Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  mei 2014

 TEKI NA EKSEMPRE FU SMA DI BEN ABI BRIBI | MARIA

A horidoro aladi wan tumusi sari sani ben miti en

A horidoro aladi wan tumusi sari sani ben miti en

MARIA e fadon tapu en kindi fu di a e sari so te taki a no sabi san fu taki. A kan yere ete fa en manpikin di ben pina omeni yuru langa, e bari fu a lasti leisi fosi a dede. Dungru fadon aladi na mindridei ete. A gron e bigin seki hebi (Mateyus 27:45, 51). Kande Maria e denki taki na Yehovah srefi e meki sma kon sabi taki moro leki iniwan sma, a e sari taki Yesus Krestes dede.

A leti fu a bakadina e bigin skèin na ini Golgota, noso Edekrabasi Presi, di ben kon dungru wantronso. Maria e sari gi a manpikin fu en (Yohanes 19:17, 25). Kande a e bigin memre wan lo sani. A kan taki a e memre wan sani di ben pasa sowan 33 yari na fesi. Di en nanga Yosef tyari a moi beibi fu den go na a tempel na ini Yerusalem fu tyari wan ofrandi, dan a yeye fu Gado ben meki wan owru man di nen Simeon taki wan profeititori. A ben taki fu den bigi sani di Yesus ben o du, ma a taki tu dati wan dei, Maria ben o firi neleki wan langa feti-owru boro en (Lukas 2:25-35). Now fosi Maria ben e frustan krin san den wortu dati ben wani taki.

Maria ati ben furu nanga sari

Sma e taki dati te yu eigi pikin dede, dan dati na wan fu den moro hati sani di kan miti yu. Dede na wan bigi feanti, èn awansi fa a no fa, wi alamala e kisi fu du nanga en (Romesma 5:12; 1 Korentesma 15:26). Wi man horidoro te so wan sari sani miti wi? Te wi e luku fa a libi fu Maria waka sensi a bigin fu Yesus en diniwroko teleki a dede fu en, èn syatu baka dati, dan wi o si fa a bribi fu Maria yepi en fu horidoro aladi a ben sari srefisrefi.

„UN MUSU DU ALA SAN A E TAIGI UNU”

Meki wi go baka dri nanga afu yari fosi a dede fu Yesus: Maria ben frustan taki wan kenki ben o kon. Srefi na ini a pikin foto Nasaret, sma ben e taki fu Yohanes a Dopuman èn fu a boskopu fu en di ben e gi sma deki-ati fu sori berow. Maria ben kan si taki a moro bigi manpikin fu en ben e si a nyunsu dati leki wan marki taki a ten ben doro fu bigin nanga a diniwroko fu en (Mateyus 3:1, 13). Maria nanga en osofamiri ben sabi taki a libi ben o kon moro muilek gi den te Yesus ben o gowe fu oso. Fu san ede?

A kan taki Maria en masra, Yosef, ben dede kaba. Efu dati ben de so, dan Maria ben sabi san a wani taki fu lasi wan lobiwan. * Sma ben gwenti kari Yesus, „a manpikin fu a temreman”, ma now den ben e kari en „a temreman” tu. Soleki fa a sori, dan Yesus ben teki a wroko fu en kwekipapa abra. A ben e sorgu gi en mama nanga sowan siksi pikin di ben gebore baka en (Mateyus 13:55, 56; Markus 6:3). Awansi Yesus ben leri en pikin brada Yakobus a wroko, toku a no ben o makriki gi a famiri te a moro bigi manpikin ben gowe fu oso. Maria ben abi en muilek kaba. A ben o man nanga a kenki disi? Wi no sabi. Ma wan moro prenspari aksi na: San a ben o du te Yesus fu Nasaret ben o tron Yesus Krestes, a Mesias di Gado ben pramisi langa ten na fesi? Wan tori na ini Bijbel e fruteri wi pikinso fu a sani dati.Yohanes 2:1-12.

