Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2013

Fa den sma fu den kerki e tyari densrefi?

Fa den sma fu den kerki e tyari densrefi?

Sylvia di e sorgu gi owrusma, taki: „Mi go na skoro nanga sma di taki dati den e go na kerki. Ma toku den ben e spiek èn den ben e gebroiki drugs. A kerki fu den no ben abi krakti tapu a fasi fa den e tyari densrefi.”

Wan man di nen Lionel ben taki: „Den sma pe mi e wroko e lei. Den e taki dati den no man kon na wroko fu di den siki, aladi dati no tru. Gi den sma dati, kerki de leki wan sturu noso bangi di den poti na ini den oso soso fu moimoi, ma den no e gebroiki en.”

Kerki no abi krakti tapu a fasi fa sma e tyari densrefi. A gersi leki furu sma na ini a ten disi „e dini Gado fayafaya”, ma ’a libi fu den e sori taki dati no de so’ (2 Timoteyus 3:5). Den kerki fesiman no de bun eksempre gi den èn den no e gi den rai fu Bijbel di kan yepi den fu libi na wan fasi di fiti. Dati meki a no e fruwondru wi taki furu sma e denki taki Gado no e broko en ede nanga a fasi fa den e libi.

SAN BIJBEL E LERI?

Bijbel e sori taki Gado abi firi èn a e poti prakseri na a fasi fa wi e tyari wisrefi. A „ben e hati” Gado di den Israelsma fu owruten trangayesi en (Psalm 78:40). Ma te wan sma abi berow èn a tapu nanga na ogri di a e du, dan bigi ’prisiri de na hemel’ (Lukas 15:7). Te wan sma kon frustan sortu moi fasi wi hemel Tata abi, dan a o lobi en moro. Disi o meki taki a o lobi san Gado lobi èn a no o lobi san Gado no lobi.Amos 5:15.

FA A DE NANGA YEHOVAH KOTOIGI?

Wan koranti taki dati Yehovah Kotoigi „e yepi sma fu abi wan koloku osofamiri libi, fu tron sma di e wroko tranga èn sma di no e bedrigi trawan.” A koranti taki tu: „Den e si en leki wan prenspari sani fu tyari densrefi na wan fasi di fiti. Den e bribi taki wan sma kan pori en matifasi nanga Gado te a e smoko, te a e dringi tumusi furu sopi, te a e gebroiki drugs, te a e dòbel, te a e du hurudu, èn te a e libi wan homo sekslibi.” (A koranti Deseret News fu Salt Lake City, na ini Utah na Amerkankondre.)

Den kerki fesiman yepi den sma fu libi soleki fa Gado wani?

Fu di den Kotoigi sabi den fasi fu Gado, meki den e tyari densrefi na wan fasi di fiti. Sylvia di wi ben kari na a bigin fu na artikel disi, taki: „Furu sma di de na ini a bisnis fu sorgu owrusma, e bedrigi trawan. Sobun, a ben o makriki fu du dati tu. Ma fu di mi e frustan fa Yehovah * e denki fu a tori disi, meki mi e du muiti fu du san reti. Mi de koloku èn mi konsensi no e trobi mi.” Sylvia e bribi taki na den leri fu Bijbel meki taki a abi wan moro bun libi now.

^ paragraaf 9 Bijbel e sori taki a nen fu Gado na Yehovah.