Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yuni 2013

Wi musu begi den santawan?

Wi musu begi den santawan?

A NO DE FU TAKI dati ala sma kon bruya wan leisi, èn a sani dati meki taki den go suku yepi na wan trawan. Efu dati pasa nanga yu, dan kande yu ben o go na wan mati di e frustan fa yu e firi èn di abi ondrofeni nanga a problema di e miti yu. Ibri sma wani abi wan mati di e firi gi den èn di abi ondrofeni.

Son sma e firi a srefi te a abi fu du nanga begi. Fu di den feni taki Gado hei tumusi èn taki a dangra tumusi gi den, meki den feni en moro makriki fu begi wan fu den santawan. Den sma disi feni taki den santawan o man frustan libisma moro bun fu di den ondrofeni den srefi tesi nanga problema fu libisma. Fu eksempre, sma di lasi wan sani di prenspari srefisrefi gi den, nofo tron e begi „Santawan” Anthonius van Padua. Sma e si en leki a santawan di e yepi sma fu feni sani di den lasi noso di sma fufuru fu den. Te sma e begi gi wan meti di siki, dan nofo tron den e begi „Santawan” Franciscus van Assisi. Tra sma e begi „Santawan” Yudas Tadeyus, te den e firi brokosaka fu di sani no waka bun gi den.

Ma fa wi kan de seiker taki a begi di wi e begi den santawan na wan sani di e kruderi nanga Bijbel? Fu di wi e taki nanga Gado te wi e begi, meki a no de fu taki dati yu wani sabi a sani disi: Gado e arki den begi fu wi? Wan tra sani di wi musu aksi wisrefi na disi: Fa Gado feni en taki sma e begi den santawan?

BIJBEL E TAKI DATI WI MUSU BEGI DEN SANTAWAN?

Sma abi a gwenti fu begi den santawan, fu di a Lomsu Kerki e leri sma taki na so den musu begi Gado. Soleki fa wan buku e taki, dan den sma disi „e begi Gado nanga yepi fu wan sma di Gado gi a reti fu taki gi den” (New Catholic Encyclopedia). Sobun, wan sma di e begi den santawan e du dati nanga a howpu taki den o kisi blesi nanga yepi fu den sma disi di Gado gi wan spesrutu posisi.

Bijbel e leri a sani dati? Son sma e taki dati na apostel Paulus ben sori taki a fiti te wi e begi Gado na ini a nen fu den santawan. Fu eksempre, a ben skrifi den Kresten na ini Rome: „We, mi brada, fu di wi e bribi na ini wi Masra Yesus Krestes èn fu di a santa yeye meki taki wi abi lobi, mi e gi unu deki-ati fu du muiti makandra nanga mi fu begi Gado gi mi” (Romesma 15:30). A de so taki Paulus ben e aksi den Kresten brada nanga sisa fu de leki mindriman èn fu begi Gado gi en? Kwetikweti. Te yu luku en bun, dan na den ben o aksi Paulus, wan apostel fu Krestes, fu du dati gi den. Paulus ben e sori taki a fiti fu aksi wan Kresten brada noso sisa fu begi Gado fu a bun fu wi. Ma a de wan heri tra sani te wi e bribi taki wan spesrutu sma de na hemel èn wi e begi a sma dati fu taki nanga Gado gi wi. Fu san ede dati de so?

Na ini na Evangelietori fu Yohanes, Yesus e  taki: „Mi na a pasi, mi na san tru, èn mi na a libi. Nowan sma kan kon na a Tata sondro mi” (Yohanes 14:6). A e taki tu: „A Tata o gi unu awansi san unu e aksi en na ini mi nen” (Yohanes 15:16). Yesus no ben taki dati wi musu begi en, èn taki baka dati a ben o taki nanga Gado fu a bun fu wi. Na presi fu dati, efu wi wani taki Gado arki den begi fu wi, dan wi musu begi Gado na ini Yesus en nen wawan.

