„Di mi umapikin ben abi 14 yari, dan a bigin gi mi bigitaki. Te mi ben e kari en fu kon nyan, dan a ben e piki mi taki a ben o kon nyan te a wani. Te mi ben e aksi en efu a ben kaba du den osowroko fu en, dan a ben e bari mi fu no hati en ede. Nofo tron mi nanga en ben e opo wi sten èn wi ben e bari makandra.”​—MAKI, YAPAN. *

Efu yu na a papa noso a mama fu wan tini, dan a moro muilek sani di o miti yu, na taki yu o abi fu hori pasensi te unu e kisi trobi. Maria di e libi na ini Brasyonkondre, abi wan meisje fu 14 yari. A e taki: „Te mi umapikin e trangayesi mi, dan mi ati e kuku. Wi e atibron so te taki wi e bigin bari makandra.” Carmela, na ini Italiakondre, abi wan srefi sortu problema. A e taki: „Te mi nanga a boi fu mi no man agri nanga makandra, dan wi e kisi trobi, èn baka dati a e go tapu ensrefi na ini en kamra.”

Fu san ede a gersi leki son tini lobi meki trobi? Yu denki taki na den speri fu den e meki den du dati? Kande. Bijbel e taki dati den mati fu wan sma kan abi bigi krakti na en tapu. Den kan meki a du bun noso ogri (Odo 13:20; 1 Korentesma 15:33). Ma furu fu den prisiri sani di yonguwan fu a ten disi lobi, e gi den deki-ati fu opo densrefi teige trawan èn fu no abi lespeki.

Ma tra sani de tu di wi musu hori na prakseri. Den sani dati no muilek fu du te yu e frustan fa den kan abi krakti tapu a tini fu yu. Wi o luku wan tu eksempre.

A TINI E LERI FU GEBROIKI EN „FRUSTAN”

Na apostel Paulus ben skrifi: „Di mi ben de wan pikin, mi ben e taki leki wan pikin, mi ben e denki leki wan pikin, èn mi ben e prakseri leki wan pikin.  Ma now di mi tron wan man, mi no e du leki wan pikin moro” (1 Korentesma 13:11). Soleki fa Paulus e taki, dan pikin e denki tra fasi leki bigisma. Fa so?

Nofo tron pikin e si tu sei nomo fu wan sani, a bun noso a no bun. Tra fasi leki den, bigisma man frustan son sani moro bun èn den man denki moro dipi fu sani, fosi den teki wan bosroiti. Fu eksempre, bigisma sabi moro bun fu san ede a bun fu no du wan sani èn den e prakseri sortu krakti a sani di den o du o abi tapu trawan. Kande den gwenti denki na a fasi dati. Ma tini musu leri a sani dati ete.

Bijbel e gi yongusma deki-ati fu leri gebroiki den „frustan” (Odo 1:4). Fu taki en leti, Bijbel e gi ala Kresten deki-ati fu gebroiki den „frustan” (Romesma 12:1, 2; Hebrewsma 5:14). Ma son leisi, a tini fu yu di e leri ete fu gebroiki en frustan, ben kan haritaki nanga yu, kande fu wan pikin sani srefi. Noso a ben kan taigi yu wan sani di e sori krin taki a no e si sani na a yoisti fasi (Odo 14:12). Te dati de so, dan fa yu kan taki nanga en sondro fu haritaki?

PRUBERI FU DU DISI: Hori na prakseri taki na pruberi a tini fu yu e pruberi nomo fu taki fa a e denki fu sani, èn kande a no de seiker srefi efu a sani di a taki de so trutru. Fu kon sabi fa a e denki trutru, dan a bun fu prèise en fu di a e pruberi fu gebroiki en frustan. Kande yu kan taki: „Mi lobi fa yu e denki, awansi mi no e agri nanga ala san yu e taki.” Baka dati, yepi en fu luku moro bun fa a e denki. Kande yu kan taki: „Yu denki taki a sani di yu taki now e fiti na ini ala situwâsi?” Kande yu sa fruwondru fu si fa a tini fu yu e luku a tori baka èn fa a e leri fu denki moro bun.

