Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2013

 FA YU KAN ABI WAN KOLOKU OSOFAMIRI LIBI?

Fa yu kan meki yu trowlibi waka bun efu yu trow baka?

Fa yu kan meki yu trowlibi waka bun efu yu trow baka?

HERMAN: * „Mi fosi wefi dede fu di a ben abi kanker. Wi ben trow 34 yari langa. Di mi trow nanga Linda, a ben feni taki ala ten mi e taki fa a de tra fasi leki mi fosi wefi. San ben meki en moro ogri, na taki den mati fu mi ben lobi taki fu den bun fasi fu mi fosi wefi, èn a sani disi ben meki Linda sari.”

LINDA: „Di mi trow nanga Herman, mi ben firi leki noiti mi ben o man de so wan bun wefi gi en leki en fosi wefi. Ala sma ben lobi en, den ben sabi en leki wan sma di e taki switi nanga trawan èn a ben abi bun maniri. Son leisi mi e aksi misrefi efu oiti mi nanga Herman o libi so bun nanga makandra leki en nanga en fosi wefi.”

Linda broko trow nanga en fosi masra èn en nanga Herman breiti taki den trow nanga makandra. Toku den srefi kon si taki te wan sma trow baka, a kan kisi problema di a no ben abi noiti na ini a fosi trowlibi fu en. *

Efu yu trow fu a di fu tu leisi, dan fa yu feni taki a e go nanga a trowlibi fu yu? Wan uma di nen Tamara di trow dri yari baka di a broko trow, taki: „Te yu trow fu a fosi leisi, dan yu abi a firi taki yu nanga yu patna o tan nanga makandra ala ten. Te yu trow fu a di fu tu leisi, dan kande yu no abi a firi dati, bika ala ten yu o prakseri fa a fosi trow fu yu broko.”

Ma furu trowpaar di trow baka, abi wan koloku trowlibi èn yu kan abi dati tu. San kan yepi yu?  Meki wi poti prakseri na dri problema di trowpaar kan kisi èn meki wi luku fa Bijbel kan yepi den. *

PROBLEMA 1: YU E POTI TUMUSI FURU PRAKSERI NA A FOSI TROWLIBI FU YU.

Ellen di e libi na ini Zuid-Afrika, taki: „Mi no man frigiti a fosi trowlibi fu mi, spesrutu te wi e go na den srefi presi pe mi nanga mi fosi masra ben go nanga fakansi. Son leisi mi e sidon e prakseri fa a masra di mi abi now de tra fasi leki mi fosi masra.” A kan tu taki yu ati e bron te yu trowpatna e taki fu a fosi trowlibi fu en.

Du sani makandra, dan unu o lobi makandra moro

WAN SANI DI YU KAN DU: Yu musu frustan taki yu noso yu trowpatna no o frigiti a fosi trowlibi fu unu, spesrutu efu unu ben de someni yari nanga un fosi trowpatna. Son sma taki dati sondro fu prakseri, den kari a trowpatna fu den na a nen fu a fosi trowpatna! San yu kan du te so wan sani pasa? Bijbel e taki: „Pruberi fu frustan makandra.”1 Petrus 3:8, New Century Version.

No taigi yu patna fu no taki noiti moro fu a fosi trowlibi fu en, soso fu di yu e dyarusu. Efu yu trowpatna firi fu taki fu a fosi trowlibi fu en, dan arki en èn pruberi fu frustan fa a e firi. No denki wantewante taki a feni en fosi trowpatna moro bun leki yu. Ian di trow baka tin yari, taki: „Noiti mi wefi Kaitlyn taigi mi taki mi no musu taki fu mi wefi di lasi libi. Te mi e taki fu en, dan a e si dati leki wan okasi fu kon sabi mi moro bun.” Den sortu takimakandra disi kan yepi yu nanga yu nyun trowpatna fu kon moro krosibei fu makandra.

Poti moro prakseri na den moi fasi fu yu nyun trowpatna. A tru taki yu trowpatna no abi son maniri di yu fosi trowpatna ben abi èn kande a no man du son sani di yu fosi trowpatna ben man du. Ma a musu de so taki a trowpatna di yu abi now man du son sani moro bun leki yu fosi patna. Fu dati ede, du muiti fu kon lobi yu trowpatna moro. Na presi fu luku san a trowpatna no man du, a moro bun fu poti prakseri na den sani fu en di yu lobi (Galasiasma 6:4). Edmond di trow tu leisi kaba, taki: „Neleki fa a wan mati no de a srefi leki a trawan, na so a wan trowlibi no de a srefi leki a trawan.”

Fa yu kan abi wan koloku trowlibi nanga yu nyun patna aladi ten na ten yu e prakseri den moi momenti di yu ben abi nanga yu fosi trowpatna? Jared taki: „Wan leisi mi taigi mi wefi taki a fosi trowlibi fu mi de leki wan moi buku di mi nanga mi fosi wefi skrifi. Son leisi te mi e prakseri den moi momenti di mi nanga mi fosi wefi ben abi, dan a de leki mi e opo a buku fu leisi en. Ma mi kaba skrifi na ini a buku dati. A libi di mi abi now na wan tra buku di mi nanga mi nyun wefi e skrifi èn wi de koloku.”

PRUBERI FU DU DISI: Aksi yu patna efu a e firi wan fasi te yu e taki fu yu fosi trowlibi. Pruberi fu si o ten a no ben o bun fu taki fu yu fosi trowlibi.

PROBLEMA 2: TE DEN MATI FU YU NO GWENTI NANGA YU NYUN PATNA.

