Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  oktober 2013

Fa fu go doro nanga a libi baka te yu broko trow

Fa fu go doro nanga a libi baka te yu broko trow

„Mi no ben man bribi san miti mi. Yu libi e waka bun, dan wantronso yu e lasi ala sani.”—MARK, * di broko trow wán yari kaba.

„Mi masra ben e hori nanga wan uma di ben abi a srefi yari leki na umapikin fu wi. Di wi broko trow, mi ben breiti taki a no ben man puru atibron moro na mi tapu. Ma mi ben e syen èn mi ben e firi leki mi no warti noti.”—EMMELIEN, di broko trow 17 yari kaba.

Son sma e broko trow fu di den e howpu taki a libi fu den o kon moro bun. Trawan no wani broko trow, ma den no man du noti fu sorgu taki a patna fu den e tan nanga den. Toku pikinmoro ala den sma di e broko trow feni taki a libi fu den kon moro muilek leki san den ben fruwakti. Efu yu broko trow no so langa pasa, dan kande yu sa feni taki dati na wan fu den moro muilek sani di miti yu oiti. Dati meki a bun fu poti prakseri na wan tu rai fu Bijbel di kan yepi yu fu pasa den problema di e opo kon baka te sma broko trow.

PROBLEMA 1: A FASI FA YU E FIRI.

A frantwortu di papa nanga mama abi fu sorgu pikin, èn a firi di sma abi taki den de den wawan, na sani di kan gi sma furu broko-ede. Den firi dati no e gowe esi-esi. Judith Wallerstein, wan sabiman di dede kaba, ben kon si taki awansi omeni yari pasa, toku a e hati son sma ete taki a patna fu den bedrigi den èn taki a gowe libi den. Den feni taki „a libi  no prati nanga leti, den e firi brokosaka, èn den e firi leki den de den wawan”.

SAN YU KAN DU

  • A no fowtu fu sari fu a sani di miti yu. Kande yu e misi a patna fu yu fu di yu lobi en ete. Awansi a trowlibi fu yu no ben e waka bun, toku a kan hati yu taki sani no waka soleki fa yu ben fruwakti (Odo 5:18). No syen „fu krei”.Preikiman 3:1, 4.

  • No hori yusrefi aparti fu trawan. A no de fu taki dati yu wani de yu wawan te yu e sari, ma a no musu de fu langa (Odo 18:1). Te yu e taki nanga mati, dan taki fu bun sani, bika te yu e kragi tumusi fu yu owru patna, dan sma o fruferi fu yu, awansi den sani di yu e taki na tru tori. Efu yu musu teki prenspari bosroiti syatu baka di yu broko trow, dan suku yepi na wan sma di yu e frutrow èn di no o teki sei.

  • Sorgu bun gi a gosontu fu yu. Nofo tron te sma broko trow, dan den e kisi problema soleki hei-brudu, noso hebi ede-ati. Nyan bun, oefen pikinso, èn sorgu taki yu e sribi nofo.Efeisesma 5:29.

  • Puru sani na ini yu oso di e meki taki yu e atibron nanga yu owru patna. Kande sani de tu di yu no abi fanowdu moro, ma kibri prenspari papira. Efu sani soleki trow fowtow e meki yu sari, dan poti den na ini wan dosu èn kibri den gi den pikin fu yu.

  • Dwengi yusrefi fu no denki takru fu sani. Olga, di broko trow baka di en masra waka gi en, e taki: „Mi ben e tan aksi misrefi san na uma dati abi di mi no abi.” Ma bakaten Olga kon si taki efu a ben e tan denki so takru, dan dati ben o meki a „lasi-ati”.Odo 18:14.

    Furu sma feni taki te den e skrifi den prakseri fu den poti na tapu papira, dan dati e yepi den fu kon sabi san e trobi den èn san den kan du fu no denki so. Te yu e du disi, dan pruberi fu denki tra sani di kan puru takru prakseri na yu ede (Efeisesma 4:23). Luku den tu eksempre disi:

    Fosi: Na mi meki taki mi patna waka gi mi.

    Now: Awansi mi abi fowtu, toku mi patna no ben abi leti fu waka gi mi.

    Fosi: Mi lasi den moro bun yari fu mi libi tapu a man disi.

    Now: Mi o de moro koloku te mi no e luku go na baka, ma na fesi.

  • No poti prakseri na hati sani di sma e taki. Mati nanga famiriman di wani trowstu yu ben kan taki sani di e hati yu noso di no tru. Kande den e taki: ’Toku a no ben de wan bun wefi’, noso ’Gado no lobi brokotrow kwetikweti’. * Dati meki Bijbel e taki: „Yu no musu poti tumusi furu prakseri na ala sani di sma e taki” (Preikiman 7:21). Martina, di brokotrow tu yari kaba, e taki: „Mi no e tan prakseri den hati sani di sma e taki, ma mi e pruberi fu si sani soleki fa Gado e si sani. Den prakseri fu en hei moro den di fu wi.”Yesaya 55:8, 9.

  • Begi Gado. A e gi den anbegiman fu en deki-ati fu ’trowe ala den hebi na en tapu’, spesrutu te den de na ini bigi nowtu.1 Petrus 5:7.