Ma luku bun nanga a sani disi: Te yu e taki nanga a tini fu yu, dan no denki taki ala ten na yu musu abi leti. Awansi a gersi leki a tini fu yu no e agri nanga san yu e taki, toku a kan taki a sa arki èn a sa memre den sani di yu taki, awansi a no wani taigi yu dati. No fruwondru efu baka wan tu dei, a tini fu yu kon abi a srefi denki leki yu, èn kande a sa taki srefi taki na so a ben denki kaba ala ten.

„Mi nanga a boi fu mi ben e haritaki nanga makandra son leisi fu pikinpikin sani. Kande mi ben taigi en taki a no ben musu frumorsu sani, noso taki a no ben musu fruferi en pikin sisa. Ma nofo tron a ben gersi leki a ben wani taki mi aksi en san a ben e denki, èn taki mi sori en taki mi ben e frustan en. Kande mi ben musu taki: ’Oh, na dati pasa’, noso ’Oh, na so yu e denki.’ Te mi e prakseri baka, dan mi e si taki efu mi ben du dati, dan kande mi nanga en no ben o haritaki so furu nanga makandra.”​—Kenji, Yapan.

A TINI E KON ABI EN EIGI DENKI

Koni papa nanga mama e libi na so wan fasi nanga den pikin fu den taki den e firi fri fu taki fa den e denki

Mama nanga papa di e kweki wan tini abi a bigi frantwortu fu sreka en gi a dei te a o gowe libi oso fu go libi leki wan bigisma di man tyari frantwortu (Genesis 2:24). A yonguwan disi musu kon sabi suma a de. Iya, a musu kweki spesrutu fasi, a musu sabi san a e bribi, èn a musu sabi san bun èn san no bun. Te trawan e dwengi en fu du san no bun, dan so wan tini no sa prakseri soso den bakapisi fu den sani dati. A sa aksi ensrefi den sani disi tu: ’Fa mi de? Fa mi e denki? San wan sma di e denki so ben o du na ini a situwâsi disi?’​—2 Petrus 3:11.

Bijbel e fruteri wi fu Yosef, wan yonkuman di ben sabi heri bun suma a de. Fu eksempre, di a wefi fu Potifar ben wani dwengi Yosef fu abi seks nanga en, dan Yosef piki en: „Fa mi kan du so wan bigi ogri èn sondu teige Gado?” (Genesis 39:9) Aladi den Israelsma no ben abi wèt ete di ben e taki dati sutadu no bun, toku Yosef ben e frustan fa Gado ben e denki fu a tori. Boiti dati, den wortu „fa mi kan’’ e sori fa a ben denki. A ben kon abi a srefi denki leki Gado.​—Efeisesma 5:1.

A tini fu yu e kon leri sabi tu suma a de. A sani disi na wan bun sani fu di den sani di a e bribi o yepi en fu kakafutu gi speri te den e pruberi fu dwengi en fu du san no bun (Odo 1:10-15). Ma fu di a sabi suma a de, dan kande dati o meki tu taki a opo ensrefi teige yu. Te dati e pasa, dan san yu kan du?

PRUBERI FU DU DISI: Na presi taki yu e haritaki nanga en, dan a moro bun fu pruberi fu si efu yu e frustan fa a e denki. Kande yu kan taki: „Meki mi luku efu mi e frustan san yu e taki. Yu taki dati . . . ” Baka dati, poti aksi gi en. Kande yu kan aksi en: „Fu san ede yu e firi so?” noso „Fu san ede yu e denki so?” Meki a taki fa a e denki. A kan taki a e si sani tra fasi leki yu. A no abi fu de so taki na wan  fowtu denki a abi. Te dati de so, dan sori lespeki gi a fasi fa a e denki, awansi yu no e agri dorodoro nanga en.