Siksi yari baka di Javier broko trow, a trow baka. A taki: „Wan heri pisi ten baka di wi trow, mi wefi ben feni taki wan tu mati fu mi ben e luku en libi tumusi fini èn den ben e du ala sortu sani fu luku san a o du.” Wan man di nen Leo ben de na ini wan tra situwâsi. A taki: „Leti na mi fesi son sma ben taigi mi wefi fa den ben lobi a fosi masra fu en èn fa den e misi a man dati!”

WAN SANI DI YU KAN DU: Pruberi fu frustan fa den mati fu yu e firi. Ian di wi ben kari kaba, taki: „Mi denki taki a kan hati den mati fu yu taki yu fosi patna no de moro, fu di den ben gwenti nanga en. Kande den no sabi tu fa den musu tyari densrefi te yu nanga yu nyun patna de nanga den.” Sobun, pruberi fu frustan fa den mati fu yu e firi èn tan sori switifasi (Titus 3:2). Gi yu mati nanga famiri ten fu teki gwenti. Yu trowlibi de tra fasi now, sobun kande a matifasi di yu ben abi nanga son sma o de tra fasi tu. Javier taki dati bakaten den mati kon gwenti en nanga en nyun wefi. Javier taki tu: „Wan tra sani di e yepi wi, na taki mi nanga mi wefi e meki nyun mati.”

Te yu de nanga den mati fu yu, dan hori den  firi fu yu patna na prakseri. Fu eksempre, efu den mati fu yu e taki fu yu fosi patna, dan prakseri san yu kan du fu no meki yu nyun patna firi wan fasi. Wan odo na ini Bijbel e taki: „Sma de di e taki sani sondro fu denki, neleki na dyuku den e dyuku trawan nanga wan feti-owru, ma a tongo fu den koniwan na dresi.”Odo 12:18.

PRUBERI FU DU DISI: Prakseri na fesi na ini sortu situwâsi yu noso yu trowpatna no ben o firi switi, dan taki fa unu o du na ini den situwâsi disi. Luku san unu kan du te mati e aksi noso taki sani di abi fu du nanga a fosi trowlibi fu yu noso fu yu trowpatna.

PROBLEMA 3: A MUILEK GI YU FU FRUTROW YU PATNA DORODORO FU DI YU FOSI TROWPATNA GOWE LIBI YU.

Andrew en fosi wefi ben gowe libi en, ma bakaten a trow nanga Riley. Andrew taki: „Mi ben frede taki Riley ben o gowe libi mi tu. Furu tron mi ben e aksi misrefi efu oiti mi ben o bun leki a fosi masra fu Riley. Mi ben e frede srefi taki a no ben o feni mi bun nofo èn taki a ben o teki wan tra masra.”

WAN SANI DI YU KAN DU: Fruteri yu trowpatna krin fa yu e firi. Bijbel e taki: „Te sma no e taki krin nanga makandra, ala sani e bruya” (Odo 15:22). Fu di Andrew nanga Riley ben e taki krin fa den ben e firi, meki te fu kaba den ben man frutrow makandra. Andrew taki: „Mi taigi Riley taki noiti mi ben o broko a trow soso fu di wi abi problema, èn Riley pramisi mi a srefi sani tu. Safrisafri mi kon frutrow en dorodoro.”

Efu a fosi masra noso wefi fu yu trowpatna ben gowe libi en, dan du ala muiti fu meki a frutrow yu. A fosi trow fu Michel nanga a di fu Sabine ben broko. Ma now di den trow nanga makandra, den bosroiti taki den o taigi makandra efu den ben miti a fosi patna fu den. Sabine taki: „Disi meki taki wi e frutrow makandra dorodoro.”Efeisesma 4:25.

PRUBERI FU DU DISI: A bun te wan masra no e bumui tumusi furu nanga tra umasma te a de en wawan. A no musu du dati tu na telefon noso tapu Internet. Wan wefi no musu bumui tumusi furu nanga tra mansma tu.

Furu sma di trow baka, abi wan bun trowlibi èn na so a kan de tu nanga a trowlibi fu yu. Te yu luku en bun, dan a kan taki now yu sabi yusrefi moro bun leki a fosi leisi di yu ben trow. Andrew taki: „Mi no kan taki fa mi breiti taki mi trow nanga Riley. Na ini den 13 yari di pasa wi kon lobi makandra moro èn disi na wan sani di wi no wani lasi noiti.”

^ paragraaf 3 Wi kenki den nen.

^ paragraaf 5 A no de fu taki dati te wan sma en patna dede, dan den firi nanga a situwâsi fu en de heri tra fasi leki di fu wan sma di broko trow. Efu wan sma de na ini wan fu den situwâsi disi, dan na artikel disi kan yepi en fu abi wan koloku trowlibi efu a trow baka.

^ paragraaf 7 Efu yu wani sabi fa yu kan lusu problema di abi fu du nanga pikin fu yu nyun trowpatna, dan luku den artikel na ini na Ontwaakt! fu april 2012 di Yehovah Kotoigi tyari kon na doro.

AKSI YUSREFI . . .

  • San na wan tu moi fasi fu mi trowpatna di mi lobi srefisrefi?

  • Efu den mati fu mi e taki fu mi fosi patna, dan san mi kan du fu sori mi trowpatna taki na en mi lobi? San mi kan du fu meki a firi bun?

Kon sabi moro

YU KAN ABI WAN KOLOKU OSOFAMIRI

Tai hori na makandra

Na soso te wan sma no du sutadu, dan yu kan taki dati a e tai hori na en patna?