Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  april 2014

Yu man wini tesi!

Yu man wini tesi!

„Mi no ben go tapu Internet nanga a denki fu go luku porno. Ma di mi go, dan wantronso wan porno site opo kon. Mi lasi misrefi èn mi opo en fu si san na en.”—CODY. *

„Wan moi dame na mi wrokope ben bigin suku mi. Wan dei a aksi mi fu go nanga en na wan hotel. Mi ben sabi krin san a ben wani.”—DYLAN.

„M I MAN wini ala sani, boiti tesi.” A sani disi di furu sma gwenti taki, e sori krin taki dipi na ini den ati den lobi te den e kisi tesi. Ma tra sma e si tesi leki wan bigi feanti di e tan trobi den, èn den ben o wani wini en trutru. Fa a de nanga yu? Te yu e kisi tesi, yu musu gi abra noso yu musu feti nanga en?

A no de fu taki dati a no ala tesi e tyari bigi problema kon. Fu eksempre, te yu wani lasi wan tu kilo, dan yu no o dede efu yu nyan wan pisi kuku. Ma te yu e gi abra na tra tesi, spesrutu den wan di kan meki yu du hurudu, dan dati kan tyari bigi problema kon gi yu. Bijbel e gi wi a warskow disi: „Wan man di e du sutadu . . . no abi frustan. A sma di e du so wan sani, e pori en eigi libi.”Odo 6:32, 33.

San yu musu du efu wantronso yu e kisi tesi fu du hurudu? Bijbel e taki: „Disi na san Gado wani: un musu de santa èn un no musu du hurudu. Ibriwan fu unu musu sabi fa fu basi en eigi skin so taki unu de santa èn so taki Gado feni unu bun” (1 Tesalonikasma 4:3, 4). Fa yu kan leri fu dwengi yusrefi? Luku dri sani di kan yepi yu.

A fosi sani: Sabi san yu e luku

Te wi e luku sani di abi fu du nanga seks, dan dati kan wiki den seksfiri fu wi. Yesus ben sabi taki a sani disi tru èn dati meki a e warskow wi: „Iniwan sma di e tan luku wan uma nanga tranga lostu gi en, du sutadu nanga en kaba na ini en ati.” A e gebroiki wan agersitori di e sori wi krin san wi musu du: „Fu dati ede, efu yu retisei ai e meki yu sondu, dan hari en puru èn trowe en gowe” (Mateyus 5:28, 29). San Yesus wani leri wi? A wani leri wi taki wi musu du wan sani wantewante te wi e kisi tesi. Wi no musu tan luku prenki noso sani di kan wiki den seksfiri fu wi.

Drai yu fesi puru te yu e si seks prenki

 Luku na eksempre disi: Kon meki wi taki dati wan sma e las, èn yu ai e fadon na tapu a faya. Yu ben o tan luku en? Kwetikweti! Yu ben o drai yu fesi puru, noso yu ben o tapu yu ai. Na so a de tu taki te yu ai e fadon tapu wan sani di kan wiki den seksfiri fu yu, kande wan prenki, wan sani na tapu computer noso TV, noso kande na wan sma srefi, dan drai yu fesi puru wantewante. Kibri yu frustan so taki a no e pori. Juan, wan man di no ben man tapu fu luku porno, e taki: „Te mi e si wan moi uma, dan nofo tron mi e firi fu luku en wan tu leisi. Dati meki mi e dwengi misrefi fu drai mi fesi puru, èn mi e taigi misrefi: ’Begi Yehovah! Begi Yehovah nownow!’ Baka te mi begi, dan heri esi a firi e gowe.”Mateyus 6:9, 13; 1 Korentesma 10:13

Prakseri sosrefi a reti-ati man Yob, di ben taki: „Mi meki wan frubontu nanga mi ai. Sobun, fa mi kan luku wan tra uma na wan fasi di no fiti?” (Yob 31:1) Fu san ede yu no e teki a bosroiti dati?

Pruberi fu du disi: Efu yu ai e fadon tapu wan sani di abi fu du nanga seks, dan drai yu fesi puru wantewante. Du leki a Bijbel skrifiman di ben begi: „No meki mi ai si sani di no bun.”Psalm 119:37.

A di fu tu sani: Kibri yu denki

Fu di wi alamala abi sondu, meki son leisi wi e kisi takru lostu. Bijbel e taki: „Ibri sma e kisi tesi fu di en eigi lostu e hari en èn e kori en. Te a kweki a lostu, a e tyari sondu kon te fu kaba” (Yakobus 1:14, 15). Fa yu kan sorgu taki a sani disi no e pasa nanga yu?

