Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  april 2014

Thomas Emlyn—A taki ogri fu Gado noso a horibaka gi san tru?

Thomas Emlyn—A taki ogri fu Gado noso a horibaka gi san tru?

SUMA ben de Thomas Emlyn, èn san meki taki a opo taki gi san tru? San wi na ini a ten disi kan leri fu en?

Fu man piki den aksi dati, dan wi musu go baka na a kabapisi fu a di fu 17 yarihondro, te go miti a bigin fu a di fu 18 yarihondro. Wi o luku fa sani ben de na ini Ingrisikondre nanga Ierland. Na a ten dati, na Anglikan Kerki ben abi bun furu makti. Difrenti Protestant grupu nanga tra sma no ben e agri nanga den leri fu a kerki disi.

SUMA BEN DE A MAN DISI?

Na ini a situwâsi dati Thomas Emlyn gebore tapu 27 mei 1663, na Stamford, Lincolnshire, na ini Ingrisikondre. Di a ben abi 19 yari, dan a hori en fosi preiki. Bakaten, a tron wan domri di ben e wroko gi wan heihei uma di ben e libi na ini Londen. Wan heri pisi ten baka dati, a froisi go tan na Belfast, na ini Ierland.

Na ini Belfast a tron domri fu wan kerki na ini wan dorpu. Baka wan pisi ten, Emlyn ben e wroko leki domri na difrenti presi, sosrefi na Dublin.

FU SAN EDE SMA KRUTU EN TAKI A TAKI OGRI FU GADO?

Na ini a pisi ten dati, Emlyn ben e studeri Bijbel finifini. A sani dati meki taki a bigin tweifri na a Drie-eenheid leri (a leri di e taki dati Gado na dri sma na ini wán), aladi a ben e bribi a leri dati fosi. Di a ondrosuku den Evangelietori, dan a kon si taki a leri dati no ben tru kwetikweti.

Emlyn no fruteri trawan wantewante san a kon frustan. Ma na ini a kerki fu en na Dublin, son sma kon si taki a no ben e taki fu a Drie-eenheid leri na ini den preiki fu en. Fu di a ben sabi taki sma no ben o lobi den sani di a ben kon sabi, meki a skrifi: „Mi no denki taki mi o man tan du a wroko disi efu mi meki sma kon sabi san mi e bribi now.” Na ini yuni 1702, tu sma fu a kerki aksi en fu san ede a no ben e taki fu a Drie-eenheid leri na ini den preiki fu en. Emlyn taigi den taki a no ben e bribi a leri dati moro èn a taigi den tu taki a no wani de domri moro.

A buku fu Emlyn pe a e sori nanga yepi fu Bijbel fu san ede Yesus no kan de a Moro Hei Gado

Wan tu dei baka dati, a gowe libi Dublin, Ierland, èn a go na Ingrisikondre. Ma baka tin wiki a drai go baka na Dublin fu go seti wan tu tori, fu di a ben o froisi go tan na Londen. Di a ben de na ini Dublin, dan a ben wani sori taki den sani di a ben kon bribi ben tru, èn fu dati ede a tyari wan buku kon na doro (An Humble Inquiry Into the Scripture-Account of Jesus Christ). Na ini a buku disi, a gebroiki Bijbel fu sori krin fu san ede Yesus no ben kan de a Moro Hei Gado. A sani disi meki taki den sma fu a kerki na ini Dublin pe a ben e dini fosi, kisi bigi atibron. Ne den tyari en go na krutu.

Den grabu Emlyn èn den tyari en go na fesi a krutubangi na Dublin, tapu 14 yuni 1703. Emlyn ben skrifi wan buku di e fruteri fa a krutu-afersi waka (True Narrative of the Proceedings). Na ini a buku dati a e taki dati den ben krutu en „fu di den ben feni taki a buku di a ben tyari kon na doro ben  e taki ogri fu Gado, . . . èn taki a ben sori taki Yesus Krestes nanga Gado a Tata a no a srefi”. A krutu no ben waka na wan reti fasi. Seibi beskopu fu a Kerki fu Ierland ben krutu Emlyn makandra nanga den krutuman. Emlyn no ben mag taki gi ensrefi. Richard Levins, wan prenspari afkati, taigi Emlyn taki den ben o onti en „leki wan meti”. Na a kaba fu a krutu, Richard Pyne, a moro Hei Krutuman, taigi den sma di ben musu bosroiti efu Emlyn ben o kisi strafu, taki efu den no ben e krutu en soleki fa den ben wani, dan „den beskopu ben de drape”. Kande a ben taki a sani disi fu sori den sma dati taki den ben o kisi strafu.

