Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  december 2013

 TORI FU A KAFTI | WI ABI GADO FANOWDU?

Fu san ede son sma feni taki den no abi Gado fanowdu?

Fu san ede son sma feni taki den no abi Gado fanowdu?

„Yu no abi Gado fanowdu? Milyunmilyun sma e denki so.” Na a boskopu disi wan grupu sma di no e bribi na ini Gado ben skrifi na tapu wan bigi bord di ben de fu si na strati. Soleki fa a sori, dan den e firi taki den no abi Gado fanowdu.

Toku furu sma de tu di e taki dati den e bribi na ini Gado, ma den e teki bosroiti neleki Gado no de. Salvatore Fisichella, wan granbeskopu fu a Lomsu Kerki, ben taki fu den sma fu a kerki fu en: „Te sma e luku wi, dan kande den no ben o wani bribi taki wi na Kresten, fu di wi e libi neleki sma di no abi bribi.”

Son sma abi so furu fu du taki den no abi ten fu broko den ede nanga Gado. Gi den, Gado fara tumusi fu kan abi krakti tapu a libi fu den. Nofo tron den sma disi e denki Gado soso te den de na ini problema noso te den abi wan sani fanowdu. Den e du neleki Gado na wan futuboi di den kan kari te den wani.

Tra sma feni taki den sani di kerki e leri no e tyari wini kon gi den, èn nofo tron den no e du san a kerki fu den e leri. Luku na eksempre disi: Moro leki afu fu den Lomsusma na ini Doisrikondre e bribi taki a no fowtu te wan man nanga wan uma e libi makandra fosi den trow. A denki disi no e kruderi srefisrefi nanga den leri fu a kerki fu den èn nanga Bijbel (1 Korentesma 6:18; Hebrewsma 13:4). A no de fu taki dati a no Lomsusma wawan e si taki a fasi fa den e libi no e kruderi nanga a bribi fu den. Kerki fesiman fu difrenti kerki e kragi taki den memre fu den kerki fu den e tyari densrefi leki „sma di no e bribi na ini Gado”.

Den eksempre disi e meki na aksi disi opo kon: Wi abi Gado fanowdu trutru? A tori disi a no wan nyun sani. A ben opo kon fu a fosi leisi na a bigin fu Bijbel. Fu man kisi piki tapu na aksi dati, dan meki wi poti prakseri na wan tu aksi di opo kon na ini a Bijbel buku Genesis.