Te fu kaba a tini e kon sabi suma a de èn a e kon sabi san a e bribi. A sani disi o tyari wini kon tu gi en. Te yu luku en bun, dan Bijbel e taki dati Kresten no musu de leki yongu pikin di ’de leki wan boto di skwala nanga winti e naki go na ala sei. Den no musu meki sma bruya den nanga ala sortu leri’ (Efeisesma 4:14). Sobun, gi a tini fu yu ten nanga deki-ati fu kon sabi suma a de èn san a e bribi.

„Te den umapikin fu mi e si taki mi wani arki den, dan a moro makriki gi den fu poti prakseri na a fasi fa mi e si sani, awansi a de tra fasi leki fa den e si sani. Mi e luku bun fu no dwengi den fu denki soleki fa mi e denki, ma mi e gi den okasi fu kon abi den eigi denki.”​—Ivana, Tyekia Republiek.

DU SAN YU TAKI, MA FITI YUSREFI TE DATI KAN

Neleki yongu pikin, son tini sabi fa fu tan dwengi den papa nanga mama teleki den kisi san den wani. Efu a tini fu yu gwenti du dati, dan luku bun. Kande yu sa firi frulekti wan pisi ten te yu e gi a pikin san a wani. Ma so yu e leri a pikin taki efu a wani kisi san a wani, dan a musu tan haritaki nanga yu. San yu kan du? Teki na eksempre fu Yesus: „Te unu taki ’iya’, dan meki a tan iya. Te unu taki ’nôno’, dan meki a tan nôno” (Mateyus 5:37). Tini no o de so gaw fu haritaki nanga yu te den sabi taki ala ten yu e du san yu taki.

Ma a bun tu fu fiti yusrefi te dati kan. Fu eksempre, meki a tini fu yu taigi yu fu san ede a feni taki yu musu gi en okasi fu kon moro lati na oso na wan spesrutu okasi. Te yu e du dati, dan a no wani taki dati yu e gi abra na a pikin fu yu, ma yu e gi yesi nomo na a rai disi fu Bijbel: „Meki ala sma kon sabi taki unu de klariklari fu fiti unsrefi na ala fasi.”​—Filipisma 4:5.

PRUBERI FU DU DISI: Abi wan takimakandra nanga na osofamiri fu yu fu bosroiti o lati den pikin mag kon na oso èn sortu wèt de na ini na oso. Sori den taki yu de klariklari fu arki den èn fu luku ala sani bun fosi yu teki wan bosroiti. Roberto, wan papa na ini Brasyonkondre e taki: „Tini musu man si taki den papa nanga mama wani gi den san den wani, efu a sani dati no e pasa wan wèt fu Bijbel.”

A tru taki ala papa nanga mama abi den fowtu. Bijbel e taki: „Wi alamala e sondu furu tron” (Yakobus 3:2). Efu yu si taki na yu meki tu taki yu nanga a tini fu yu bigin haritaki, dan no draidrai fu aksi en pardon. Te yu e agri taki yu meki wan fowtu, dan dati e sori yu pikin taki yu abi sakafasi, èn dati sa meki en moro makriki gi en fu du a srefi.

„Wan leisi, mi nanga a boi fu mi ben e haritaki. Di mi ati kon kowru, dan mi aksi en pardon taki mi ben lasi misrefi. A sani dati yepi en fu hori ensrefi tu èn a ben moro makriki gi en fu arki mi.”​—Kenji, Yapan.

^ paragraaf 3 Wi kenki wan tu nen na ini na artikel disi.

AKSI YUSREFI DEN SANI DISI . . .

  • Mi e du sani kande di e meki taki mi nanga a tini fu mi e haritaki nanga makandra?

  • Fa mi kan gebroiki den rai na ini na artikel disi fu frustan a tini fu mi moro bun?

  • San mi kan du fu man taki moro bun nanga a tini fu mi, sondro taki wi e haritaki nanga makandra?