Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2014

 LEISIMAN E AKSI . . .

Fu san ede Gado e gi pasi taki den trangawan e kwinsi den swakiwan?

Fu san ede Gado e gi pasi taki den trangawan e kwinsi den swakiwan?

Bijbel e taki fu wan tu sari situwâsi pe trangawan ben e kwinsi swakiwan. A sani disi e meki wi prakseri a tori fu Nabot. * Akab, di ben de kownu fu Israel na ini a di fu tin yarihondro Fosi Krestes, ben gi pasi taki en wefi, Iseibel, meki sma kiri Nabot nanga en manpikin. Na so a kownu ben kan teki Nabot en droifidyari (1 Kownu 21:1-16; 2 Kownu 9:26). Fu san ede Gado gi pasi taki sma du so wan ogri-ati sani?

„Gado . . . no man lei.”Titus 1:2

Meki wi luku wan prenspari reide fu san ede a sani dati pasa: Gado no man lei (Titus 1:2). San dati abi fu du nanga den ogri di sma e du nanga trawan? We, biginbigin, Gado ben warskow libisma taki te den ben o opo densrefi teige en, dan wan sari sani ben o miti den. Den ben o dede. Soleki fa Gado ben taki, dede na wan sani di e miti libisma sensi di den opo densrefi teige En na ini a dyari fu Eden. Fu taki en leti, a fosi dede fadon fu di wan sma ben kwinsi wan trawan. Iya, Kain ben kiri en brada Abel.Genesis 2:16, 17; 4:8.

Gado Wortu taki a tori dati so: „Di libisma bigin tiri tra libisma, sani no waka bun gi den” (Preikiman 8:9). Den wortu dati kon tru? Yehovah ben warskow Israel, a pipel fu en, taki den kownu fu den ben o kwinsi den, èn taki a pipel ben o bari suku yepi na Gado (1 Samuel 8:11-18). Srefi a koni Kownu Salomo ben e meki a pipel fu en pai tumusi furu belasting (1 Kownu 11:43; 12:3, 4). Ogri-ati kownu soleki Akab, ben e kwinsi a pipel moro srefi. Luku a tori disi: Efu Gado ben kibri a pipel gi ala den sani dati, dan dati ben o sori taki a ben lei, a no so?

„Di libisma bigin tiri tra libisma, sani no waka bun gi den.”Preikiman 8:9

No frigiti tu taki Satan e taki dati libisma e dini Gado soso fu den eigi bun (Yob 1:9, 10; 2:4). Efu Gado ben tapu pasi gi trawan fu kwinsi den futuboi fu en, dan dati ben o sori taki Satan ben abi leti, a no so? Boiti dati, efu Gado ben sorgu taki nowan sma e kwinsi trawan, dan yu no denki taki a ben o de frantwortu gi wan moro bigi lei? Efu a ben o kibri sma na so wan fasi, dan furu sma ben kan denki taki libisma man tiri densrefi sondro Gado. Ma Gado Wortu e taki wan heri tra sani. A e taki dati libisma no man tiri densrefi kwetikweti (Yeremia 10:23). A Kownukondre fu Gado musu kon, bika na dati wawan o man tyari wan kaba kon na kruktudu.

Disi wani taki dati Gado no e du noti na a tori dati? Nôno. Luku tu sani di a e du: A fosi sani, na taki a e sori krin taki a no bun te sma e kwinsi trawan. Fu eksempre, a Wortu fu en e sori krin taki a sani di Iseibel ben du nanga Nabot, no ben bun kwetikweti. Bijbel e sori moro fara taki wan makti tiriman di no wani taki sma kon sabi suma na en e meki sma du den ogri-ati sani dati (Yohanes 14:30; 2 Korentesma 11:14). Bijbel e sori taki a sma dati na Satan Didibri. Gado e sori krin taki a no lobi ogridu èn taki a no lobi te sma e kwinsi trawan. A e sori tu suma e meki den sani disi pasa. Na so a e yepi wi fu wai pasi gi ogridu, so taki sani kan waka bun nanga wi fu ala ten.

A di fu tu sani, na taki Gado e gi wi a trutru howpu taki wan ten o kon te sma no o kwinsi trawan moro. A fasi fa a krutu èn strafu Iseibel, èn sosrefi furu sma di ben de leki den, e gi wi a frutrow taki trutru a o strafu ala ogri sma wan dei (Psalm 52:1-5). Gado e gi den wan di lobi en a howpu sosrefi taki heri esi wan kaba o kon na ala den takru sani di den ondrofeni fu di ogri miti den. * Sobun, Nabot di ben e gi yesi na Gado o si wan ten pe en nanga den manpikin fu en o libi fu têgo na ini wan paradijs na grontapu pe kruktudu no o pasa moro.Psalm 37:34.

^ paragraaf 3 Luku na artikel „Teki na eksempre fu sma di ben abi bribi” na ini a tijdschrift disi.

^ paragraaf 8 Luku kapitel 11 fu a buku San Bijbel e leri wi trutru?, di Yehovah Kotoigi tyari kon na doro.