Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2013

Fa kerki e si feti?

Fa kerki e si feti?

Alberto ben e wroko na ini a legre sowan tin yari langa. A taki: „Te a kerki fesiman fu a legre ben e blesi wi, a ben e taki: ’Gado de nanga unu.’ Ma mi ben e prakseri: ’Na kiri mi e go kiri sma, ma Bijbel e taki: „Un no musu kiri sma.”’”

Na ini a Di Fu Tu Grontapufeti Ray ben e wroko leki srudati na ini a legre na tapu se. Wan leisi a taigi a kerki fesiman fu a legre: „Yu e kon na tapu a sipi fu begi gi den srudati so taki den kan wini. Ma den feanti e du a srefi sani, a no so?” A kerki fesiman piki en taki libisma no man frustan fa Masra e wroko.

Furu sma no e agri nanga a piki di a kerki fesiman gi èn kande yu na wan fu den sma dati.

SAN BIJBEL E LERI?

Yesus taki dati wan fu den moro prenspari wèt di Gado gi sma, na taki den musu ’lobi tra sma leki fa den lobi densrefi’ (Markus 12:31). Ma Yesus no ben taki dati den tra sma disi na soso sma fu yu birti noso kondre. A taigi den disipel fu en: „Na a fasi disi ala sma o sabi taki unu na mi disipel, te unu lobi makandra” (Yohanes 13:34, 35). Den Kresten ben o lobi makandra so te, taki sma ben o si taki den de tra fasi. Sobun, Kresten no ben o kiri tra sma. Na presi fu dati den ben o de klariklari fu dede gi makandra.

Den fosi Kresten ben e libi soleki fa Yesus ben taki. Wan buku e taki: „Den fositen kerki tata soleki Tertullianus nanga Origenes ben taki dati den Kresten ben leri taki den no musu kiri sma. Dati meki den no ben e go na ini a legre fu Rome” (The Encyclopedia of Religion).

FA A DE NANGA YEHOVAH KOTOIGI?

Yehovah Kotoigi de na heri grontapu. Sobun, te tu kondre e feti, dan nofo tron yu abi Yehovah Kotoigi na ini ala tu kondre. Ma toku den e tan lobi makandra awinsi san e pasa.

Yu denki taki kerki fesiman leri sma fu lobi makandra trutru soleki fa Krestes taki?

Na ini 1994 wan feti ben de na mindri a lo fu den Hutu nanga a lo fu den Tutsi na ini Rwanda. Ma den Yehovah Kotoigi no teki prati na a feti dati kwetikweti. Na presi fu dati den Kotoigi fu a wan lo ben e kibri den Kotoigi fu a tra lo aladi den ben kan lasi den libi. Tu Hutu Kotoigi ben kibri den Tutsi brada fu den. Di den Hutu Interahamwe srudati kisi den Hutu brada, den taki: „Unu o dede fu di unu yepi den Tutsi fu lowe.” A sari fu taki dati den kiri den Hutu Kotoigi trutru.Yohanes 15:13.

San yu e denki: Yehovah Kotoigi e sori lobi trutru? Den de klariklari fu dede gi makandra soleki fa Yesus ben taki?