PRUBERI FU DU DISI: Skrifi den Bijbeltekst di de wan yepi gi yu èn poti den na presi pe yu o si den makriki. Boiti den tekst di kari kaba, furu sma di broko trow kisi wini fu den tekst disi: Psalm 27:10; 34:18; Yesaya 41:10; nanga Romesma 8:38, 39.

Meki Gado Wortu yepi yu na ini muilek ten

PROBLEMA 2: A FASI FA YU E LIBI NANGA YU OWRU PATNA.

Juliana, di ben trow erfu yari langa, e taki: „Mi begi mi masra fu tan na mi. Ma baka di a gowe libi mi, dan mi ben mandi nanga en èn nanga na uma  di a teki.” Furu sma di e broko trow e tan atibron furu yari langa tapu na owru patna fu den. Ma toku den abi fu taki nanga makandra son leisi, spesrutu te den abi pikin.

SAN YU KAN DU

  • Tan sori switifasi gi yu owru patna. Poti prakseri na den prenspari sani, hori en syatu, èn taki sani krin. Furu sma kon si taki a sani disi e yepi fu tan libi na ini freide nanga na owru patna.Romesma 12:18.

  • No taki sani di e wiki atibron. Spesrutu te yu feni taki yu owru patna e suku trobi nanga yu, dan a koni rai disi fu Bijbel kan yepi: „Iniwan sma di no de gaw fu taki san a e denki, koni srefisrefi” (Odo 17:27). Efu a takimakandra nanga yu owru patna o tron wan haritaki, dan kande yu kan taigi en: „Meki mi denki a tori fosi, dan mi o piki yu bakaten.”

  • Du ala san yu man fu sorgu taki den papira fu yu de na tapu yu nen. Fu eksempre, yu lanti papira, yu bangi papira, nanga yu datra papira.

PRUBERI FU DU DISI: Te yu e taki nanga yu owru patna, dan luku efu unu e bigin krutu nanga makandra noso efu unu e du muilek. Efu a de fanowdu, dan aksi yu owru patna efu unu kan taki fu a tori wan tra leisi, noso efu unu kan bèl makandra.Odo 17:14.

PROBLEMA 3: YEPI YU PIKIN FU KON GWENTI A SITUWÂSI.

Maria e memre ete fa a ben de syatu baka di a broko trow: „A moro yongu umapikin fu mi ben e krei doronomo èn a bigin plasye baka na ini en bedi. A moro bigi umapikin fu mi ben e du leki noti no pasa, ma mi ben si taki en srefi ben kenki.” Wan sari sani, na taki yu ben kan feni taki yu no abi a ten noso a krakti fu yepi yu pikin te den abi yu tranga fanowdu.

SAN YU KAN DU

  • Gi den pikin fu yu deki-ati fu taigi yu fa den e firi, awansi a gersi leki den e taki „dondon sani”.Yob 6:2, 3.

  • Sabi san na yu frantwortu. Kande yu e angri fu feni trowstu, èn kande a pikin fu yu wani trowstu yu. Toku a no fiti fu aksi wan pikin fu yepi yu nanga bigisma problema (1 Korentesma 13:11). No fruteri a pikin den inibere tori fu yu, èn no gebroiki en leki boskopuman na mindri yu nanga yu owru patna.

  • Sorgu taki a libi fu yu pikin no e kon bruya. A e yepi te yu no e froisi gowe libi a presi pe yu ben e tan èn te unu e tan du sani soleki fa unu ben gwenti. Ma san moro prenspari, na taki yu musu tan sorgu taki yu nanga yu osofamiri abi wan bun matifasi nanga Gado. Iya, tan leisi Bijbel èn tan hori na Osofamiri Anbegi.Deuteronomium 6:6-9.

PRUBERI FU DU DISI: Wan fu den dei disi, taigi den pikin fu yu taki yu lobi den èn taki a no den meki taki yu nanga yu patna broko trow. Piki den aksi fu den sondro taki yu e krutu a papa noso a mama fu den.

Yu man go doro nanga yu libi baka te yu broko trow. Melisa, di ben trow 16 yari langa, e taki: „Di mi broko trow, dan mi ben e denki: ’Mi no ben wani taki mi libi ben musu waka so.’” Ma aladi a broko trow, toku a de koloku now. A e taki: „Di mi bosroiti fu no luku go na baka moro, dan mi bigin firi moro bun.”

^ paragraaf 2 Wi kenki wan tu nen na ini na artikel disi.

^ paragraaf 18 Gado no lobi en kwetikweti te sma e broko trow na wan triki fasi. Ma efu wan sma en patna e du hurudu, dan Gado e gi a tra patna a reti fu bosroiti efu a o broko trow (Maleaki 2:16; Mateyus 19:9). Luku na artikel „Yehovah no lobi bedrigifasi kwetikweti” na ini A Waktitoren fu 1 mei 2002 bladzijde 17-19 paragraaf 16-19. Yehovah Kotoigi tyari en kon na doro.

AKSI YUSREFI DEN SANI DISI . . .

  • Mi gi misrefi okasi fu sari fu di a trow fu mi broko?

  • San mi kan du fu sorgu taki mi no e tan atibron na tapu mi owru patna?