Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2013

Fa den kerki e si moni?

Fa den kerki e si moni?

Estelle * ben gwenti go na kerki nanga wan tu pikin. A taki: „Mi ben taigi a kerki fesiman taki mi ben wani leri sani fu Bijbel.” Ma noiti a fesiman meki wan muiti fu leri en wan sani. Te fu kaba Estelle no ben e go na kerki moro. A taki: „Den fesiman fu a kerki ben seni wan brifi gi mi pe den ben taki dati mi ben kan seni moni gi den, awinsi mi no ben man go na kerki moro. Mi ben prakseri: ’Den no e span srefi taki mi no e go na kerki. Na soso mi moni den wani.’”

Angelina di lobi sani fu Gado, taki: „Ibri leisi te kerki ben e hori, den ben meki a baskita pasa dri leisi èn ala leisi den ben wani wi fu poti moni na ini. Ala ten den ben e aksi wi moni. Mi ben e denki: ’Gado noiti no kan de nanga den sma disi.’”

Den kerki na ini a birti fu yu e dwengi sma fu gi den moni? Den e du ala sortu sani, soso fu kisi moni fu sma? Na dati Bijbel e leri?

SAN BIJBEL E LERI?

Yesus, a sma di seti a Kresten bribi, ben taki: „Unu kisi sondro fu pai, sobun un musu gi sma sondro fu meki den pai” (Mateyus 10:8). A boskopu fu Bijbel prenspari èn ala sma musu man yere en. A no de wan sani di sma musu pai fu en.

Fa den fosi Kresten ben tapu den kostu fu a gemeente fu den?

Bijbel taki dati ibri sma ben musu ’gi sani soleki fa a bosroiti na ini en ati. A no ben musu du dati nanga krutukrutu noso fu di sma dwengi en, bika Gado lobi a sma di e gi sani nanga prisiri’ (2 Korentesma 9:7). Na apostel Paulus taki: „Wi ben e wroko dei nanga neti, fu di wi no ben wani taki wan fu unu pai furu moni fu sorgu wi, so taki wi ben o de wan hebi gi unu te wi ben e preiki a bun nyunsu fu Gado gi unu” (1 Tesalonikasma 2:9). Aladi Paulus ben e du en diniwroko, a ben e meki tenti, so taki a ben kan abi moni fu man sorgu ensrefi.Tori 18:2, 3.

FA A DE NANGA YEHOVAH KOTOIGI?

Den presi pe Yehovah Kotoigi e kon makandra no abi furu pranpran. Den e kari den presi disi Kownukondre zaal. Fa den e tapu den kostu fu den presi disi? Den no e meki sma poti moni na ini komki noso baskita èn den no e seni brifi gi sma fu aksi den moni. Na presi fu dati den abi wan pikin kisi na ini a Kownukondre zaal. Iniwan sma di abi warderi gi den sani di a e leri na ini a Kownukondre zaal, kan poti wan sani na ini den kisi disi, sondro taki trawan sabi omeni a e poti.

Fa kerki musu tapu den kostu di den e meki?

Moni de fanowdu fu meki a tijdschrift disi èn fu seni en go na difrenti presi na grontapu. Ma noiti yu o si wan reklame noso wan boskopu na ini pe wi e aksi sma moni. A tijdschrift disi meki spesrutu fu meki sma sabi san Bijbel e leri trutru.

San yu e denki: Yu denki taki disi e kruderi nanga san Yesus ben taki èn nanga na eksempre fu den fosi Kresten?

^ paragraaf 2 Wi kenki son nen na ini den artikel disi.