 Yesus go na Yohanes so taki a ben kan dopu en, èn na so a tron a Salfuwan fu Gado, noso a Mesias (Lukas 3:21, 22). Baka dati, a bigin teki sma fu tron en disipel. Aladi a wroko fu en ben prenspari srefisrefi, toku a ben e teki ten fu meki prisiri nanga famiriman nanga mati. Makandra nanga en mama, en disipel, nanga den brada fu en, a go na wan trowfesa na ini Kana, wan foto di ben de na tapu wan bergi sowan 13 kilometer moro fara fu Nasaret. Na a fesa disi, Maria kon si taki wan problema ben de. Kande a ben si taki wan tu sma fu a famiri fu a trowpaar ben e bruya èn taki den ben e syusyu nanga makandra. Win no ben de moro! Na ini a kulturu fu den, so wan sani ben de wan syen gi a famiri, èn a ben kan pori a heri fesa. Maria ben e firi gi den sma disi, èn a go suku yepi na Yesus.

„Den no abi win moro”, na so a taigi en manpikin. San a ben wani taki Yesus du? Wi no sabi, ma a ben sabi taki en manpikin ben de wan prenspari sma di ben o du bigi sani. Kande a ben howpu taki a ben o bigin now. Fu taki en leti, a ben taigi en: „Mi manpikin, mi e begi yu, du wan sani!” A ben musu fu skreki fa Yesus piki en. Yesus ben taigi en: ’Uma, san mi nanga yu abi fu du nanga a sani dati?’ A no taki Yesus no ben abi lespeki gi en mama, soleki fa son sma e denki. Ma fu taki en leti, a e piri-ai gi en mama na wan switi fasi. Yesus ben wani sori en mama taki a no en ben musu taigi en fa a musu du a diniwroko fu en. Na en Papa, Yehovah, ben musu du dati.

Maria teki a piri-ai fu en manpikin fu di a ben abi safri-ati nanga sakafasi. A taigi den yepiman fu a fesa a sani disi nomo: „Un musu du ala san a e taigi unu.” Maria ben si taki a no ben abi a reti moro fu taigi en manpikin san fu du. Na presi fu dati, en nanga trawan ben musu arki now san Yesus ben e taigi den. Ma Yesus sori taki neleki en mama, a ben e firi gi a nyun trowpaar, dati meki a du a fosi wondru fu en. A kenki watra kon tron win. San ben de a bakapisi? „Den disipel fu en ben bribi na ini en.” Maria srefi poti bribi na ini Yesus. A no ben e si en nomo leki en manpikin, ma leki en Masra nanga en Frulusuman.

Papa nanga mama na ini a ten disi kan leri furu fu a bribi fu Maria. A tru taki noiti wan tra sma kweki wan pikin di ben de leki Yesus. Ma te wan pikin, awansi fa a de, e kon tron wan bigisma, dan a sani dati kan tyari wan tu problema kon. Kande wan papa noso wan mama e tan si a pikin fu en di kon bigi kaba, leki wan pikin-nengre (1 Korentesma 13:11). Fa wan papa noso wan mama kan de wan yepi gi en pikin di kon bigi kaba? Wan fasi, na te den e sori a manpikin noso na umapikin fu den taki den abi a frutrow taki a o tan du san Bijbel e leri so taki Yehovah e blesi en. Te wan papa noso wan mama e sori taki den abi a bribi nanga a frutrow na ini den pikin fu den di kon bigi kaba, dan dati o de wan bigi yepi gi den pikin dati. Wi kan de seiker taki Yesus ben breiti nanga a yepi di a ben e kisi fu Maria na ini den yari di a ben e du a diniwroko fu en.

„DEN BRADA FU EN NO BEN E BRIBI NA INI EN”

Den Evangelietori no e taigi wi furu fu Maria na ini den dri nanga afu yari fu Yesus en diniwroko. Ma hori na prakseri taki a kan taki en masra ben dede, èn taki na en wawan ben e sorgu den yongu pikin fu en. Wi kan frustan fu san ede a no ben man go nanga Yesus di a ben e preiki na ini a heri kondre fu en (1 Timoteyus 5:8). Toku a tan denki dipi fu den sani di a ben kon sabi fu a Mesias èn soleki fa a famiri ben gwenti, a tan go na den konmakandra di ben e hori na ini a snoga drape.Lukas 2:19, 51; 4:16.

 Yu denki taki a ben e sidon na mindri den sma di Yesus ben e gi leri na ini a snoga na Nasaret? A ben musu fu breiti fu yere fa en manpikin meki bekènti taki wan profeititori di ben taki hondrohondro yari na fesi fu a Mesias, kon tru na ini en! Ma a ben musu fu firi sari di a si taki den sma fu Nasaret no ben e bribi na ini a manpikin fu en. Den pruberi srefi fu kiri en!Lukas 4:17-30.

