Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2014

Yu ben sabi a sani disi?

Yu ben sabi a sani disi?

San na den aluwe di sma ben e gebroiki na ini Bijbel ten?

Aluwe ben e komoto fu na Agar-bon

Bijbel e taki dati sma ben e gebroiki aluwe fu meki krosi nanga bedi smeri switi (Psalm 45:8; Odo 7:17; Singi fu Salomo 4:14). Den aluwe na ini Bijbel ten ben e komoto fu na Agar-bon (wan famiri fu den Aquilaria-bon). Te na udu dati e pori, a e puru switismeri oli nanga tara. Sma ben e mara na udu kon tron puiri, èn den ben e seri a puiri dati leki „aluwe”.

Bijbel e agersi den tenti fu Israel nanga „aluwe-bon di Yehovah prani” (Numeri 24:5, 6). Kande a abi fu du nanga a fasi fa na Agar-bon disi e gro. A bon disi kan hei sowan 30 meter èn den taki fu en e bradi go na ala sei. Aladi a bon disi no de fu feni na ini Israel fu a ten disi, toku a buku A Dictionary of the Bible e taki dati „reide de fu bribi taki a bon disi nanga trawan di no e gro moro na ini [a kontren dati], ben e gro fosi na ini Yordan-lagipresi pe furu difrenti bon ben e gro èn pe furu sma ben e tan”.

Sortu ofrandi sma ben mag tyari na ini a tempel na Yerusalem?

A pisi klèidoti disi di sma feni na a tempel na ini Yerusalem owru sowan 2000 yari

A Wèt fu Gado ben taki dati ala den ofrandi di sma ben e tyari na ini a tempel ben musu de heri bun. Gado no ben o wani ofrandi di ben abi wan mankeri (Eksodes 23:19; Lefitikus 22:21-24). Soleki fa a Dyu skrifiman Filo fu a fosi yarihondro ben taki, dan den priester fu a ten dati ben e luku den meti finifini „fu den ede te go miti den futu” fu si efu den ben bun dorodoro èn efu den ben de „sondro flaka noso mankeri”.

Sabiman E. P. Sanders e taki dati a kan taki den tempel fesiman ben „taigi den man di ben e seri sani èn di ben de fu frutrow, fu seri soso meti nanga fowru di den priester ben luku kaba. Te dati ben pasa, dan den man dati ben musu gi den sma di ben bai sani na den wan buweisi di ben e sori taki a meti no ben abi nowan mankeri”.

Na ini 2011, ondrosukuman fu owruten sani feni so wan buweisi na ini a birti fu a tempel. Den ben feni wan pikin stampu fu klèidoti di ben de fu a pisi ten na mindri 100 Fosi Krestes nanga a yari 70. Tu wortu ben skrifi na ini Arameisitongo na tapu a pisi kleidoti disi, èn den wortu dati wani taki „Krin gi Gado”. Sma e bribi taki den tempel fesiman ben e fasi den sortu stampu disi na sani di sma ben bai gi na anbegi, noso na meti di sma ben o tyari leki ofrandi.