„Mi e nyan pina fu di mi e bribi san tru fu Gado èn fu di dati e gi en glori.”—Thomas Emlyn

Di den leisi strafu gi Emlyn, dan wan tra hei krutuman gi en a rai fu teki baka san a ben taki fu Gado. Emlyn weigri. A kisi wan butu èn a ben musu koti wán yari strafu. Fu di a no ben man pai a butu, meki a tan na strafu-oso tu yari langa teleki wan mati fu en ben man kisi lanti so fara fu meki a pai moro mendri. Emlyn komoto na strafu-oso tapu 21 yuli 1705. Fu di sma du so furu hati sani nanga en, meki a taki a sani disi di skrifi na a bigin fu na artikel: „Mi e nyan pina fu di mi e bribi san tru fu Gado èn fu di dati e gi en glori.”

Emlyn froisi go tan na Londen, pe a bigin bumui nanga William Whiston, wan tra sabiman fu Bijbel di den ben puru fu a kerki fu di a ben skrifi san a ben denki taki na tru tori fu Bijbel. Whiston ben abi lespeki gi Emlyn, èn a kari en ’a fosi sma di ben opo taki gi a bribi fu den fositen Kresten’.

FU SAN EDE A NO BEN WANI BRIBI A DRIE-EENHEID LERI?

Neleki William Whiston nanga wan tra lespeki sabiman, Isaac Newton, Emlyn kon si taki Bijbel no e horibaka gi a Drie-eenheid leri soleki fa yu kan leisi dati na ini a Katechismus fu a Lomsu kerki. Emlyn ben taki: „Baka di mi denki bun, èn mi studeri den santa Buku fu Bijbel, . . . dan mi kon si krin taki . . . mi ben musu kenki a fasi fa mi ben e denki fosi fu a Drie-eenheid leri.” A ben kon si taki „a Gado èn a Tata fu Yesus Krestes na a Moro Heiwan”.

San meki taki Emlyn kon abi a denki disi? A feni furu Bijbeltekst di ben e sori taki Yesus nanga en Tata no de a srefi. Luku wan tu fu den tekst dati (Den sani di Emlyn e taki fu den tekst disi skrifi skoinsi):

  •  Yohanes 17:3: „Noiti Bijbel taki dati Krestes na Gado srefi, a Moro Hei Gado, noso a wan-enkri tru Gado.” Na a Tata wawan na „a wan-enkri tru Gado”.

  •  Yohanes 5:30: „A Manpikin no e du san en wani, ma a e du a wani fu a Tata.”

  •  Yohanes 5:26: „Na a Tata gi en libi.”

  •  Efeisesma 1:3: „Aladi Bijbel e kari Yesus Krestes a Manpikin fu Gado, toku noiti a e kari a Tata a Tata fu Gado, ma nofo tron a e kari en a Tata fu wi Masra Yesus.”

Baka di Emlyn poti prakseri na ala den buweisi disi, dan a taki krin: „Nowan tekst na ini den santa Buku fu Bijbel e sori noso e gi sma a denki taki a Tata, a Manpikin, nanga a Santa Yeye na a srefi sma.”

SAN WI E LERI?

Furu sma na ini a ten disi e frede fu opo taki gi san Bijbel e leri. Ma Emlyn no ben frede fu du dati. A poti na aksi disi: „Efu wan sma no mag taki fu den moro prenspari tru tori di de fu feni na ini den santa Buku fu Bijbel, dan fu san ede a musu leisi èn ondrosuku den buku disi?” Emlyn weigri fu bribi leri di no tru.

Na eksempre fu Emlyn nanga a di fu trawan kan gi wi deki-ati fu luku efu wi de klariklari fu opo taki gi san tru te sma e spotu wi. Wi kan aksi wisrefi tu san moro prenspari gi wi. Wi wani taki sma gi wi grani èn taki den feni wi bun, noso wi wani hori wisrefi na den tru tori na ini Gado Wortu?’