Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2014

 TORI FU A KAFTI | FU SAN EDE TAKRU SANI E PASA NANGA BUN SMA?

Takru sani e pasa nanga bun sma—Fu san ede?

Takru sani e pasa nanga bun sma—Fu san ede?

Fu di Yehovah Gado * na a Mekiman fu ala sani èn fu di a abi ala makti, meki furu sma de gaw fu taki dati na en de frantwortu gi ala den sani di e pasa na grontapu, sosrefi gi ala takru sani. Ma luku san Bijbel e taki fu a tru Gado:

  • „Ala ten Yehovah e du san reti.”Psalm 145:17.

  • „Ala ten [Gado] e du san reti. A de wan Gado di de fu frutrow. A no e du kruktudu. A de wan reti-ati sma èn a abi wan krin ati.”Deuteronomium 32:4.

  • ’Yehovah lobi sma trutru èn a abi sari-ati.’Yakobus 5:11.

A no Gado e meki taki takru sani e pasa. Ma a de so taki na en e tesi sma fu du ogri? Kwetikweti. Bijbel e taki: „Te tesi e miti wan sma, a no musu taki: ’Na Gado e tesi mi.’” Fu san ede? „Bika nowan sma kan tesi Gado nanga ogri sani èn Gado srefi no e tesi sma tu” (Yakobus 1:13). Gado no e tesi sma fu du ogri. Boiti dati, a no en e meki taki takru sani e pasa, èn a no e tesi sma tu fu du san no bun. We dan, suma de frantwortu gi den takru sani di e pasa, noso fu san ede den e pasa?

OGRI KAN MITI SMA TE DEN DE NA WAN PRESI PE OGRI E PASA

Bijbel e sori san na wan reide fu san ede sma e pina: „Ogri ten nanga sani di den no e fruwakti kan miti den alamala” (Preikiman 9:11). Te ogri noso ongoloku e pasa sondro taki sma e fruwakti dati, dan ogri kan miti wan sma te a de na a presi dati. Sowan 2000 yari pasa, Yesus Krestes ben taki fu 18 sma di ben lasi den libi fu di wan toren ben fadon na den tapu (Lukas 13:1-5). Den sma disi no ben lasi den libi fu di den ben du ogri, ma na fu di den ben de na ondro a toren na a ten di a fadon. Wan tu yari pasa, na ini yanuari 2010, wan bigi gronseki pasa na Haiti. Lanti fu Haiti taki dati moro leki 300.000 sma lasi den libi. Ala den sma dati dede, awansi suma den ben de. Sma kan kisi siki tu iniwan momenti.

Fu san ede Gado no e kibri bun sma gi rampu?

Son sma ben kan aksi: ’Gado no ben kan tapu pasi gi den bigi rampu dati? A no ben kan kibri den bun sma gi a rampu?’ Efu Gado ben musu du wan sani, dan a ben o abi fu sabi na fesi taki rampu ben o pasa. A no de fu taki dati Gado man sabi sani na fesi, ma san wi musu aksi wisrefi na disi: A de so taki ala ten Gado wani sabi na fesi sortu rampu o pasa?Yesaya 42:9.

Bijbel e taki: „A Gado fu wi de na hemel. Ala san a ben wani du, na dati a du” (Psalm 115:3). Yehovah e du san a feni prenspari, a no e du sani soso fu di a man. Na so a e bosroiti tu san a wani  si na fesi. Fu eksempre, baka di ogridu kon lai na ini den owruten foto Sodom nanga Gomora, dan Gado taigi a famiri-edeman Abraham: „Mi o saka go luku efu a tru taki den sma e du den sani di mi yere taki den e du. Efu a no de so, dan mi kan kon sabi dati tu” (Genesis 18:20, 21). Wan pisi ten, Yehovah bosroiti fu no kon sabi sortu ogri ben e pasa na ini den foto dati. Na so a de tu taki Yehovah kan bosroiti fu no sabi ala sani na fesi (Genesis 22:12). Ma disi no wani taki kwetikweti taki wan sani de di Gado no man du. Fu di Gado „e du sani di bun dorodoro”, meki a e bosroiti fu sabi sani na fesi soso te den sani dati prenspari fu man du san a abi na prakseri. Noiti a e dwengi sma fu du san a wani * (Deuteronomium 32:4). San wi kon si? Wi kon si a sani disi: Gado no feni en fanowdu fu sabi ala sani na fesi, èn en srefi e bosroiti san a wani sabi.

Fu san ede Gado no e kibri bun sma gi ogri-ati sani?

NA LIBISMA DE FRANTWORTU GI DEN OGRI DI E PASA?

Son leisi na libisma srefi de frantwortu gi den ogri di e pasa. Luku fa Bijbel e sori san kan meki taki sma e du ogri. „Ibri sma e kisi tesi fu di en eigi lostu e hari en èn e kori en. Te a kweki a lostu, a e tyari sondu kon te fu kaba. Te a sondu du kaba, dan dati e tyari dede kon” (Yakobus 1:14, 15). Te libisma e meki den sondu firi fu den basi den, dan a sani dati o tyari takru bakapisi kon gi den (Romesma 7:21-23). Soleki fa historia e sori, libisma du furu ogri-ati sani èn den tyari bun furu pina kon. Boiti dati, ogrisma kan gi trawan deki-ati fu du kruka sani, èn na so moro ogri e pasa.Odo 1:10-16.

