Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  mei 2014

Yu ben sabi a sani disi?

Yu ben sabi a sani disi?

Fu san ede sma ben e broko den futu fu ogriman di ben kisi dedestrafu?

Na Evangelietori e taki a sani disi fu Yesus nanga den tu ogriman di ben anga na wan pinapostu: „Den [Dyu] aksi Pilatus fu broko den futu fu den man èn fu puru den dedeskin.”Yohanes 19:31.

A wet fu den Dyu ben e taki dati te den kiri wan ogriman èn den anga en na wan postu, dan den ’no ben musu meki a dedeskin anga drape heri neti’ (Deuteronomium 21:22, 23). Soleki fa a sori, dan den Dyu ben e du a srefi sani disi te den Romesma ben anga sma na wan postu. Dati meki den ben e broko den futu fu den man disi, so taki den ben kan dede moro gaw. Na so den ben kan beri den fosi a Sabat bigin te son dongo.

Nofo tron te wan ogriman ben kisi dedestrafu, dan sma ben e spikri en anu nanga en futu na wan postu. Te den ben opo a postu tanapu, dan a ben e firi hebi pen, fu di en heri skin ben e anga na a postu. Fu man hari bro, a ben o abi fu pusu ensrefi go na loktu nanga en futu. Efu en futu ben broko, dan a no ben o man du dati èn na so a ben o dede moro gaw.

Fa fetiman fu owruten ben e gebroiki slenger?

Na wan slenger David ben gebroiki fu kiri a langa bigiskin man Goliat. Soleki fa a sori, dan David ben leri gebroiki slenger di a ben e luku skapu leki yongu boi.1 Samuel 17:40-50.

Wan prenki fu Asiria fetiman di e slenger ston go tapu wan Dyu foto

A slenger de fu si na ini den prenki fu den Egeptesma nanga den Asiriasma fu Bijbel ten. A slenger ben abi wan pisi leer noso wan pisi krosi di ben fasi na tu titei noso banti. Wan fetiman ben e poti wan grati ston di ben bigi leki wan pikin apresina na ini a pisi leer. A ben e drai a slenger na loktu, dan a ben e lusu wan fu den banti, so taki a ston ben kan frei gowe bun tranga fu doro soifri pe a ben musu doro.

Sma di diki sani puru na ini a gron na a Mindri Owstusei, feni furu slenger ston di fetiman fu owruten ben gebroiki. Wan bun fetiman ben kan slenger ston so tranga, taki a ston ben e frei nanga wan snelheid fu 160 te go miti 240 kilometer wán yuru. Sabiman no e agri nanga makandra taki a ston fu wan slenger ben kan doro leti so fara leki wan peiri. Ma neleki a bo, a slenger ben kan kiri sma tu.Krutuman 20:16.