Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuni 2014

Sortu howpu de gi den afo fu mi?

Sortu howpu de gi den afo fu mi?

WAN pisi ten pasa, a moi sani disi ben skrifi na ini wan koranti fu Korea: „’Wi lobi Shim Cheong,’ di no ben sabi noti fu Yesus—A go na hel?” (The Chosun Ilbo)

Den wortu disi ben hari sma prakseri, fu di Shim Cheong na wan lobi-ati yongu uma na ini wan owruten tori fu den Koreasma. Na uma disi ben gebroiki en heri libi fu yepi en papa di ben breni. Na ini den yari di pasa, na uma disi kisi furu grani. Fu taki en leti, sma na ini Korea e si Shim Cheong leki wan heri bun umapikin.

Gi furu sma, a no de wan reti sani kwetikweti taki so wan sma ben o bron na ini helfaya, soso fu di a no ben de wan dopu Kresten. A sani disi e meki sma atibron srefi. Te yu luku en bun, dan a boskopu fu Krestes no ben doro ete na ini a dorpu fu en na a ten dati.

Na ini na artikel sma ben poti aksi tu gi wan domri. Den ben aksi en efu den sma di dede sondro taki den ben kisi okasi fu leri sabi Yesus, ben go na hel. San a piki? „Wi no sabi. Wi denki taki Gado sabi san a o du nanga [den sortu sma disi].”

WAN SANI DI DE FANOWDU FU KISI FRULUSU

A buku The New Catholic Encyclopedia e taki: „Wan sma musu dopu fu man kisi frulusu. Krestes srefi ben taki dati efu wan sma no gebore fu watra nanga yeye, dan a no sa man go na ini a Kownukondre fu Gado (Jn 3.5).” Dati meki son sma e bribi taki den sma di dede sondro taki den dopu e go na hel noso den e pina na wan tra fasi baka te den dede.

Ma furu sma de di no e agri kwetikweti nanga a leri disi. Milyunmilyun sma dede sondro fu kon sabi san Bijbel e leri. A fiti taki den e pina fu têgo? San Bijbel e taki fu a tori disi?

A HOWPU DI BIJBEL E GI

Bijbel e sori krin taki Gado no frigiti den sma di no ben kon sabi a wani fu en. Tori fu den apostel 17:30 e pramisi: „Gado no e poti prakseri na a ten di sma ben du sani sondro fu sabi.” We dan, sortu howpu Bijbel abi gi den wan di dede sondro fu kisi na okasi fu kon sabi Gado?

„Yu o de nanga mi na ini Paradijs.” San a pramisi disi fu Yesus wani taki?

Wi kan feni a piki te wi e luku san Yesus ben taigi wan fu den ogriman di dede na en sei. A man ben taigi Yesus: „Memre mi te yu kon na ini yu Kownukondre.” San Yesus piki en? A taigi en: „Fu tru, mi e taigi yu tide: Yu o de nanga mi na ini Paradijs.”Lukas 23:39-43.

Yu denki taki Yesus ben pramisi a man taki a ben o go na hemel? Nôno. A man no ben „gebore baka” fu watra nanga yeye, wan sani di de fanowdu fu man go na ini a Kownukondre fu hemel (Yohanes 3:3-6). Na presi fu dati, Yesus ben e pramisi a man taki a ben o libi baka na ini Paradijs. Fu di a man disi ben de wan Dyu, meki a kan taki a ben sabi fu a Paradijs na grontapu, a dyari fu Eden, di a fosi buku fu Bijbel e taki fu en (Genesis 2:8). A pramisi fu Yesus ben gi a man a howpu taki seiker a o kisi wan opobaka te a Paradijs seti baka na grontapu.

Fu taki en leti, Bijbel e pramisi taki „Gado sa gi wan opobaka na den sma di du san reti èn na den sma di no du san reti” (Tori fu den apostel 24:15). Den „sma di no du san reti” na den wan di no ben du san Gado wani, fu di den no ben sabi san na a wani fu Gado. Yesus o gi na ogriman di ben taki nanga en èn ’di no ben du san reti’ wan opobaka, makandra nanga milyunmilyun tra sma, kande milyardmilyard sma srefi, di dede sondro taki den ben sabi Gado. Dan te den de na ini Paradijs na grontapu, den o leri san Gado wani èn den o abi na okasi fu gi yesi na den komando fu Gado fu man sori taki den lobi en.

TE DEN SMA DI NO DU SAN RETI O KISI WAN OPOBAKA

Yu den denki taki te den sma di no du san reti kisi wan opobaka, dan Gado o krutu den fu den  sani di den ben du? Nôno. Romesma 6:7 e taki: „Te wan sma dede, dan a no abi fu pai gi den sondu fu en moro.” Den sma di no du san reti pai gi den sondu fu den fu di den dede. Sobun, Gado no o krutu den fu den sani di den ben du fosi den dede di den no ben sabi Gado, ma a o krutu den fu den sani di den o du baka te den kisi wan opobaka. Sortu wini den o kisi?

Baka te den sma di no du san reti” e kisi wan opobaka, den o kisi na okasi fu leri sabi den wet fu Gado, di o de na ini den nyun bukulolo di o opo. Dan Gado o krutu den „fu den sani di den du”, dati wani taki dati a o luku efu den gi yesi na den wet fu en noso efu den no du dati (Openbaring 20:12, 13). Furu fu den sma di no du san reti, o leri sabi a wani fu Gado èn te den e du san den leri, dan disi o de a fosi okasi di den o kisi fu libi fu têgo.

A Bijbel leri disi yepi furu sma fu kon abi bribi baka na ini Gado. Yeong Sug ben de wan fu den sma dati. A kweki na ini wan osofamiri di ben de fayafaya Lomsu. Wan tu sma fu en famiri ben de priester. Fu di a ben wani tron wan non, meki a go tan na ini wan klooster. Bakaten a gowe libi a klooster fu di a no ben lobi den sani di ben e pasa drape. Boiti dati a no ben man agri nanga a leri di e taki dati sma o bron na ini hel, fu di a ben feni taki a sani dati no ben o bun èn a no ben o de wan lobi-ati sani tu.

Wan leisi, wan Kotoigi fu Yehovah sori Yeong Sug a Bijbeltekst disi: „Den libiwan sabi taki den o dede. Ma den dedewan no sabi notinoti èn den no e kisi pai moro tu” (Preikiman 9:5). Den Kotoigi yepi en fu kon frustan taki den afo fu en no e pina na ini helfaya. Ma den e sribi na ini dede, èn den e wakti fu kisi wan opobaka.

Fu di Yeong Sug sabi taki furu sma noiti no yere san Bijbel e leri trutru, meki den wortu disi fu Yesus na Mateyus 24:14 naki en ati: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.” Now a e preiki a bun nyunsu èn a e fruteri trawan fu a moi howpu fu Bijbel.

„GADO NO LOBI A WAN SMA MORO A TRAWAN”

„Gado no lobi a wan sma moro a trawan,” na so Bijbel e taki, „ma awansi fu sortu kondre wan sma de, efu a e lespeki Gado èn a e du san reti, dan Gado feni en bun” (Tori fu den apostel 10:34, 35). Na disi wi kan fruwakti fu a Gado di ’lobi retidu èn di lobi te sma e koti krutu na wan reti fasi’.Psalm 33:5.