Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yanuari 2014

 BIJBEL E KENKI SMA LIBI

Yehovah no ben frigiti mi

Yehovah no ben frigiti mi
  • A GEBORE NA INI: 1922

  • KONDRE: SPANYOROKONDRE

  • MI BEN E GI YONGU MEISJE KOMUNI LÈS

A LIBI FU MI FOSI:

Mi gebore na ini a foto Bilbao, na a noordsei fu Spanyorokondre. Den sma fu a birti drape no ben pôti. Mi na a di fu tu fu den fo pikin fu mi papa nanga mama. Wi osofamiri ben de fayafaya Lomsu, èn mi ben e go na Mis ibri dei. Di mi ben abi 23 yari, mi tron wan skoro jufrow, wan wroko di mi ben lobi srefisrefi èn di mi du 40 yari langa. Wan fu den sani di mi ben lobi, na fu gi sma leri fu a Lomsu bribi, èn te neti mi ben e gi yongu meisje komuni lès.

Mi ben abi wan koloku trowlibi 12 yari langa, ne mi masra dede. Now mi wawan ben musu sorgu den fo umapikin fu wi. Mi ben abi 33 yari nomo! Mi pruberi fu feni trowstu na ini a Lomsu bribi fu mi, ma mi ben e tan aksi misrefi sani soleki: ’Efu Krestes frulusu wi, dan fu san ede libisma e dede ete? Efu bun sma e go na hemel, dan fu san ede wi e begi taki Gado Kownukondre kon?’ Ma wan prenspari sani di mi ben aksi misrefi na disi: ’Efu a de so taki Gado e krutu wi te wi dede, dan fu san ede wi musu gowe libi hemel, vagevuur, noso hel so taki a kan krutu wi wan lasti leisi?’

Mi poti den aksi disi gi wan tu priester di mi ben miti. Wan fu den piki mi: „Mi no sabi. Aksi a beskopu. Fu san ede yu e broko yu ede nanga den sani dati? Yu e bribi na ini Gado tòk? Libi a sani!” Ma mi tan suku piki gi den aksi fu mi. Bakaten mi go arki lezing fu den Yesuitsma, fu den sma fu a Pinkster Gemeente, èn fu den Gnostiksma. Ma nowan fu den ben man piki den aksi fu mi.

A FASI FA BIJBEL KENKI MI LIBI:

Di mi ben pasa 60 yari, dan wan meisje fu seibi yari gi mi wan kari fu kon na wan konmakandra fu Yehovah Kotoigi. Mi ben lobi den sani di mi si èn yere, ma fu di mi ben abi furu fu du, meki mi no miti moro nanga den Kotoigi na a ten dati. Tu yari baka dati, Juan nanga Maite, wan Kotoigi trowpaar, naki na mi doro. Dri mun langa mi poti wan lo aksi gi den èn den ben  e piki den aksi dati. Te fu kaba den bigin studeri Bijbel nanga mi.

Mi no ben man wakti fu studeri! Mi ondrosuku ala sani finifini. Mi ben e gebroiki dri Bijbel vertaling fu si efu den sani di Yehovah Kotoigi ben e leri sma na tru tori. Heri esi mi kon si taki omeni tenti yari langa mi ben e bribi sani di no ben e kruderi nanga Bijbel. Mi skreki di mi si a bigi difrenti na mindri den sani di mi ben e bribi fosi nanga den sani di mi ben e leri fu Bijbel. Mi ben bruya, fu di a ben gersi leki sma ben e rutu a bribi fu mi puru, di ben de leki wan bon di ben rutu dipi.

Mi ben sabi taki mi ben feni wan gudu

Bakaten, a di fu tu masra fu mi kon siki seryusu èn a dede. Pikinmoro na a srefi ten, mi go nanga pensyun èn mi gowe libi Bilbao wan pisi ten. Juan nanga Maite gowe libi a foto disi tu. A sari fu taki dati mi no go doro nanga mi Bijbelstudie. Ma dipi na ini mi ati mi ben sabi taki mi ben feni wan gudu. Noiti mi no frigiti a gudu dati.

Sowan 20 yari baka dati, di mi ben abi 82 yari, Juan nanga Maite drai kon baka na Bilbao èn den kon luku mi. Mi ben breiti srefisrefi fu si den baka! Mi kon si taki Yehovah no ben frigiti mi, èn mi bigin studeri Bijbel baka. Juan nanga Maite ben abi pasensi nanga mi, fu di mi ben gwenti poti den srefi aksi ibri tron baka. A ben prenspari gi mi fu yere ibri tron baka san Bijbel ben e taki fu den tori dati, so taki mi ben kan libi den sani di mi ben e bribi fosi. Mi ben wani abi nofo sabi tu fu man fruklari den tru tori fu Bijbel gi mi mati nanga mi famiri.

A dei di mi teki dopu te fu kaba, ben de a moro moi dei fu mi libi. Mi ben abi 87 yari. Mi dopu na wan bigi konmakandra fu Yehovah Kotoigi. Wan Kresten owruman ben hori wan Bijbel lezing spesrutu gi den sma di ben o teki dopu. A lezing meki mi krei. A ben de neleki Yehovah srefi ben e taki nanga mi. Baka di mi teki dopu, dan wan lo Kotoigi kon fristeri mi, aladi furu fu den no ben sabi mi!

DEN WINI DI MI KISI:

Ala ten mi ben sabi taki Yesus Krestes na „a pasi” (Yohanes 14:6). Ma a Bijbelstudie fu mi yepi mi fu kon sabi Yehovah, a sma pe Krestes e tyari wi go. Now mi kan begi Gado leki mi lobi-ati Papa nanga Mati. Di mi leisi a buku Kon krosibei na Yehovah, * dan dati kenki mi libi. Mi leisi en na ini wán neti! A naki mi ati di mi kon sabi fa Yehovah abi sari-ati.

Te mi e denki o langa a teki fosi mi feni a tru bribi, dan mi e prakseri a sani disi di Yesus ben taki: „Tan aksi, dan unu o kisi. Tan suku, dan unu o feni. Tan naki na tapu a doro, dan a doro o opo gi unu” (Mateyus 7:7). Now di mi feni den piki tapu den aksi di mi ben abi langa ten kaba, dan a e gi mi prisiri fu meki trawan kon sabi den tu.

Aladi mi abi 90 yari now, toku mi abi furu sani fu leri ete fu Yehovah. Ibri leisi te mi e go na konmakandra na a Kownukondre zaal, mi e firi prisiri fu di mi e leri prenspari sani èn fu di mi e miti nanga den lobi brada nanga sisa fu mi. Mi e angri fu gi leri baka te a Paradijs seti na grontapu (Openbaring 21:3, 4). Mi e wakti a ten te den lobiwan fu mi o kisi libi baka, èn te mi o abi na okasi fu gi den leri fu Bijbel (Tori fu den apostel 24:15). Mi no man wakti fu fruteri den sortu bigi gudu Yehovah gi mi na tapu mi owrudei!

^ paragraaf 15 Yehovah Kotoigi tyari en kon na doro.