Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuli 2013

 KON KROSIBEI NA GADO

A e du furu bun gi wi

A e du furu bun gi wi

Yu denki taki Yehovah e broko en ede nanga wi trutru? Noso yu feni taki a no e span nanga a pina di libisma e pina na grontapu? A piki di Bijbel e gi tapu den aksi disi e naki wi ati trutru. Gado e broko en ede trutru nanga libisma èn a wani taki wi de koloku. A e du furu bun gi libisma ibri dei, awinsi den no de nanga tangi srefisrefi. Luku san na apostel Paulus taki.Leisi Tori 14:16, 17.

Na ini a tekst disi Paulus ben e taki nanga den sma fu a foto Listra, di no ben e anbegi Gado. Paulus taki: „Na ini a ten di pasa, [Gado] gi pasi taki ala pipel ben kan du san den wani. Ma a no de fu taki dati Gado meki unu kon sabi en fu di a du bun sani gi unu. A e gi unu alen komoto fu hemel èn bun ten di e meki taki unu abi bun furu nyanyan èn taki unu e firi prisiri.” San den wortu dati ben wani taki gi den sma fu Listra?

Den sma fu Listra ben frustan wantewante taki Paulus ben abi leti. Furu fu den ben de gronman èn den ben e libi na ini wan kontren di ben abi fatu gron nanga furu watra. Ma Paulus memre den taki na Gado e meki alen fadon na difrenti pisi ten fu a yari, so taki den ben kan koti furu nyanyan. Sobun, na fu di Gado abi bun-ati, meki den ben man nyan bun fu den furu nyanyan di den ben e koti na den gron.

Te wi e luku den sani di Paulus taigi den sma fu Listra, dan wi kan leri wan tu prenspari sani fu Yehovah Gado.

Yehovah gi wi na okasi fu teki wi eigi bosroiti. Paulus sori taki Yehovah gi pasi taki ala pipel „ben kan du san den wani”. Wan buku di sma e gebroiki fu vertaal Bijbel e sori taki den wortu disi wani taki dati wan sma ’kan du san en feni bun’. Yehovah no e dwengi nowan sma fu anbegi en. A gi wi na okasi fu bosroiti gi wisrefi fa wi wani libi.Deuteronomium 30:19.

Yehovah wani taki wi musu kon sabi en. Paulus taki dati Gado meki wi „kon sabi en”. A buku di wi ben taki fu en kaba, taki dati den wortu disi wani taki tu dati Yehovah ’sori sma krin sortu Gado a de’. Te sma e luku den sani di Gado meki, dan den „man si krin sortu fasi Gado abi, aladi den no man si en” (Romesma 1:20). Den man si taki Gado bun, taki a koni, taki a abi furu krakti, èn taki a abi lobi. Yehovah meki sma skrifi furu tra sani fu en na ini Bijbel (2 Timoteyus 3:16, 17). A de krin taki a wani wi fu sabi en, a no so?

Gado e du furu bun gi libisma ibri dei, awinsi den no de nanga tangi srefisrefi

Yehovah wani taki wi de koloku. Paulus taki dati a e ’meki taki wi abi bun furu nyanyan èn taki wi e firi prisiri’. Srefi sondari di no wani sabi noti fu Yehovah kan nyan bun fu wan switi nyanyan èn den kan abi wan switi libi. Ma Gado wani taki wi de koloku trutru èn fu ala ten. Wi kan kisi so wan libi, soso te wi kon sabi suma a de trutru èn te wi e du muiti fu libi soleki fa a wani.Psalm 144:15; Mateyus 5:3.

Ibri dei wi alamala e kisi wini fu di Gado e du bun gi wi. Dati meki a bun fu sori taki wi de nanga tangi taki Gado e ’meki taki wi abi bun furu nyanyan èn taki wi e firi prisiri’.

A bun fu leisi a pisi disi fu Bijbel na ini yuli

Tori 11–28