Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  mei 2013

 BIJBEL E KENKI SMA LIBI

„Mi ben e angri fu tron wan priester”

„Mi ben e angri fu tron wan priester”
  • A GEBORE NA INI: 1957

  • KONDRE: MEKSIKOW

  • A BEN E STUDERI FU TRON PRIESTER ÈN A BEN E ATIBRON ESI-ESI

A LIBI FU MI FOSI:

Mi gebore na ini a pikin foto Texcoco. Na a ten dati, furu fu den strati drape ben de santi pasi. Wi ben gwenti si fa sma fu den dorpu na ini a birti ben e kon seri sani na ini a foto. Den ben e lai den sani disi na tapu den buriki fu den. Na osofamiri fu wi ben pôti èn wi ben de nanga neigi pikin. Mi na a di fu seibi pikin. Mi papa ben e meki guaraches, wan sortu plata susu. Ma a dede di mi ben abi seibi yari. Sensi a ten dati, mi mama ben e meki muiti fu sorgu taki wi ben abi nyanyan.

Mi granpapa ben e prei finyoro èn a ben de fesiman fu a grupu pokuman di ben e prei poku na ini a kerki. Pikinmoro ala den famiriman fu wi ben e prei poku. Mi mama ben e singi na ini a singi grupu fu a kerki, mi omu ben e singi opera èn a ben e prei piano. Wi ben de fayafaya Lomsusma. Mi ben de wan fu den boi di ben e yepi a priester te Mis ben e hori, èn mi ben e angri fu tron wan Lomsu zendeling. Ma mi ben lobi luku karate felem tu. O moro mi ben e luku den felem dati, o moro mi ben e tron wan faya-ati sma.

Na ini a foto Puebla, mi go na wan kerki skoro pe den ben e gi sma leri fu tron priester. Mi ben wani tron wan Lomsu priester. Ma na ini a lasti yari fu a skoro mi kon lasi bribi na ini a Lomsu Kerki. Wan yongu non ben wani abi seks nanga mi. Mi no ben wani, ma a sani dati wiki na angri ini mi fu trow. Boiti dati, mi ben si fa furu priester ben e libi wan hoigri libi. Te fu kaba, mi no ben wani tron wan priester moro.

Na a ten di mi ben e yepi den priester, mi ben e angri fu tron wan Lomsu zendeling. Ma mi ben lobi luku karate felem tu, èn mi kon tron wan faya-ati sma

Mi bosroiti fu go studeri na wan heiskoro na ini Meksikow  City, pe sma ben e leri fu prei poku. Di mi klari a skoro, mi trow èn fosi yu denki, mi nanga mi wefi ben abi fo pikin. Mi ben e singi te Mis ben e hori na ini a Lomsu Kerki èn na so mi ben man sorgu mi osofamiri.

Sensi a bigin, wi ben abi problema na ini wi trowlibi. Mi nanga mi wefi ben e meki bigi trobi, èn moro furu dati ben e kon fu di wi ben e dyarusu tapu makandra. Na a bigin wi ben e kosi makandra, ma te fu kaba wi bigin feti. Baka 13 yari, wi bosroiti fu prati èn fu broko trow bakaten.

A FASI FA BIJBEL KENKI MI LIBI:

A fosi leisi di mi miti Yehovah Kotoigi, ben de fosi mi prati nanga mi wefi. Tu Kotoigi kon na mi oso èn den aksi mi efu mi ben wani studeri Bijbel. Mi ben denki taki mi ben sabi furu fu kerkitori, èn mi ben wani sori den taki den sani di den ben e leri sma, no tru. Mi poti aksi gi den di mi ben denki taki den no ben o man piki. Ma mi fruwondru taki den ben man piki ala den aksi dati nanga yepi fu Bijbel. Ne mi bigin si taki mi no ben sabi furu fu Bijbel. Ma mi wefi ben grofu nanga den Kotoigi, èn fu di mi ben abi furu fu du, meki te fu kaba den no kon moro.

Feifi yari baka dati, mi ben e libi nanga wan tra uma, Elvira, di mi miti Yehovah Kotoigi baka. Elvira no ben e gens den Kotoigi, èn dati meki mi ben feni en moro makriki fu studeri Bijbel doronomo. Toku a teki seibi yari fosi mi ben man kenki mi libi.

Mi kon si taki efu mi ben wani dini Yehovah nanga mi heri ati, dan mi ben o abi fu tyari wan tu bigi kenki kon. A fosi sani, na taki mi ben o abi fu tapu fu singi na ini a Lomsu Kerki. Dati wani taki dati mi ben o abi fu feni wan tra wroko fu sorgu mi osofamiri (Openbaring 18:4). Boiti dati, mi ben abi fu trow nanga Elvira.

Ma wan fu den moro muilek kenki di mi ben musu tyari kon, na taki mi ben musu leri fu hori misrefi te mi ben atibron. Tu Bijbeltekst di yepi mi trutru na Psalm 11:5 di e sori taki Yehovah no lobi ogridu kwetikweti. Sosrefi 1 Petrus 3:7 di e sori taki efu mi wani taki Yehovah arki den begi fu mi, dan mi musu gi mi wefi grani. Mi denki dipi fu den tekst dati èn mi begi Yehovah fu yepi mi. Safrisafri mi ben man hori misrefi te mi ben atibron.

Bijbel leri mi taki efu mi ben wani taki Yehovah arki den begi fu mi, dan mi musu gi mi wefi grani

DEN WINI DI MI KISI:

Now mi abi wan koloku osofamiri libi. Mi e pruberi fu meki en bun baka nanga den boi di mi abi nanga a fosi wefi fu mi, èn mi e yepi na osofamiri di mi abi now fu tan abi wan tranga bribi.

Di mi ben yongu, mi ben angri fu tron wan priester èn fu yepi sma. Now mi e du wan bun sani nanga mi libi. Mi e leri sma fu prei poku, èn na so mi e sorgu mi osofamiri. Mi breiti trutru taki Yehovah hori pasensi nanga mi, fu di a gi mi na okasi fu kenki mi libi èn fu tron wan moro bun sma.