Te yu abi takru prakseri, dan begi wantewante

Te yu abi takru lostu, dan hori na prakseri taki a de na yu sortu bosroiti yu o teki. Du tranga muiti fu basi den lostu dati. Rutu den puru. Weigri fu tan prakseri sani di no fiti. Wan man di nen Troy, ben abi a takru gwenti fu luku porno tapu Internet. A e taki: „Mi ben e denki soso bun sani, soso fu man puru den takru prakseri na mi ede. A no ben makriki. Mi fadon go baka na ini a takru  gwenti omeni leisi. Ma te fu kaba mi leri fu basi a denki fu mi.” Wan uma di nen Elsa, ben feti nanga wan takru lostu di a ben de wan tini. A e taki: „Mi tan teki prati na a diniwroko èn mi tan begi Yehovah. Na so mi ben man basi den takru prakseri fu mi.”

Pruberi fu du disi: Te yu e kisi takru lostu, dan begi wantewante. Basi den takru lostu. Yu kan du dati te yu e prakseri „ala sani di tru, ala sani di seryusu, ala sani di reti, ala sani di krin, ala sani di e meki sma sori lobi, ala sani di sma e taki bun fu den, ala sani di bun nanga ala sani di warti fu sma prèise den”.Filipisma 4:8.

A di fu dri sani: Luku bun san yu e du

Te wan sma di abi tranga lostu e kisi tesi èn a e feni okasi fu du san a e firi, dan a kan kisi problema makriki (Odo 7:6-23). Fa yu kan sorgu taki a sani disi no e miti yu?

„Mi e go tapu Internet soso te tra sma de na oso”

Bijbel e gi wi a bun rai disi: „A koniwan si taki ogri o miti en èn a go kibri, ma a sma sondro ondrofeni waka go doro èn dati meki a musu kisi strafu” (Odo 22:3). Fu dati ede yu musu luku bun san yu e du. Pruberi fu si na fesi sortu problema kan miti yu, èn wai pasi gi den (Odo 7:25). Wan man di nen Filipe ben man basi a takru gwenti di a ben abi fu luku porno. A e taki: „Mi poti a computer fu wi na wan presi pe ala sma na ini a oso man si en èn mi poti wan programa gi en di e sorgu taki mi no man luku porno tapu Internet. Boiti dati, mi e go tapu Internet soso te tra sma de na oso.” Troy di wi ben kari kaba, e taki tu: „Mi no e luku felem di e wiki den seksfiri fu mi èn mi no e bemui nanga sma di e taki wan lo fisti seks tori. Mi no wani poti misrefi na ini problema.”

Pruberi fu du disi: Ondrosuku san na den swakifasi fu yu èn bosroiti na fesi fa yu kan wai pasi gi situwâsi di kan tron wan tesi gi yu.Mateyus 6:13.

NO GI ABRA!

Ma kon meki wi taki dati aladi yu meki furu muiti fu basi den takru lostu fu yu, toku yu e fadon baka. No lasi-ati èn no gi abra. Bijbel e taki: „Awinsi wan reti-ati sma fadon seibi tron a o opo tanapu” (Odo 24:16). Iya, wi Papa na hemel e gi wi deki-ati fu „opo tanapu”. Yu o teki a yepi di a e gi yu na wan lobi-ati fasi? We, noiti no kon weri fu begi en fu yepi yu. Studeri a Wortu fu en fu tranga a bribi fu yu. Go na den Kresten konmakandra fu feni krakti fu man horidoro. Kisi deki-ati fu a sani disi di Gado e pramisi: „Mi o meki yu kon tranga. Mi o yepi yu trutru.”Yesaya 41:10.

Cody, di wi ben kari na a bigin, e taki: „Mi ben musu meki tranga muiti fu tapu nanga a gwenti di mi ben abi fu luku porno. Mi fadon baka omeni leisi, ma Gado yepi mi so taki mi wini a feti te fu kaba.” Dylan, di wi ben kari tu, e taki: „Efu mi ben wani, mi ben kan abi seks nanga a dame na mi wrokope. Ma mi hori misrefi èn mi taigi en: ’No, mi no wani!’ A switi te yu abi wan krin konsensi. San moro prenspari, na taki mi sabi taki Yehovah breiti nanga mi.”

Te yu e teki a bosroiti fu no gi abra te yu e kisi tesi, dan yu kan de seiker taki Gado o breiti tu nanga yu!Odo 27:11.

^ paragraaf 2 Wi kenki den nen na ini na artikel disi.