Wan tra sani di ben e gi en broko-ede, na a fasi fa den tra manpikin fu en ben e libi nanga Yesus. Yohanes 7:5 e sori taki den fo brada fu Yesus no ben abi a srefi bribi leki den mama. Drape skrifi: „Den brada fu en no ben e bribi na ini en.” Bijbel no e taki noti fu den sisa fu Yesus, èn a ben abi awansi tu sisa. * Awansi fa a no fa, Maria kon sabi san a wani taki fu libi na ini wan oso pe ala sma no abi a srefi bribi. A ben musu du muiti fu tan hori ensrefi na den tru tori fu Gado, aladi a ben e suku fu wini na ati fu den tra pikin fu en, sondro fu dwengi den noso fu haritaki nanga den.

Wan leisi, wan tu famiriman fu Yesus, sosrefi den brada fu en, bosroiti fu go „grabu” Yesus. Den ben taki: „A lasi en frustan” (Markus 3:21, 31). A no de fu taki dati Maria no ben e denki so, ma toku a go nanga den manpikin fu en. Kande a ben howpu taki den ben o leri wan sani di ben o yepi den fu kon abi moro bribi. Na dati pasa? Aladi Yesus tan du bigi wondru èn a tan leri sma moi sani fu Gado, toku den tra manpikin fu Maria no poti bribi na ini en. Yu denki taki a ben kon weri fu di a no ben sabi moro fa fu doro den ati?

Yu de na ini wan osofamiri pe ala sma no abi a srefi bribi? Yu kan leri furu fu a bribi fu Maria. A no lasi howpu gi den pikin fu en. Na presi fu dati a meki den si taki a bribi fu en ben e gi en prisiri èn wan korostu firi. Ma a tan horibaka gi a manpikin fu en di ben e gi yesi na Gado. A ben e misi Yesus? Yu denki taki a ben winsi son leisi taki a ben de makandra nanga Yesus èn nanga den tra pikin? Efu dati de so, dan a dwengi ensrefi. A ben e si en leki wan grani fu horibaka gi Yesus èn fu de wan deki-ati gi en. Yu denki taki yu kan yepi den pikin fu yu fu poti Gado na a fosi presi na ini den libi?

„YU O FIRI NELEKI WAN LANGA FETI-OWRU BORO YU”

Maria kisi blesi fu di a ben poti bribi na ini Yesus? Ala ten Yehovah e blesi sma di abi bribi, èn na dati a du tu nanga Maria (Hebrewsma 11:6). Prakseri fa a ben firi te a ben e yere fa en manpikin e gi leri, noso te tra sma ben e fruteri en fu den sani di en manpikin ben e preiki.

Furu fu den agersitori fu Yesus e sori taki a ben kisi bun leri fu Yosef nanga Maria

Yu denki taki den agersitori fu Yesus ben meki Maria memre a ten di a ben e gro kon bigi na ini Nasaret? Yesus ben taki fu wan uma di ben figi en oso fu feni wan solfru moni, fu wan uma di ben e mara blon fu meki brede, èn fu wan sma di ben leti wan lampu èn poti en na tapu wan hei presi. Yu denki taki Maria ben prakseri a pikin boi dati di ben de na en sei te a ben e du den sortu wroko dati? (Lukas 11:33; 15:8, 9; 17:35) Wan leisi, Yesus ben taki tu dati en tyatyari switi fu tyari èn taki en lai lekti. Yu denki taki a sani disi ben meki Maria prakseri wan sani di ben pasa langa ten kaba? Kande a ben prakseri wan moi bakadina di a ben e luku fa Yosef ben e leri a yongu boi Yesus fa fu meki wan tyatyari na so wan fasi taki wan meti ben o man tyari en makriki (Mateyus 11:30). A ben musu fu de so taki Maria ben e firi koloku te a ben e prakseri a grani di Yehovah ben gi en. A ben mag yepi fu kweki a manpikin di ben o tron a Mesias. A ben musu fu prisiri te a ben e arki Yesus, a moro bigi  leriman di oiti ben de na grontapu, èn di ben e gebroiki aladei sani fu leri sma den moro dipi tori!

