Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  september 2013

Dyonsro pina no o de moro!

Dyonsro pina no o de moro!

Prakseri fa a ben o de fu libi na ini wan grontapu pe sma no e pina moro, iya, wan grontapu sondro ogridu, feti, siki nanga rampu. Prakseri fa a ben o de fu wiki ibri mamanten sondro fu frede taki sma o desko yu, taki den o kwinsi yu, noso taki a libi o kon diri. A muilek gi yu fu bribi a sani disi? A no de fu taki dati nowan organisâsi fu libisma kan tyari wan kaba kon na den sortu sani dati. Ma Gado pramisi taki a o tyari wan kaba kon na ala sani di e meki taki libisma e pina, sosrefi den sani di wi ben taki fu den na ini na artikel na fesi. Poti prakseri na den pramisi disi di de fu feni na ini Gado Wortu, Bijbel:

WAN BUN TIRIMAKTI

„A Gado fu hemel o seti wan kownukondre di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo.”Danièl 2:44.

A Kownukondre fu Gado na wan tirimakti na hemel. A Tiriman fu en, Yesus Krestes, o teki a presi fu ala tiriman na grontapu èn a o sorgu taki a wani fu Gado e pasa na hemel èn na grontapu (Mateyus 6:9, 10). Nowan libisma tirimakti o man teki a presi fu a tirimakti disi, fu di a de „a têgo Kownukondre fu wi Masra nanga wi Frulusuman Yesus Krestes”. Wi kan abi a dyaranti taki freide o de fu ala ten.2 Petrus 1:11.

FALSI BRIBI NO O DE MORO

„Satan srefi e tan du neleki en na wan engel fu leti. Fu dati ede a no de wan fruwondru sani taki den dinari fu en e tan du neleki den na dinari fu retidu. Ma bakaten den o kisi pai fu san den du.”2 Korentesma 11:14, 15.

A o kon na krin taki falsi bribi na wan sani di e komoto fu Didibri, èn a sani disi no o de moro. Kerki no o strei moro nanga makandra èn den no o meki tu taki ipi-ipi sma lasi den libi. Na so ala sma di lobi a „tru èn libilibi Gado”, o man anbegi en na ini „wán bribi”, „nanga yepi fu a santa yeye èn nanga yepi fu san tru”. A sani disi o tyari trutru freide nanga wánfasi kon!1 Tesalonikasma 1:9; Efeisesma 4:5; Yohanes 4:23.

LIBISMA NO O ABI SONDU MORO

„Gado o tan nanga den èn den o de en pipel. Gado srefi o de nanga den. A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”Openbaring 21:3, 4.

Yehovah Gado o meki a sani disi pasa nanga yepi fu en Manpikin, Yesus, di gi en libi fu a bun fu a libisma famiri (Yohanes 3:16). Te Yesus o tiri, dan  libisma o kon de sondro sondu. Pina no o de moro fu di „Gado srefi o de nanga den” èn a o figi „ala watra puru na den ai”. Heri esi sondu nanga pina no o de moro. „Na den reti-ati sma o kisi grontapu èn fu têgo den o tan libi drape.”Psalm 37:29.

OGRI YEYE NO O DE MORO

„A [Yesus Krestes] grabu a bigi kaiman, a fosi sneki, dati na Didibri nanga Satan èn a tai en wán dusun yari langa. A fringi en go na ini a dipi peti, dan a tapu en na ini. Ne a sroto a peti nanga wan lakstampu, so taki Didibri no ben man kori den pipel moro.”Openbaring 20:2, 3.

Satan no o abi nowan enkri krakti moro na tapu libisma te Yesus o tai en nanga den ogri yeye èn trowe den go na ini „a dipi peti”. Dati wani taki dati den no o man du notinoti. Den ogri yeye disi no o man abi krakti moro na tapu den afersi fu libisma. A sa de wan frulekti trutru fu libi na ini wan grontapu pe Satan nanga den ogri yeye no o tiri moro!

„DEN LASTI DEI” O KON NA WAN KABA

„Den lasti dei” o kon na wan kaba nanga yepi fu a „bigi banawtu”, soleki fa Yesus ben kari en. A ben taki: „Wan bigi banawtu o de. Noiti ete so wan ten ben de sensi a bigin fu grontapu teleki now èn noiti moro so wan ten o kon baka.”Mateyus 24:21.

A bigi banawtu o de wan bigi sani fu di rampu o pasa sondro taki sma fruwakti dati. Den sani disi o doro den heimarki na „a feti na a bigi dei fu Gado na Almaktiwan”. Furu sma sabi a dei disi leki „Armagedon”.Openbaring 16:14, 16, luku a marki na a tekst disi.

Sma na ala sei di lobi san reti e howpu fu si a kaba fu na ogri sistema disi. Luku wan tu fu den blesi di den o kisi te Gado Kownukondre o tiri.

GADO O DU MORO SREFI!

„Wan bigi ipi” o pasi go libilibi na ini a nyun grontapu pe freide o de: Gado Wortu e taki dati wan „bigi ipi” sma o „komoto na ini a bigi banawtu” èn den o pasa go libilibi na ini a nyun grontapu pe retidu o de (Openbaring. 7:9, 10, 14; 2 Petrus 3:13). Den o taki dati den kisi frulusu nanga yepi fu Yesus Krestes, a „Pikin Skapu fu Gado di e puru a sondu fu grontapu.”Yohanes 1:29.

A leri fu Gado o meki sma kisi bigi blesi: Na a ten dati, „a heri grontapu o furu nanga a sabi fu Yehovah” (Yesaya 11:9). A leri fu Gado o sori sma fa fu libi na ini freide nanga ala sma èn a o leri den tu fu no pori grontapu. Gado e pramisi: „Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka.”Yesaya 48:17.

Den lobiwan fu wi di dede kaba o kisi wan opobaka: Di Yesus ben de na grontapu, dan a gi en mati Lasarus wan opobaka (Yohanes 11:1, 5, 38-44). Na so a sori san a o du gi sma na heri grontapu te Gado Kownukondre o tiri.Yohanes 5:28, 29.

Freide nanga retidu o de fu ala ten: Te Krestes o tiri, dan ogridu no o de moro. Fa wi du sabi dati? Fu di Yesus sabi san de na ini sma ati èn a o gebroiki a koni dati fu krutu reti-ati sma nanga ogrisma. Den sma di e weigri fu kenki den takru fasi fu den no o kisi okasi fu libi na ini a nyun grontapu fu Gado.Psalm 37:9, 10; Yesaya 11:3, 4; 65:20; Mateyus 9:4.

Wi poti prakseri na wan tu nomo fu den someni Bijbel profeititori di abi fu du nanga a moi ten di e wakti wi. Te Gado Kownukondre e tiri grontapu, dan „freide o de pasa marki” èn fu têgo (Psalm 37:11, 29). Ala den sani di e meki sma pina èn sari sa kon na wan kaba. Gado srefi e pramisi wi: „Luku, mi e meki ala sani kon nyun. . . . Den wortu disi tru èn sma kan bribi den.”Openbaring 21:5.