tu taki aladi yu no man si Gado nanga yu ai, toku yu kan ’opo yu ati, so taki yu kan’ si en (Efeisesma 1:18). Meki wi go luku dri fasi fa yu kan du dati.

„SMA MAN SI KRIN SORTU FASI GADO ABI”

Nofo tron wan breni sma man yere krin èn te a e fasi wan sani dan a sabi heri bun san na a sani dati. Na so a e kon sabi san na den sani di a no man si. Yu kan gebroiki yu ai, yu yesi, nanga tra sani tu fu kon sabi san de na yu lontu èn fu kon sabi a Gado di meki den sani dati èn di wi no man si. „Sensi grontapu meki, sma man si krin sortu fasi Gado abi, aladi den no man si en.” Iya, den man si den fasi fu en ’te den e luku den sani di a meki’.Romesma 1:20.

Fu eksempre, prakseri a grontapu pe wi e tan. A fasi fa grontapu meki, a no fu hori wi na libi nomo, ma a meki na so wan fasi taki wi man nyan bun fu a libi. Te wi e firi a switi winti di e wai, a waran fu a son, te wi e nyan wan switi froktu, noso te wi e yere fa den fowru e froiti so moi, dan dati e gi wi prisiri. Den sani disi no e sori taki wi Mekiman e hori wi na prakseri, taki a abi switifasi, èn taki a lobi fu gi sani?

San yu e leri fu Gado te yu e luku den sani na hemel? Wan sani, na taki den hemel e sori a makti fu Gado. Den sani di sabiman kon sabi no so langa pasa e sori taki na universum e kon moro bigi èn taki dati e pasa moro esi tu! Te yu e luku go na loktu te neti, dan prakseri a sani disi: Pe a krakti komoto di e meki taki na universum e kon moro bigi esi-esi? Bijbel e taigi wi taki a „krakti fu [a Mekiman] bigi srefisrefi” (Yesaya 40:26). Den sani di Gado meki e sori taki en na a „Almaktiwan”, a Gado di „abi bun furu krakti”.Yob 37:23.

A SMA DI „MEKI WI KON SABI EN”

Wan mama di abi tu breni pikin e taki: „Wan prenspari fasi fa den pikin disi e kon sabi sani, na te mi e taki nanga den. Taigi den ala san yu e si èn e yere, èn te yu de na dorosei nanga den, dan yu musu de klariklari fu fruteri den ala san yu e si. Yu na den ai.” Na so a de tu taki aladi „noiti wan sma si Gado”, toku Gado en Manpikin, Yesus „di de so krosibei fu a Tata, meki wi kon sabi en” (Yohanes 1:18). Leki a fosiwan fu ala den sani di Gado meki, èn leki a wan-enkri Manpikin fu Gado, Yesus tron wi „ai” di e luku na ini hemel. En na a moro bun sma di man fruteri wi sani fu a Gado di wi no man si.

Luku wan tu fu den sani di Yesus, di tan milyunmilyun yari nanga en Papa, e taigi wi fu Gado:

  • Gado e tan wroko. „Mi Tata tan wroko teleki now.”Yohanes 5:17.

  • Gado sabi san wi abi fanowdu. „Gado un Tata sabi san unu abi fanowdu, srefi bifo unu aksi en.”Mateyus 6:8.

  •  Gado e sorgu gi wi na wan lobi-ati fasi. „Un Tata di de na hemel . . . e meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti.”Mateyus 5:45.

  • Gado lobi ibriwan fu wi. „Sma e seri tu pikin fowru gi wan sensi di no warti furu, a no so? Ma toku nowan fu den fowru o fadon na gron sondro fu un Tata sabi. A Tata teri srefi ala den wiwiri na tapu un ede. Fu dati ede no frede, bika unu warti moro leki wan heri ipi pikin fowru.”Mateyus 10:29-31.

WAN LIBISMA SORI WI DEN FASI FU A GADO DI WI NO MAN SI

Nofo tron brenisma e frustan sani heri tra fasi leki sma di man si. Fu eksempre, wan breni sma no man si wan skaduw, ma a man sabi taki wan skaduw de na wan presi te a no e firi a waran fu a son drape. Neleki fa wan sma di breni no man si skaduw noso leti, na so wi no man kon sabi Yehovah sondro taki wi kisi yepi. Dati meki Yehovah sorgu taki wan sma sori wi soifri san na den fasi fu en èn fa a e denki.

A sma dati ben de Yesus (Filipisma 2:7). Yesus no ben taki nomo fu en Tata, ma a sori wi tu fa Gado de. Filipus, wan disipel fu Yesus, ben aksi: „Masra, sori wi a Tata.” Yesus piki en: „A sma di si mi, si a Tata tu” (Yohanes 14:8, 9). San yu man „si” fu a Tata te yu e luku a fasi fa Yesus ben e tyari ensrefi?

Yesus ben abi switifasi, a ben abi sakafasi, èn sma ben man taki makriki nanga en (Mateyus 11:28-30). Den moi fasi fu en ben e hari sma kon na en. Yesus ben e sari nanga trawan èn a ben e prisiri tu te den ben e prisiri (Lukas 10:17, 21; Yohanes 11:32-35). Te yu e leisi noso e yere Bijbel tori fu Yesus, dan pruberi fu si èn fu yere san ben e pasa. Efu yu e denki dipi fu a fasi fa Yesus ben e libi nanga sma, dan yu o man si den moi fasi fu Gado moro krin, èn yu o kon lobi en.

KON FRUSTAN ALA DEN SANI DI YU KON SABI

Luku san wan skrifiman ben taki fu a fasi fa wan breni sma e si den sani di e pasa na en lontu: „Wan breni sma e kon sabi sani pikinsopikinso fu di a e du difrenti sani (a e fasi, a e smeri, a e yere, èn so moro fara), èn ala den sani disi e yepi en fu frustan sani.” Na so a de tu taki te yu e luku den sani di Gado meki, te yu e leisi den sani di Yesus taki fu en Tata, èn te yu e ondrosuku a fasi fa Yesus sori den fasi fu Gado, dan yu o kon frustan den moi fasi fu Yehovah. Yu o kon si en leki wan trutru sma.

Yob, di ben e libi na ini owruten, ben ondrofeni a srefi sani dati. Na a bigin a ben e taki sani „sondro fu sabi” (Yob 42:3). Ma baka di Yob poti prakseri finifini na den moi sani di Gado meki, dan a taki: „Mi ben yere fu yu, Ma now mi eigi ai e si yu.”Yob 42:5.

’Efu yu suku Yehovah, a o meki yu feni en’

Na dati yu kan du tu. „Efu yu suku [Yehovah], a o meki yu feni en” (1 Kroniki 28:9). Yehovah Kotoigi o breiti fu yepi fu suku èn fu feni a Gado di sma no man si.