Toku Maria tan sori sakafasi. Noiti Yesus ben wani taki sma gi en mama tumusi furu grani noso taki sma anbegi en. Di Yesus ben e du a diniwroko fu en, dan wan uma na mindri den sma bari taki Yesus en mama ben musu fu firi koloku taki a meki so wan manpikin. Yesus piki na uma: „Nôno, koloku fu den sma di e yere a wortu fu Gado èn di e du san a wortu e taki!” (Lukas 11:27, 28) Di wan tu sma di ben kon makandra sori Yesus taki en mama nanga den brada fu en ben de drape tu, dan a taigi den sma taki den wan di ben abi bribi ben de en trutru mama nanga brada. Maria no atibron srefisrefi fu a sani dati, fu di a ben frustan san Yesus ben wani taki. Famiriman no musu de moro prenspari gi wi leki den Kresten brada nanga sisa fu wi.Markus 3:32-35.

Ma wortu no man taki fa a ben hati Maria fu si fa en manpikin ben e pina na a postu teleki a dede. Na apostel Yohanes di ben si ala den sani disi, ben skrifi disi bakaten: A dei dati, Maria ben e tanapu „na a pinapostu fu Yesus”. Noti ben man tapu pasi gi a lobi-ati mama disi fu de na en manpikin sei te na a lasti momenti fu en libi. Yesus si en èn aladi a ben e firi hebi pen te a ben e taki, toku a du dati. A gi Yohanes, na apostel di a ben lobi so te, a frantwortu fu sorgu en mama. Fu di den brada fu Yesus no ben teki a bribi fu en ete, meki Yesus no gi nowan fu den a frantwortu fu sorgu en mama. Na presi fu dati, a gi a frantwortu dati na wan reti-ati bakaman fu en. Na so Yesus sori o prenspari a de taki wan man di e anbegi Gado e sorgu en osofamiri, spesrutu te a abi fu du nanga na anbegi.Yohanes 19:25-27.

Di Yesus dede te fu kaba, dan Maria firi a pen di a profeiti ben taki fu en langa ten na fesi. A ben e firi neleki wan langa feti-owru ben boro en. Efu wi no man frustan fa a ben e sari, dan seiker wi no o man frustan fa a ben prisiri baka dri dei. Maria yere fu a moro bigi wondru di oiti pasa. Yesus ben opo baka! A ben abi leti fu de nanga prisiri fu di Yesus sori ensrefi bakaten na en afubrada Yakobus di en wawan ben de (1 Korentesma 15:7). A sani dati ben naki na ati fu Yakobus nanga den tra afubrada fu Yesus. Ma wi kon sabi taki te fu kaba den kon bribi taki Yesus na a Krestes. Syatu baka dati, den ben de na den Kresten konmakandra makandra nanga den mama, pe den ben e „tan begi” (Tori fu den apostel 1:14). Bakaten tu fu den, Yakobus nanga Yudas, skrifi buku fu Bijbel.

Maria ben breiti fu si taki den tra manpikin fu en tron reti-ati Kresten

A lasti sani di wi e leisi fu Maria, na taki en nanga den manpikin fu en ben de na den konmakandra e begi. Dati na wan moi fasi fa Bijbel e kaba nanga a tori fu Maria, èn a no de fu taki dati a de wan moi eksempre gi wi! Fu di a ben abi bribi, meki a ben man horidoro aladi wan tumusi sari sani ben miti en, èn a kisi wan tumusi moi grani bakaten. Te wi e sori bribi neleki Maria, dan wi o man horidoro tu awansi sortu sari sani e miti wi na ini a grontapu disi, èn wi o kisi blesi di wi no ben fruwakti.

^ paragraaf 8 Den Evangelietori ben taki ete fu Yosef di wan sani ben pasa na a ten di Yesus ben abi 12 yari, ma baka dati den no e taki moro fu en. Bakaten Bijbel e taki soso fu Yesus en mama nanga den tra pikin, ma a no e taki fu Yosef. Wan leisi, Bijbel kari Yesus „a manpikin fu Maria”, ma a no taki fu Yosef.Markus 6:3.

^ paragraaf 16 Yosef no ben de a trutru papa fu Yesus, sobun den tra pikin ben de afubrada nanga afusisa fu Yesus.Mateyus 1:20.