Di den disipel fu Yesus aksi en fu leri den fa fu begi, dan Yesus piki: „Te unu e begi, un musu taki: ’Tata, meki yu nen kon santa. Meki yu Kownukondre kon’” (Lukas 11:2). Iya, ibri leisi te wi e begi, wi no musu begi Yesus noso iniwan tra sma, ma wi musu begi Gado srefi. Fu di Yesus taki sani krin, meki wi kan frustan taki wi no musu begi Gado na ini a nen fu tra sma noso na ini a nen fu „santawan”, ma wi musu begi en na ini Yesus Krestes nen wawan.

Begi na wan tumusi prenspari sani na ini na anbegi fu wi, èn te wi e anbegi wan tra sma boiti Gado, dan a sani dati no e kruderi nanga Bijbel kwetikweti (Yohanes 4:23, 24; Openbaring 19:9, 10). Dati meki wi musu begi Gado wawan.

WI MUSU FREDE FU BEGI GADO?

Na ini taki di Yesus ben hori na tapu Olèif-bergi, a gi na eksempre fu wan pikin di e aksi en papa wan sani fu nyanyan. Wan papa ben o gi a pikin fu en wan ston na presi fu brede? Noso a ben o gi en wan sneki na presi fu wan fisi? (Mateyus 7:9, 10) Wan lobi-ati papa noso mama noiti no ben o du so wan sani!

Neleki fa a de nanga wan lobi-ati papa nanga en pikin, na so Gado wani taki wi e taki nanga en

Meki wi luku a tori disi tra fasi. Kon meki wi taki dati yu na wan papa noso wan mama, èn a pikin fu yu wani aksi yu wan seryusu sani. Ala ten yu sorgu taki yu nanga a pikin man feni en bun nanga makandra èn ala ten yu sori switifasi gi en. Ma toku a feni taki a abi reide fu frede san yu o taki, èn fu dati ede a meki wan tra sma aksi yu a sani gi en. Fa yu ben o firi? Kon meki wi taki dati a e teki en leki wan gwenti fu meki a tra sma disi taki nanga yu gi en, èn a no gersi leki a sani dati o kenki. Yu ben o lobi a tori? Kwetikweti! Lobi-ati papa nanga mama wani taki den pikin srefi musu taki nanga den, èn taki den pikin no musu frede fu aksi den san den abi fanowdu.

Di Yesus fruklari na agersitori fu a pikin di ben aksi nyanyan, dan a taigi den arkiman fu en: „Fu dati ede, efu unu di abi takru fasi, sabi fa fu gi un pikin bun sani, unu kan de seiker taki un Tata di de na hemel o gi sma bun sani te den e aksi en!” (Mateyus 7:11) A no de fu taki dati ibri papa nanga mama abi a tranga winsi fu gi den pikin fu den bun sani. Wi Tata na hemel e angri moro srefi fu arki èn fu piki den begi fu wi.

Te wi e begi Gado, dan wi musu taki langalanga nanga en, awansi wi e broko wi ede nanga den swakifasi fu wi. A no e gi trawan a frantwortu fu arki den begi fu wi. Bijbel e gi wi a deki-ati disi: „Trowe yu hebi na tapu Yehovah, dan en srefi o horibaka gi yu. Noiti a o gi pasi taki wan reti-ati sma degedege” (Psalm 55:22). Na presi taki wi e fruwakti taki den santawan noso tra sma e taki nanga Gado gi wi, a ben o moro bun fu kon abi a yoisti denki fu Yehovah Gado.

Wi hemel Tata e broko en ede nanga ibriwan fu wi. A wani yepi wi nanga den problema fu wi èn a e gi wi a kari fu kon krosibei na en (Yakobus 4:8). Wi breiti trutru taki wi abi na okasi fu taki nanga wi Gado nanga wi Tata, a „sma di e arki begi”!Psalm 65:2.