Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  mei 2013

Rampu—Na buweisi taki Gado abi ogri-ati?

Rampu—Na buweisi taki Gado abi ogri-ati?

SANI DI SMA E TAKI: „Na Gado e tiri grontapu, sobun na en e meki rampu pasa. Fu dati ede a musu fu de wan ogri-ati Gado.”

SAN BIJBEL E TAKI: „Heri grontapu de na ini a makti fu na ogriwan” (1 Yohanes 5:19). Suma na a „ogriwan”? Bijbel e sori taki na Satan (Mateyus 13:19; Markus 4:15). A sani disi tru? Denki a tori disi: Efu na Satan abi a makti fu tiri grontapu, dan na en e meki taki libisma e denki densrefi nomo, taki den gridi èn taki neleki en den no e prakseri den bakapisi fu den sani di den e du. A sani disi e meki wi frustan fu san ede libisma e pori a grontapu pe den srefi e tan. Furu sabiman e taki dati na a pori di libisma e pori grontapu e meki taki rampu e pasa, taki den e kon moro hebi, noso taki den e pasa moro makriki.

We dan fu san ede Gado e gi pasi taki Satan abi so furu makti? Fu man kisi piki tapu na aksi disi, dan wi musu go baka na a bigin fu libisma historia, na a ten di wi fosi papa nanga mama opo densrefi teige Gado, a tiriman fu den. Sensi a ten dati, furu sma du a srefi sani. A bosroiti di den teki fu no saka densrefi moro na ondro a tiri fu Gado, meki taki a libisma famiri kon de na ondro a makti fu Satan, a feanti fu Gado. Dati meki Yesus kari Satan „a tiriman fu grontapu” (Yohanes 14:30). Satan o tiri fu ala ten?

Toku a no de so taki Yehovah * no e broko en ede nanga a pina di Satan e pina libisma. Fu taki en leti Gado e firi sari te libisma e pina. Fu eksempre, di muilek ten ben miti den Israelsma, dan Bijbel e taki disi fu Gado: „Te den ben de na ini banawtu, ensrefi ben de na ini banawtu tu” (Yesaya 63:9). Fu di Gado abi sari-ati nanga libisma, meki a seti sani fu sorgu taki na ogri-ati tiri fu Satan kon na wan kaba, èn dati o pasa heri esi. A poti en Manpikin, Yesus Krestes, fu tiri fu têgo leki Kownu di lobi retidu.

SAN A TORI DISI ABI FU DU NANGA YU: A tiri fu Satan no kibri sma gi rampu, ma a tiri fu Yesus o du dati. Wan leisi Yesus kibri den disipel fu en di wan bigi winti ben e wai. Bijbel e taki: „A bari a winti èn a taigi a se: ’Tapu! Tan tiri!’ Dan a winti saka èn ala sani kon tiri. Den disipel taki: „Suma na a sma disi? Srefi a winti nanga a se e du san a e taki” (Markus 4:37-41). A sani dati e gi wi a frutrow taki Yesus o kibri ala libisma di e gi yesi na en te a e tiri leki Kownu.Danièl 7:13, 14.

^ paragraaf 5 Yehovah na a nen fu Gado soleki fa Bijbel e tyari kon na krin.