Libisma du bun furu ogri-ati sani èn den meki taki furu sma e pina

Gado musu tapu pasi gi libisma fu no du ogri? Luku fa libisma meki. Bijbel e taki dati Gado meki libisma fu gersi en, noso fu de leki en. Sobun, libisma man sori den fasi fu Gado (Genesis 1:26). Libisma kisi a grani fu teki den eigi bosroiti, sobun den kan bosroiti fu lobi Gado èn fu du san a feni bun, so taki den kan tan bun mati fu en (Deuteronomium 30:19, 20). Efu Gado ben dwengi libisma fu du san en wani, dan a ben o tapu wi fu teki wi eigi bosroiti, a no so? Libisma ben o de leki robot di e wroko soifri soleki fa sma wani taki den wroko! Na so a de tu taki efu Gado ben seti na fesi kaba fa sani o waka nanga wi, soleki fa a leri fu Kismet e sori, dan libisma no ben o man teki den eigi bosroiti. A no de fu taki dati wi de nanga tangi taki Gado e gi wi a grani fu teki wi eigi bosroiti! Ma disi no wani taki dati den fowtu nanga den don bosroiti fu sma o meki taki libisma o tan pina fu ala ten.

 NA KARMA E MEKI TAKI SMA E PINA?

Efu yu ben o aksi wan sma fu a Hindu bribi noso a Buda bribi na aksi di skrifi tapu a kafti fu a tijdschrift disi, dan kande a ben o piki: „Takru sani e pasa nanga bun sma fu di na so a wet fu Karma e wroko. Den e koti den bakapisi fu den sani di den du na ini den fosi libi.” *

Fu kon sabi efu a leri fu Karma tru, dan a bun fu luku san Bijbel e taki fu dede. Na ini a dyari fu Eden, pe Gado ben poti libisma, a Mekiman ben taigi a fosi man, Adam: „Fu ibri bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Genesis 2:16, 17). Efu Adam no ben sondu, dan a ben o libi fu têgo. Dede na wan strafu di a kisi fu di a ben trangayesi Gado. Leki bakapisi fu dati „ala sma e dede” (Romesma 5:12). Sobun, wi kan taki dati „a pai fu sondu na dede” (Romesma 6:23). Bijbel e taki tu: „Te wan sma dede, dan a no abi fu pai gi den sondu fu en moro” (Romesma 6:7). Dati wani taki dati te wan sma dede, dan a no e pai moro gi den sondu fu den.

Milyunmilyun sma na ini a ten disi e taki dati na Karma e meki taki libisma e pina. Wan sma di e bribi a leri disi nofo tron no e broko en ede tumusi nanga a pina di e miti en noso tra sma. Ma toku a leri disi no e gi sma a howpu taki wan kaba o kon na den takru sani di e pasa. Sma e bribi taki a wan-enkri frulekti di a leri disi e gi sma, na taki te den e tyari densrefi na wan bun fasi èn te den kon abi moro sabi, dan den no o abi fu gebore ibri tron baka. A no de fu taki dati den denki disi no e kruderi kwetikweti nanga san Bijbel e taki. *

A SANI DI E MEKI TAKI OGRI E PASA!

Yu ben sabi taki a sma di abi a moro bigi frantwortu fu a pina na grontapu, na „a tiriman fu grontapu”—Satan Didibri?Yohanes 14:30

A no libisma abi a moro bigi frantwortu fu den ogri di e pasa. Satan Didibri, di ben de wan bun engel fu Gado na a bigin, ’no ben lobi san tru’, èn na so a tyari sondu kon na grontapu (Yohanes 8:44). Na en meki taki libisma opo densrefi teige Gado na ini a dyari fu Eden (Genesis 3:1-5). Yesus Krestes ben kari en „na ogriwan” èn „a tiriman fu grontapu” (Mateyus 6:13; Yohanes 14:30). Furu libisma e gi yesi na Satan èn fu dati ede den no e du bun, soleki fa Yehovah wani (1 Yohanes 2:15, 16). „Heri grontapu de na ini a makti fu na ogriwan”, na so 1 Yohanes 5:19 e taki. Tra engel de tu di tron ogri yeye èn den e horibaka gi Satan. Bijbel e taki dati Satan nanga den ogri yeye fu en e „kori sma na heri grontapu”, èn na dati e meki taki ogri e pasa na heri grontapu (Openbaring 12:9, 12). Sobun, na Satan Didibri abi a moro bigi frantwortu fu den ogri di e pasa.

A de krin taki a no Gado e meki taki ogri e pasa nanga sma. A no en e meki tu taki den e pina. Ma a pramisi taki a o tyari wan kaba kon na ogridu, soleki fa a tra artikel o sori.

^ paragraaf 3 Yehovah na a nen fu Gado soleki fa a skrifi na ini Bijbel.

^ paragraaf 11 Efu yu wani sabi fu san ede Gado e gi pasi taki ogri e pasa, dan luku kapitel 11 fu a buku San Bijbel e leri wi trutru? Yehovah Kotoigi tyari en kon na doro.

^ paragraaf 16 Fu man sabi pe a leri di sma sabi leki a wet fu Karma komoto, dan luku bladzijde 8-12 fu a brochure San e pasa nanga wi te wi dede? Yehovah Kotoigi tyari en kon na doro.

^ paragraaf 18 Fu kon sabi san e pasa nanga den dedewan èn sortu howpu de gi den, soleki fa Bijbel e leri, dan luku kapitel 6 nanga 7 fu a buku San Bijbel e leri wi trutru?