Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  oktober 2013

 BIJBEL E KENKI SMA LIBI

„Furu sma ben e teige mi”

„Furu sma ben e teige mi”
  • A GEBORE NA INI: 1978

  • KONDRE: CHILI

  • A BEN DE WAN OGRI-ATI MAN

A LIBI FU MI FOSI:

Mi kweki na ini Santiago, a mamafoto fu Chili. Mi ben e tan na ini wan drugs birti pe furu grupu ogriman ben de, èn furu ogri ben e pasa drape. Di mi ben abi feifi yari, dan den kiri mi papa. Baka dati, mi mama ben e libi nanga wan ogri-ati man. A ben gwenti fon mi nanga mi mama. Te nanga now mi no man frigiti den sani di a ben du nanga wi.

Di mi ben e gro kon, dan den takru sani di ben e miti mi, meki taki mi bigin du ogri-ati sani. Mi ben e arki hebi rock poku, mi ben e dringi furu sopi, èn ten na ten mi ben e gebroiki drugs. Mi ben gwenti feti na strati nanga sma di ben e seri drugs, èn wan tu leisi den sma disi pruberi fu kiri mi. Wan leisi, wan grupu ogriman pai wan sma fu kiri mi, ma mi ben man lowe gowe baka di a dyuku mi nanga wan nefi. Wan tra leisi, wan tu man di ben e seri drugs hori wan gon na mi ede èn den pruberi fu anga mi.

Na ini 1996, mi kon lobi wan uma di nen Carolina èn na ini 1998, wi trow. Baka di a fosi boi fu wi gebore, mi bigin frede taki a faya-ati fu mi ben o meki taki neleki mi kwekipapa mi ben o fon mi wefi nanga mi pikin tu. Dati meki mi go suku yepi na wan presi pe den e yepi sma di no man tapu nanga drugs nanga sopi. Den gi mi dresi nanga tra yepi, ma toku mi no kenki. Mi tan kisi faya atibron fu iniwan pikin sani, èn noti no ben man yepi mi. Fu di mi no ben wani pina mi osofamiri moro langa, meki mi pruberi fu kiri misrefi. Koloku taki mi no dede.

Furu yari langa mi no ben e bribi taki wan Gado de, ma toku mi ben e suku Gado. Dati meki mi go na ini wan Pinkster gemeente fu wan pisi ten. Na a srefi ten, mi wefi ben e studeri Bijbel nanga Yehovah Kotoigi. Mi ben e teige den Kotoigi èn nofo tron mi ben e bari sani kosi den. Ma noiti den ben e kosi mi baka, wan sani di mi no ben e fruwakti.

Wan dei, Carolina aksi mi fu luku Psalm 83:18 na ini mi eigi Bijbel. A tekst dati e taki krin dati Gado nen na Yehovah.  Mi fruwondru di mi kon si taki a kerki fu mi ben leri mi fu wan gado, ma a no ben leri mi fu Yehovah. Na a bigin fu a yari 2000, mi bigin studeri Bijbel tu nanga den Kotoigi.

A FASI FA BIJBEL KENKI MI LIBI:

Di mi ben e go na fesi, dan a ben de wan trowstu gi mi fu kon sabi taki Yehovah na wan Gado di e firi gi sma èn di lobi gi sma pardon. Fu eksempre, na Eksodes 34:6, 7, Bijbel e taki dati Yehovah na „wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki. A e du bun gi dusundusun sma, èn a e gi sma pardon te den meki fowtu, te den du ogri, èn te den du sondu”.

A ben de wan trowstu gi mi fu kon sabi taki Yehovah na wan Gado di e firi gi sma èn di lobi gi sma pardon

Ma toku a no ben makriki fu du den sani di mi ben e leri. Mi ben denki taki noiti mi ben o man basi a faya-ati fu mi. Ibri leisi te mi ben e lasi misrefi, Carolina ben e gi mi deki-ati na wan lobi-ati fasi. A ben e memre mi taki Yehovah ben e si a muiti di mi ben e meki. Fu di a ben e yepi mi, meki mi kisi deki-ati fu tan du muiti fu plisi Yehovah, aladi mi ben e firi leki yepi no ben de moro gi mi.

Wan dei, Alejandro, a brada di ben e studeri Bijbel nanga mi, aksi mi fu leisi Galasiasma 5:22, 23. Den vers dati e taki dati a yeye fu Gado e meki sma sori ’lobi, prisiri, freide, langa pasensi, switifasi, bun-ati, bribi, safri-ati, èn a e meki sma dwengi densrefi’. Alejandro fruteri mi taki mi no ben o man kweki den fasi dati nanga mi eigi krakti, ma nanga yepi fu Gado en santa yeye. A sani disi meki mi kisi wan heri tra denki fu sani!

Bakaten, mi go na wan bigi kongres fu Yehovah Kotoigi. Di mi si fa ala sani ben orga bun, fa a presi ben krin, èn fa den sma ben e sori switifasi gi makandra, dan mi ben sabi seiker taki mi ben feni a tru bribi (Yohanes 13:34, 35). Mi teki dopu na ini februari 2001.

DEN WINI DI MI KISI:

Fosi, mi ben de wan ogri-ati man, ma Yehovah kenki mi kon tron wan man di lobi freide. A gersi leki a ben hari mi puru na ini a fisti tokotoko pe mi ben saka go na ini. Furu sma ben e teige mi, èn mi kan frustan fu san ede. Ma now mi breiti taki mi man dini Yehovah na ini freide makandra nanga mi wefi nanga den tu boi fu mi.

Den famiri fu mi nanga den mati di mi ben abi fosi, no man bribi taki mi kenki so. A sani dati meki taki wan tu fu den wani kon sabi den tru tori fu Bijbel. Mi ben abi a grani tu fu yepi tra sma fu kon sabi Yehovah. A e gi mi prisiri trutru fu si fa den tru tori fu Bijbel e kenki a libi fu den tu!