Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  augustus 2013

 KON KROSIBEI NA GADO

„Sma man si krin sortu fasi Gado abi, aladi den no man si en”

„Sma man si krin sortu fasi Gado abi, aladi den no man si en”

Yu e bribi na ini Gado? Efu dati de so, dan sortu buweisi yu abi taki Gado de trutru? A tru taki wi abi furu buweisi taki wan koni Mekiman de di abi furu makti nanga lobi. San na den krin buweisi dati? Fu piki na aksi dati, dan luku san na apostel Paulus ben skrifi na ini en brifi gi den Kresten na ini Rome.

Paulus ben taki: „Sensi grontapu meki, sma man si krin sortu fasi Gado abi, aladi den no man si en. Te den e luku den sani di a meki, den kan frustan taki a abi têgo krakti èn taki en na Gado trutru. Fu dati ede den no man taki nanga leti dati Gado no de” (Romesma 1:20). Paulus sori taki den sani di Gado meki e sori suma na a sma di meki den. Meki wi luku den wortu fu Paulus finifini.

Paulus taki dati wi kan si den fasi fu Gado te wi „e luku den sani di a meki”. Te yu e luku den tra tekst, dan a Griki wortu di vertaal nanga „grontapu” no de a grontapu pe wi e libi na tapu, ma na libisma. * Sobun, Paulus e taki dati sensi libisma meki, den ben kan si krin sortu fasi a Mekiman abi te den ben o luku den sani di a meki.

Den buweisi dati de na ala sei. Den no kibri, ma wi man ’si den krin’. Te wi e luku den moro bigi sani nanga den moro pikin sani di Gado meki, dan den no e sori wi nomo taki wan Mekiman de, ma den e sori wi tu taki a abi moi fasi. Yu no e agri taki a koni fasi fa Gado meki ala sani e sori taki a koni trutru? Te wi e luku den stari na hemel nanga den bigi skwala, dan dati no e sori wi taki Gado abi makti? Den difrenti switi nyanyan èn a moi fasi fa a son e opo èn e saka, no e sori wi taki Gado lobi libisma?Psalm 104:24; Yesaya 40:26.

Den buweisi disi de krin fu si? Den de so krin fu si taki den sma di no e si den buweisi èn di no wani bribi na ini wan Gado „no man taki nanga leti dati Gado no de”. Wan sabiman ben agersi en so: Kon meki wi taki dati wan man di e rèi wan wagi, no wani poti prakseri na wan bord pe skrifi: „Stop, a pasi tapu.” Wan skowtu e stop en èn a e naki en wan butu. A man di ben e rèi e taki dati a no ben si a bord. Ma a skowtu no e arki en, fu di ala sma man si a bord èn a man no breni. Boiti dati, na a sma di e rèi abi a frantwortu fu si den bord dati èn fu du san den bord e taki. Na disi wi kan taki tu fu den sani di Gado meki. Ala sma man si a „bord” dati, noso den sani di Gado meki. Leki libisma di abi frustan, wi man si dati. Wi no kan taki dati wi no e si den sani di Gado meki.

Den sani di Gado meki e sori suma na a sma di meki den

Iya, den sani di Gado meki e fruteri wi furu sani fu wi Mekiman. Ma wan tra sani de di e fruteri wi moro fu Gado, dati na Bijbel. Bijbel e piki a prenspari aksi disi: Fu san ede Gado meki grontapu èn fu san ede a meki libisma libi na tapu? A piki tapu na aksi dati kan yepi yu fu kon krosibei na Gado, fu di sensi grontapu meki „sma man si krin sortu fasi Gado abi, aladi den no man si en”.

A bun fu leisi a pisi disi fu Bijbel na ini augustus

Romesma 1-16

^ paragraaf 5 Bijbel e taki tu fu a sondu fu „grontapu” èn taki a abi wan frulusuman fanowdu. Dati e sori krin taki a wortu grontapu abi fu du nanga libisma.Yohanes 1:29; 4:42; 12:47.